ନୟାଗଡ଼,୧୪ା୮(ଲୋକନାଥ ମିଶ୍ର): ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ରୋଗୀ ଶଯ୍ୟା ନ ପାଇ ବାରଣ୍ଡାରେ ଶୋଇ ଚିକିସତ୍ିତ ହେଉଛନ୍ତି। ଏଭଳି ଘଟଣା ଦିନକର ନୁହେଁ। ପ୍ରାୟ ୧୫ ଦିନ ହେଲା ଏହି ଅବ୍ୟବସ୍ଥା ଲାଗି ରହିଛି। ସେପଟେ ସରକାରୀ ରେକର୍ଡ କହୁଛି ଜିଲା ମୁଖ୍ୟ ଚିକିତ୍ସାଳୟରେ ୩୦୦ ବେଡ୍ ରହିଛି। ହେଲେ ମାତ୍ର ୧୮୮ ବେଡ୍ କାର୍ଯ୍ୟକ୍ଷମ ରହିଥିବା ଚିକିତ୍ସାଳୟ ସୁୂତ୍ରରୁ ଜଣାପଡିଛି। ବେଡ୍ ସଂଖ୍ୟା କମ ଥିବାରୁ ଜିଲା ମୁଖ୍ୟ ଚିକିତ୍ସାଳୟରେ ରୋଗୀ ହଟହଟା ହୋଇ ଆସୁଛନ୍ତି। ପ୍ରଶ୍ନ ଉଠୁଛି ଯଦି ୩୦୦ ବେଡ୍ ସରକାରୀ ରେକର୍ଡ କହୁଛି ଅବଶିଷ୍ଟ ବେଡ୍ କାହିଁକି ସଚଳ କରାଯାଉନି। ସରକାର ମାତୃ ଓ ଶିଶୁ ଚିକିତ୍ସାଳୟ ଜିଲା ମୁଖ୍ୟ ଚିକିତ୍ସାଳୟରେ ସ୍ଥାପନ କରିଥିଲେ। ମାତୃ ଓ ଶିଶୁ ଚିକିତ୍ସାଳୟରେ ୧୦୦ ଶଯ୍ୟା ରହିବାର ବ୍ୟବସ୍ଥା ଅଛି। ତେବେ ମାତୃ ଓ ଶିଶୁ ଚିକିସତ୍ାଳୟକୁ ଛାଡିଦେଲେ ଜିଲା ମୁଖ୍ୟ ଚିକିସତ୍ାଳୟରେ ମେଡିସିନ ୱାର୍ଡ ଓ ଅନ୍ୟାନ୍ୟ ୱାର୍ଡରେ କ’ଣ ୮୮ଟି ଶଯ୍ୟା ଅଛି। ଏ ନେଇ ତୁରନ୍ତ ପଦକ୍ଷେପ ନେବାକୁ ଦାବି ହୋଇଛି। ଏନେଇ ନୂଆଗଁାର ରମା ମଳିକ ନାମକ ଜଣେ ରୋଗୀଙ୍କ ସମ୍ପର୍କୀୟ କହିଛନ୍ତି, ସ୍ବାସ୍ଥ୍ୟସେବା ଉପରେ ଟିପ୍ପଣୀ ଦେଉନୁ। ତେବେ ନାତି ଟୋକାଟା ପାଇଁ ବେଡ୍ ମଳିଲା ନାହିଁ। ବାରଣ୍ଡାରେ ରହିବାକୁ ପଡୁଛି। କେହି ରୋଗୀ ଗଲେ ବେଡ୍ ମିଳିବ ବୋଲି ଅପେକ୍ଷାରେ ଅଛୁ। ହେଲେ ରୋଗୀ କମିବା ବଦଳରେ ବଢ଼ି ଚାଲିଛନ୍ତି। ଦଶପଲ୍ଲାର ସଦାଶିଷ ସାହୁ କୁହନ୍ତି, ମୋର ଜଣେ ସମ୍ପର୍କୀୟ ମେଡସିନ ୱାର୍ଡରେ ପଡିଛନ୍ତି। ଡାକ୍ତରଖାନାରେ ବେଡ୍ ମିଳୁ ନାହିଁ। ଯେଉଁ ୱାର୍ଡକୁ ଗଲେ ବେଡ୍ ନାହିଁ ଶୁଣିବାକୁ ମିଳୁଛି।
ବେଡ୍ ପାଇଁ ଲବି
ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ବେଡ୍ ପାଇବା ପାଇଁ ଲବି ଚାଲିଛି। ବର୍ଷା ଋତୁ ଯୋଗୁ ରୋଗୀଙ୍କ ସଂଖ୍ୟା ବଢ଼ି ଚାଲିଥିବାବେଳେ ଯେନତେନ ପ୍ରକାରେଣ ବେଡ୍ ପାଇଁ ଉଦ୍ୟମ ହେଉଛି। କିଛି ଲୋକ ଲବିରେ ଧରାଧରି କରି ବେଡ୍ ପାଉଛନ୍ତି। ଅନେକ ଲୋକ ଭାଗ୍ୟକୁ ଆଦରି ବାରଣ୍ଡାରେ ପଡି ରହୁଛନ୍ତି। ଏନେଇ ଭାପୁରର ଗୋପାଳ ସ୍ବାଇଁ କୁହନ୍ତି, ବାରମ୍ବାର ଚେଷ୍ଟା ପରେ ବେଡ୍ ମିଳିଲା ନାହିଁ। ମୋର ଜଣେ ସମ୍ପର୍କୀୟଙ୍କ ହସ୍ତକ୍ଷେପ ପରେ ବେଡ୍ ଟିଏ ମିଳିଲା। ଚିହ୍ନା ଲୋକ ନ ଥିଲେ ବେଡ୍ ମିଳୁ ନାହିଁ।
୧୦୦ ବେଡ୍ ଉଦ୍ଘାଟନ ହେଉନି
୧୦୦ ବେଡ୍ ବିଶିଷ୍ଟ ମୋ ସରକାର ସ୍ବାସ୍ଥ୍ୟକେନ୍ଦ୍ର ଉଦ୍ଘାଟନ ହେଉନି। ପ୍ରାୟ ୪ମାସ ହେଲା ସ୍ବାସ୍ଥ୍ୟକେନ୍ଦ୍ର ଉଦ୍ଘାଟନ ଅପେକ୍ଷାରେ ରହିଛି। ନିକଟରେ ୫-ଟି ସଚିବ ୧୦୦ ବେଡ୍ ବିଶିଷ୍ଟ ମୋ ସରକାର ସ୍ବାସ୍ଥ୍ୟକେନ୍ଦ୍ରକୁ ଅନୁଧ୍ୟାନ ଓ ସମୀକ୍ଷା କରି ଫେରିଛନ୍ତି। ତେବେ ମୁଖ୍ୟମନ୍ତ୍ରୀ ଏହି ସ୍ବାସ୍ଥ୍ୟକେନ୍ଦ୍ରକୁ ଉଦ୍ଘାଟନ କରୁ ନାହାନ୍ତି। ଏନେଇ ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟର ଅଧୀକ୍ଷକ ସୁଧାଂଶୁ ମିଶ୍ର କୁହନ୍ତି, ଜିଲା ମୁଖ୍ୟ ଚିକିତ୍ସାଳୟରେ ୧୮୮ ବେଡ୍ କାର୍ଯ୍ୟକ୍ଷମ ରହିଛି। ପ୍ରତିଦିନ ରୋଗୀ ସଂଖ୍ୟା ବଢ଼ୁଥିବାରୁ ସମସ୍ତଙ୍କୁ ବେଡ୍ ଦେବା ସମ୍ଭବ ହେଉ ନାହିଁ। ଏଣୁ କିଛି ରୋଗୀ ବାରଣ୍ଡାରେ ଚିକିତ୍ସିତ ହେଉଛନ୍ତି। ୧୦୦ ବେଡ୍ ବିଶିଷ୍ଟ ମୋ ସରକାର ସ୍ବାସ୍ଥ୍ୟକେନ୍ଦ୍ର କାର୍ଯ୍ୟକ୍ଷମ ହେଲେ ରୋଗୀ ଠିକରେ ଶଯ୍ୟା ପାଇବେ ବୋଲି ଆଶା କରାଯାଉଛି। ନୟାଗଡ଼ର ସୁଦାମ ମହାପାତ୍ର କୁହନ୍ତି, ୧୦୦ ବେଡ୍ ବିଶିଷ୍ଟ ମୋ ସରକାର ସ୍ବାସ୍ଥ୍ୟକେନ୍ଦ୍ର ଖୁବ୍ଶୀଘ୍ର ଉଦ୍ଘାଟନ ହୋଇପାରେ। ତେବେ ସରକାର ରୋଗୀଙ୍କ ସ୍ବାସ୍ଥ୍ୟକୁ ଗୁରୁତ୍ୱ ଦେଉ ନ ଥିବାର ୧୦୦ ବେଡ୍ ବିଶିଷ୍ଟ ସ୍ବାସ୍ଥ୍ୟକେନ୍ଦ୍ରକୁ ଅନୁଧ୍ୟାନ କଲେ ଜଣାପଡୁଛି।