ପାଟନା: ସାଧାରଣତଃ ଥାନା ବା ପୋଲିସ ଷ୍ଟେଶନ ଯାଇଥିବା ଲୋକେ ଅସୁବିଧାରେ ପଡି ସେଠାକୁ ଯାଇ ଥାଆନ୍ତି । ବେଳେ ବେଳେ ସେଠି ଅପରାଧି କଥାକୁ ଗୁରୁତ୍ୱ ଦିଆଯାଉଥିବା ବେଳେ ପୀଡ଼ିତଙ୍କୁ ଧ୍ୟାନ ଦିଆଯାଏ ନାହିଁ ବୋଲି ଅଭିଯୋଗ ଆସିଥାଏ । ବିଶେଷ ଭାବେ ଅଧିକାଂଶ ସ୍ଥାନରେ ପୋଲିସ ଉପରେ ସାଧାରଣ ଜନତାଙ୍କ ଭରସା ତୁଟି ଯାଇଥାଏ ବୋଲି କୁହାଯାଏ । ହେଲେ ପାଟନାର ବାଡ ଅନୁମଣ୍ଡଳରେ ଏମିତି ଏକ ଥାନା ରହିଛି ଯାହା ଆଜି ବେଶ ଚର୍ଚ୍ଚିତ । ଏଠାରେ ଉଭୟ ପୀଡ଼ିତ ଓ ଅପରାଧୀ ଉଭୟଙ୍କୁ ସୁସ୍ଥ ସମାଜରେ ବଞ୍ଚିବାର ବାର୍ତ୍ତା ଦିଆଯାଇଥାଏ । ଏହା ହେଉଛି ବାଡର ଏନ୍ଟିପିସି ଥାନା । ଏହାର ପାଚିରିରେ ଲେଖାଯାଇଥିବା ଜ୍ଞାନବର୍ଦ୍ଧକ ପେଣ୍ଟିଂସ୍ ଓ ଥାନାର ସୁସ୍ଥ ପରିବେଶ ପୋଲିସ ନିକଟକୁ ଆସିଥିବା ଲୋକକୁ ନ ଡରାଇ ବରଂ ପୋଲିସର ସହଯୋଗ ସାଧାରଣ ଜନତାଙ୍କୁ ଖୁସି ଦେଇଥାଏ । ଥାନାରେ ପ୍ରବେଶ କରିବା ମାତ୍ରେ ସ୍ୱାମୀ ବିବେକା ନନ୍ଦ, ମହାତ୍ମା ଗାନ୍ଧୀ, ବାବା ସାହେବ ଭୀମରାଓ ଆମ୍ବେଦକରଙ୍କ ଭଳି ମହାପୁରୁଷଙ୍କ ବିଚାର ପଢିବାକୁ ମିଳିବ । ଏହାସହ ସ୍ୱାଧିନତା ସଂଗ୍ରାମରେ ପ୍ରାଣବଳୀ ଦେଇଥିବା ବୀର ଶହୀଦଙ୍କ ଫଟୋଚିତ୍ର । ଥାନାର ପ୍ରଭାରୀ ଅମରଦୀପ କୁମାର କୁହନ୍ତି ସକରାତ୍ମକ ଚିନ୍ତାଧାରା ମଣିଷକୁ ଭଲ ବାଟ ଦେଖାଇଥାଏ । ତେଣୁ ଥାନାକୁ ଆସୁଥିବା ଜନତା ହୁଅନ୍ତୁ ଅବା ପୋଲିସ ଏମାନଙ୍କ ମଧ୍ୟରେ ସକରାତ୍ମକ ଚିନ୍ତାଧାରା ସୃଷ୍ଟି କରିବାକୁ ପାଚିରିରେ ଏଭଳି ପେଣ୍ଟିଂ କରାଯାଇଛି । ସେ କହିଛନ୍ତି ଯଦିଓ କେହି ଅପରାଧୀ ଏହି ଥାନାକୁ ଆସିଥାଆନ୍ତି ତେବେ ତାଙ୍କୁ ଏହି ସକରାତ୍ମକ ବାର୍ତ୍ତା ପଢାଯାଇଥାଏ । ଫଳରେ ସେ ତାଙ୍କ ଆଚରଣରେ ସୁଧାର ଆଣିପାରିବେ । ଏଥିରେ ପରିବେଶ ସଂରକ୍ଷଣ ଓ ମଦ ନିବାରଣ ସମ୍ପର୍କରେ ମଧ୍ୟ ବାର୍ତ୍ତା ଦିଆଯାଇଛି । ଏହାକୁ ପାଟନା ଆର୍ଟ ଅଫ୍ କଲେଜର ଛାତ୍ରୀଛାତ୍ରମାନେ କରିଛନ୍ତି । ଏଠାରେ ରୋଷେଇକୁ ସୀତା ରୋଷେଇ ବୋଲି ନାମ ଦିଆଯାଇଛି ।