କେନ୍ଦୁଝର,୩।୧୦ (ନରେଶ ଚନ୍ଦ୍ର ପଟ୍ଟନାୟକ): ହାତୀ ଘଉଡାଇବାକୁ ନେଇ ଉଭୟ କେନ୍ଦୁଝର ଓ ମୟୂରଭଞ୍ଜ ଜିଲା ମଧ୍ୟରେ ତିକ୍ତତା ଚରମ ସୀମାରେ ପହଁଞ୍ଚିଛି। ବିଳମ୍ବିତ ରାତିରେ ୧୮ ଟିକିଆ ହାତୀପଲ ମୟୂରଭଞ୍ଜ ଜିଲାରୁ କେନ୍ଦୁଝର ଜିଲାର ପାଟଣା ରେଞ୍ଜର କେନ୍ଦୁଯୋଡ଼ା ନିକଟରେ ପ୍ରବେଶ କରୁଥିବା ସମୟରେ ହାତୀପଲଙ୍କ ଗତିପଥ ଉପରେ ପାଟଣା ବନ କର୍ମଚାରୀ ନଜର ରଖିଥିଲେ l ତେବେ ହାତୀ ଘଉଡାଇବା ପାଇଁ ମୟୂରଭଞ୍ଜ ପଟୁ ଦୁଇଟି ବୋଲେରୋରେ ଆସିଥିବା ଲୋକଙ୍କ ସହ ପାଟଣା ବନ କର୍ମଚାରୀ ମୁଁହଁମୁହିଁ ହୋଇଥିଲେ। ଲୋକଙ୍କ ଆକ୍ରମଣରେ ପାଟଣା ବନ ବିଭାଗର କର୍ମଚାରୀ ଝା ମହାନ୍ତ ଆହତ ହୋଇଛନ୍ତି l ଖବର ପାଇ ପାଟଣା ପୋଲିସ ପହଁଞ୍ଚି ଘଟଣା ସ୍ଥଳରୁ ୨ ଟି ବୋଲେରୋ ସମେତ ୪ ଜଣଙ୍କୁ ଆଣି ଥାନା ରେ ଅଟକ ରଖିଛି l ତେବେ ବଲେରୋରେ ସରକାରୀ ନାମ ପ୍ଲେଟ ମରା ହୋଇଥିବା ଜଣା ପଡିଛି l ତେବେ ପାଟଣା ଆଇ, ସି ଡି ଏସର ବୋଲେରୋ ରାତିରେ କିପରି ହାତୀ ଘୋଉଡାଇବାକୁ ଯାଇଥିଲା ତାହା ପ୍ରଶ୍ନବାଚୀ ସୃଷ୍ଟି କରିଛି। ପୋଲିସ ଘଟଣାର ଅନୁଧ୍ୟାନ କରୁଛି। ତେବେ ଏନେଇ ଅତିରିକ୍ତ ବନ ସଂରକ୍ଷକ କେନ୍ଦୁଝର ଅଶୋକ ଦାସ କହିଛନ୍ତି, ଏହି ଘଟଣାକୁ ଗୁରୁତର ନିଆଯାଇ ଥାନାରେ ଅଭିଯୋଗ କରାଯାଇଛି। ପୂର୍ବରୁ ଏଭଳି ହାତୀ ପଲଙ୍କୁ ଘଉଡାଇବାକୁ ନେଇ ସୀମାରେ ବିବାଦ ଦେଖାଦେଇ ଆସୁଛି। ଅନ୍ୟ ପକ୍ଷରେ ହାତୀ ପଲ ଉଭୟ ପାର୍ଶରୁ ଘଉଡାଇବା ଫଳରେ ନୟାନ୍ତ ହୋଇ ପଡ଼ୁଥିବା ବେଳେ ଆହତ ହେଉଛନ୍ତି। ଏଣୁ ଏନେଇ ସଚେତନତା ସୃଷ୍ଟି କରିବା ସହ ହାତୀ ମାନଙ୍କ ସୁରକ୍ଷା କରିବାକୁ ଦାବି ହେଉଛି।