ଭୁବନେଶ୍ୱର,(ବ୍ୟୁରୋ)୨୧।୮: ରାଜଧାନୀସ୍ଥିତ ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ (ଏମ୍ସ)ରେ ଏକ ଦୁଃଖଦ ଘଟଣା ଘଟିଛି। ଶନିବାର ପୂର୍ବାହ୍ନ ୧୧ଟାରେ ମେଡିକାଲର ୫ମ ମହଲାରୁ ଡେଇଁ ଜଣେ ରୋଗୀ ଜୀବନ ହାରିଛନ୍ତି। ସ୍ତ୍ରୀଙ୍କ ଆଗରେ ସ୍ବାମୀ ଜୀବନ ହାରିବା ଘଟଣା ଶୋକାକୁଳ ପରିବେଶ ସୃଷ୍ଟି କରିଛି। ମୃତକ ଜଣଙ୍କ ହେଲେ ଏମ୍ସର ପ୍ଲାଷ୍ଟିକ ସର୍ଜରୀ ୱାର୍ଡରେ ଚିକିତ୍ସିତ ହେଉଥିବା ପୁରୀ ଜିଲା ଚନ୍ଦନପୁର ବ୍ଲକ ବୀରପ୍ରତାପପୁର ଅଞ୍ଚଳର ମହେନ୍ଦ୍ର ସ୍ବାଇଁ। ତେବେ ସେ ତଳକୁ କାହିଁକି ଡେଇଁ ଆତ୍ମହତ୍ୟା କଲେ ତା’ର କାରଣ ସ୍ପଷ୍ଟ ହୋଇ ନ ଥିଲେ ହେଁ ରୋଗ ଯନ୍ତ୍ରଣା ସହ୍ୟ କରି ନ ପାରି ମହେନ୍ଦ୍ର ଏଭଳି ନିଷ୍ପତ୍ତି ନେଇଥିବା କୁହାଯାଉଛି। ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚତ୍ ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଛି। ଅପରପକ୍ଷରେ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯାଇଥିବା ଏମ୍ସ ପକ୍ଷରୁ ସୂଚନା ଦିଆଯାଇଛି। ସ୍ତ୍ରୀ ତାଙ୍କୁ ହୁଇଲ ଚେୟାରରେ ବୁଲାଉଥିବାବେଳେ ମହେନ୍ଦ୍ର ହଠାତ ଚେୟାରରୁ ୫ ମହଲାରେ ଥିବା ବାଲକୋନିରୁ ତଳକୁ ଡେଇଁ ପଡ଼ିଥିଲେ। ତାଙ୍କୁ ସଙ୍ଗେସଙ୍ଗେ କାଜୁଆଲିଟି ବିଭାଗକୁ ନିଆଯାଇଥିଲା। ହେଲେ ସେଠାରେ ଡାକ୍ତର ମହେନ୍ଦ୍ରଙ୍କୁ ମୃତ ଘୋଷଣା କରିଥିଲେ।
ସୂଚନାନୁସାରେ, ମହେନ୍ଦ୍ର ଗ୍ରାମରେ ପରିବା ବିକ୍ରି କରୁଥିବାବେଳେ ସ୍ତ୍ରୀ ବନିତା ମନ୍ଦିର ସାମ୍ନାରେ ଦୀପ ବିକ୍ରି କରି ଗୁଜରାଣ ମେଣ୍ଟାନ୍ତି। ହେଲେ କୌଣସି କାରଣରୁ ମହେନ୍ଦ୍ରଙ୍କ ବାମ ଗୋଡ଼ରେ ଘା’ ହୋଇଥିଲା। ଆର୍ଥିକ ଅବସ୍ଥା ଭଲ ନ ଥିବାରୁ ଗତ ଜୁଲାଇ ୧୧ ତାରିଖରେ ମହେନ୍ଦ୍ର ଏମ୍ସର ପ୍ଲାଷ୍ଟିକ ସର୍ଜରୀ ୱାର୍ଡରେ ଭର୍ତ୍ତି ହୋଇଥିଲେ। ପ୍ରଥମେ ଅସ୍ତ୍ରୋପଚାର କରାଯିବା ପରେ ଜଙ୍ଘରୁ ମାଂସ ନିଆଯାଇ ବାମ ଗୋଡ଼ ଘା’ ସ୍ଥାନରେ ପ୍ଲାଷ୍ଟିକ୍ ସର୍ଜରୀ କରାଯାଇଥିଲା। ଆସନ୍ତା ଦିନେ କିମ୍ବା ୨ଦିନ ମଧ୍ୟରେ ସେ ମେଡିକାଲରୁ ଡିସ୍ଚାର୍ଜ ହୋଇଥାନ୍ତେ। ହେଲେ ହଠାତ୍ ମହେନ୍ଦ୍ର ବାହାରକୁ ଟିକେ ପବନ ଖାଇ ଆସିବାକୁ ସ୍ତ୍ରୀଙ୍କୁ କହିଥିଲେ। ସ୍ବାମୀ ମହେନ୍ଦ୍ରଙ୍କ କଥା ରଖି ବନିତା ହୁଇଲ ଚେୟାରରେ ବୁଲାଉଥିବାବେଳେ ମହେନ୍ଦ୍ର ଚେୟାରରୁ ଉଠି ପଡ଼ି ପଞ୍ଚମ ମହଲାର ବାଲ୍କୋନି ବାଡ଼ାରେ ଚଢ଼ିଯାଇଥିଲେ। ଏହି ସମୟରେ ସ୍ତ୍ରୀ ତାଙ୍କ ଶାର୍ଟକୁ ଭିଡ଼ି ଅଟକେଇବାକୁ ଉଦ୍ୟମ କରୁଥିବାବେଳେ ଶାର୍ଟ ଚିରିଯାଇଥିଲା ଏବଂ ମହେନ୍ଦ୍ର ସିଧା ତଳେ ପଡିଯାଇଥିଲେ। ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା ବୋଲି ଏମ୍ସ ଜନସମ୍ପର୍କ ଅଧିକାରୀ ସୂଚନା ଦେଇଛନ୍ତି।