ବେଜିଂ,୨୫।୧୨ : ଚାଇନାରେ ପ୍ରତିଦିନ ଅଜବ ଘଟଣା ଘଟୁଛି, ଯାହା ଅତ୍ୟନ୍ତ ଆଶ୍ଚର୍ଯ୍ୟଜନକ। ଏହି କ୍ରମରେ, ଏକ ଘଟଣାର ଭିଡିଓ ଏବେ ସାମ୍ନାକୁ ଆସିଛି, ଯେଉଁଠାରେ ଜଣେ ଡାକ୍ତର ଜଣେ ବୃଦ୍ଧ ମହିଳା ରୋଗୀଙ୍କୁ ଅପରେଶନ ସମୟରେ ପିଟିଥିବାର ନଜର ଆସିଛନ୍ତି। ଏହି ଘଟଣା ସାମ୍ନାକୁ ଆସିବା ପରେ ଅଧିକାରୀମାନେ ଘଟଣାର ତଦନ୍ତ ଆରମ୍ଭ କରିଛନ୍ତି। ଉହାନରେ କରୋନା ମହାମାରୀ ସଂକ୍ରମଣ ବିଷୟରେ ସୂଚନା ଦେଇଥିବା ଡାକ୍ତର ଏହି ଘଟଣାର ଭିଡିଓ ଶେୟାର କରିଛନ୍ତି। ଡାକ୍ତର ଏଇ ଫେନ ସୋସିଆଲ ମିଡିଆରେ ହୋଇଥିବା ଆକ୍ରମଣର ଭିଡିଓ ଶେୟାର କରିଛନ୍ତି।
ବିସିସିର ରିପୋର୍ଟ ଅନୁଯାୟୀ, ଏହି ସପ୍ତାହରେ ଫେନ ଏହି ଭିଡିଓକୁ ଚାଇନାର ସୋସିଆଲ ମିଡିଆ ୱିବୋରେ ପୋଷ୍ଟ କରିବା ପରେ ଏହା ଭାଇରାଲ ହୋଇଥିଲା, ଯାହା ହସ୍ପିଟାଲର ପ୍ୟାରେଣ୍ଟ କମ୍ପାନୀ ଏୟାର ଚାଇନାକୁ ଡାକ୍ତରଙ୍କୁ ନିଲମ୍ବନ କରିବା ଏବଂ ସିଇଓଙ୍କୁ ବରଖାସ୍ତ କରିବାକୁ କହିଥିଲା। ଏହି ଭିଡିଓରେ ଦେଖିବାକୁ ମିଳୁଛି ଅପରେଶନ ସମୟରେ ସର୍ଜନ ତାଙ୍କ ରୋଗୀଙ୍କୁ ବିଧା-ଚାପୁଡା-ମୁଥ ମାରୁଛନ୍ତି। ଅପରେଶନ ସମୟରେ ସେ ରୋଗୀଙ୍କୁ ତିନିଥର ପିଟିଥିଲେ। ଏୟାର ଚାଇନା କହିଛି ୨୦୧୯ ରେ ଚାଇନାର ଗୁଆଙ୍ଗସି ପ୍ରଦେଶର ଗୁଇଗାଙ୍ଗର ଏକ ଚକ୍ଷୁ ଡାକ୍ତରଖାନାରେ ଏଭଳି ଘଟିଥିଲା।
ପୀଡିତା ଜଣକ ଜଣେ ବୃଦ୍ଧ ମହିଳା। ଅସ୍ତ୍ରୋପଚାର ପାଇଁ ତାଙ୍କୁ ଆନାସ୍ଥେସିଆ ଦିଆଯାଇଥିଲା ବୋଲି ଏର ଆଇ ହସ୍ପିଟାଲ ଗ୍ରୁପ ଏକ ବିବୃତ୍ତିରେ କହିଛି। ଏହା ପରେ ମଧ୍ୟ ସେ ବାରମ୍ବାର ମୁଣ୍ଡ ଓ ଆଖି ହଲାଉଥିଲେ, ଏହି କାରଣରୁ ଡାକ୍ତରଙ୍କୁ ଅପରେଶନ କରିବାରେ ଅସୁବିଧା ହେଉଥିଲା। ସେ ତାଙ୍କୁ ବାରମ୍ବାର ମାନ୍ଦାରିନ ଭାଷାରେ ବୁଝାଇଥିଲେ, କିନ୍ତୁ ମହିଳା ଜଣକ କେବଳ ସ୍ଥାନୀୟ ଭାଷା ବୁଝୁଥିବାରୁ ଡାକ୍ତର କ‘ଣ କହୁଛନ୍ତି ତାହା ଜାଣି ପାରି ନ ଥିଲେ ତେଣୁ ଡାକ୍ତର କ୍ରୋଧିତ ହୋଇ ତାଙ୍କୁ ପିଟି ଥିଲେ।
ସ୍ଥାନୀୟ ଅଧିକାରୀ କହିଛନ୍ତି ମହିଳାଙ୍କ କପାଳରେ ଆଘାତ ଲାଗିଥିଲା ଏବଂ ଡାକ୍ତରଖାନା ରୋଗୀଙ୍କ ପରିବାରକୁ କ୍ଷତିପୂରଣ ବାବଦରେ ୫୦୦ ୟୁଆନ ଦେଇଛି। ସ୍ଥାନୀୟ ଗଣମାଧ୍ୟମକୁ ସୂଚନା ଦେଇ ପୀଡିତାଙ୍କ ପୁଅ ଏହା ମଧ୍ୟ ଦାବି କରିଛନ୍ତି ତାଙ୍କ ମା’ଙ୍କର ବାମ ଆଖିକୁ ଦେଖାଯାଉ ନାହିଁ। ପ୍ରାୟ ଚାରି ବର୍ଷ ଧରି ଘଟଣାର ଅନୁସନ୍ଧାନ ହୋଇପାରି ନ ଥିଲା। କାରଣ ସେତେବେଳେ ଏହି ଘଟଣା ସାମ୍ନାକୁ ଆସି ନ ଥିଲା।
ଗୁରୁବାର ଡାକ୍ତରଖାନା ସିଇଓଙ୍କ ବରଖାସ୍ତ ଏବଂ ସର୍ଜନଙ୍କ ନିଲମ୍ବନ ଘୋଷଣା କରି କହିଛି ଗୋଷ୍ଠୀ ନିୟମର ଗୁରୁତର ଉଲ୍ଲଂଘନ ହୋଇଛି। ଫେନ ତାଙ୍କର ଦୁଇ ଲକ୍ଷ ଫାଲୋଅରଙ୍କ ପାଇଁ ଅନଲାଇନରେ ସିସିଟିଭି ଫୁଟେଜ ଅନଲାଇନରେ ପ୍ରକାଶ କରିବା ପରେ ଏହି ଘଟଣା ସାମ୍ନାକୁ ଆସିଥିଲା। ଡିସେମ୍ବର ୨୦୧୯ ରେ ସେ କରୋନାଭାଇରସ ସଂକ୍ରମଣ ସହିତ ନିମୋନିଆର ସମ୍ମୁଖୀନ ହୋଇଥିବା ପ୍ରଥମ ଡାକ୍ତରମାନଙ୍କ ମଧ୍ୟରୁ ଜଣେ ଥିଲେ।
