ବ୍ରହ୍ମପୁର ଅଫିସ,୯ା୬: ଗଞ୍ଜାମ ଟାଇଗର ନଂ. ୨ ସୂର୍ଯ୍ୟ ନାରାୟଣ ପାତ୍ର ଶାସକ ଦଳ ରାଜନୀତିରେ ଷଡ଼ଯନ୍ତ୍ରର ଶିକାର ହୋଇଥିବା ବିଭିନ୍ନ ମହଲ ଆଲୋଚନା କରୁଛନ୍ତି। ସୂଚନାଯୋଗ୍ୟ ଏହି ଜିଲାର ବରିଷ୍ଠ ରାଜନେତା ସ୍ବର୍ଗତ ରାମକୃଷ୍ଣ ପଟ୍ଟନାୟକଙ୍କୁ ଗଞ୍ଜାମ ଟାଇଗର କୁହାଯାଉଥିଲା। ସେ ବହୁବାର କୋଦଳା ନିର୍ବାଚନମଣ୍ଡଳୀରୁ ବିଧାୟକ ହେବା ସହ ବିଜୁ ବାବୁଙ୍କ ଜନତା ଦଳ ଏବଂ ନବୀନ ପଟ୍ଟନାୟକଙ୍କ ସରକାରରେ କ୍ୟାବିନେଟ ମନ୍ତ୍ରୀ ହୋଇ ଅର୍ଥ ଭଳି ଗୁରୁତ୍ୱପୂର୍ଣ୍ଣ ବିଭାଗ ସମ୍ଭାଳିଥିଲେ। ୨୦୦୨ରୁ ସେ ବିଜେଡି ଛାଡ଼ିଥିଲେ। ପ୍ରଥମେ କଂଗ୍ରେସ ଓ ପରେ ଭାଜପାରେ ସାମିଲ ହୋଇଥିଲେ। ଦଳ ବଦଳ ପରେ ଦୁଇ ଦଶନ୍ଧି ହେବ କ୍ଷମତାଚ୍ୟୁତ ହେବାରୁ ତାଙ୍କ ଗର୍ଜନ ଶୁଭିନଥିଲା। ପରବର୍ତ୍ତୀ ପର୍ଯ୍ୟାୟରେ ସୂର୍ଯ୍ୟଙ୍କ ରାଜନୈତିକ ଦବ୍ଦବା ଜିଲାରେ ଆରମ୍ଭ ହୋଇଥିଲା। ତେଣୁ ତାଙ୍କୁ ଗଞ୍ଜାମ ଟାଇଗର ନଂ. ୨ ଭାବେ ପରିଚିତ କରିଥିଲା।
ସୂର୍ଯ୍ୟ ଛାତ୍ର ଜୀବନରେ ପ୍ରଥମେ ତତ୍କାଳୀନ ଜନ ସଂଘର ସମର୍ଥକ ଥିଲେ। ପରେ ଅଣ କଂଗ୍ରେସ ରାଜନୀତିରେ ପ୍ରତିଷ୍ଠିତ ହୋଇଥିଲେ। ବ୍ରହ୍ମପୁର ପୌରସଂସ୍ଥାର କାଉନସିଲର ଭାବେ ନିର୍ବାଚିତ ହୋଇ ସକ୍ରିୟ ରାଜନୀତିକୁ ଆସିଥିଲେ। ୧୯୮୪, ୧୯୮୯ ଲୋକ ସଭା ନିର୍ବାଚନରେ ବ୍ରହ୍ମପୁର ଆସନରୁ ଜନତା ପାର୍ଟିରୁ ପ୍ରତିଦ୍ୱନ୍ଦ୍ୱିତା କରି କଂଗ୍ରେସ ପ୍ରତିଦ୍ୱନ୍ଦ୍ୱୀଙ୍କଠାରୁ ପରାସ୍ତ ହୋଇଥିଲେ। ୧୯୯୦ ବିଧାନସଭା ନିର୍ବାଚନରେ ମୋହନା କ୍ଷେତ୍ରରୁ ଜନତା ଦଳରୁ ବିଧାୟକ ହୋଇଥିଲେ। ବିଧାୟକ ଥାଇ ୧୯୯୧ ଲୋକସଭା ନିର୍ବାଚନରେ ପୁଣି ଜନତା ଦଳରୁ ବ୍ରହ୍ମପୁର କ୍ଷେତ୍ରରୁ ହାରିଥିଲେ। ବିଜୁବାବୁଙ୍କ ଶୁଭ ଦୃଷ୍ଟି ଥିବାରୁ ୧୯୯୨ରେ ପ୍ରଥମେ ଜନତା ଦଳ ସରକାରରେ ରାଷ୍ଟ୍ରମନ୍ତ୍ରୀ ପଦ ପାଇଥିଲେ। ୧୯୯୫ ବିଧାନସଭା ନିର୍ବାଚନରେ ସେ ମୋହନାରୁ ଦ୍ୱିତୀୟଥର ନିର୍ବାଚିତ ହୋଇଥିଲେ।
ପରବର୍ତ୍ତୀ ୨୦୦୦ ରୁ ୨୦୧୯ ମଧ୍ୟରେ ହୋଇଥିବା ୫ ବିଧାନସଭା ନିର୍ବାଚନରେ ପାତ୍ର ଲଗାତର ଭାବେ ମୋହନାରୁ ଆଉ ୨ ଥର ଏବଂ ସୀମା ନିର୍ଦ୍ଧାରଣ ଓ ନିର୍ବାଚନମଣ୍ଡଳୀ ପୁନର୍ଗଠନ ପ୍ରକ୍ରିୟାରେ ନୂଆ ନିର୍ବାଚନ ମଣ୍ଡଳୀ ଦିଗପହଣ୍ଡି ଗଠନ ହେବାରୁ ସବୁ ନିର୍ବାଚନରେ ବିଜେଡିରୁ ନିର୍ବାଚିତ ହୋଇଥିଲେ। ନବୀନଙ୍କ ଚତୁର୍ଥ ପାଳି ସରକାର ପର୍ଯ୍ୟନ୍ତ ସେ କ୍ୟାବିନେଟ ମନ୍ତ୍ରୀ ହୋଇ ଅନେକ ଗୁରୁତ୍ୱପୂର୍ଣ୍ଣ ବିଭାଗ ପାଇଥିଲେ। ୨୦୧୪ ନିର୍ବାଚନରେ ସେ ୩ ବର୍ଷ ମନ୍ତ୍ରୀ ହୋଇ ନ ଥିଲେ ମଧ୍ୟ ଦଳର ସଂଗଠନରେ ମୁଖ୍ୟ ଭୂମିକା ନେଉଥିଲେ। ୨୦୧୭ ପଞ୍ଚାୟତ ନିର୍ବାଚନ ପୂର୍ବରୁ ତାଙ୍କୁ ନବୀନ ପୁଣି ମନ୍ତ୍ରୀ ପରିଷଦରେ ସାମିଲ କରିଥିଲେ। ପଞ୍ଚମ ପାଳି ଶାସନରେ ସୂର୍ଯ୍ୟଙ୍କୁ ମନ୍ତ୍ରୀ ନ କରି ସାମ୍ବିଧାନିକ ପଦ ବିଧାନସଭା ବାଚସ୍ପତି କରାଯାଇଥିଲା। ଗତ ସପ୍ତାହରେ ମନ୍ତ୍ରୀ ପରିଷଦ ପୁନର୍ଗଠନ ପାଇଁ ସବୁ ମନ୍ତ୍ରୀ ଇସ୍ତଫା ଦେଇଥିଲେ। ବାଚସ୍ପତିଙ୍କୁ ମଧ୍ୟ ଇସ୍ତଫା ଦେବାକୁ କୁହାଯାଉଥିବା ପ୍ରଚାର ହେଲା। ସେ ମଧ୍ୟ କାଳ ବିଳମ୍ବ ନ କରି ପଦରୁ ଇସ୍ତଫା ଦେଲେ ।
ସାମ୍ବିଧାନିକ ଓ ମର୍ଯ୍ୟାଦାପୂର୍ଣ୍ଣ ବାଚସ୍ପତି ପଦରୁ ପାତ୍ରଙ୍କ ଅଚାନକ ଇସ୍ତଫା ରାଜନୈତିକ ସଚେତନ ଜିଲା ଗଞ୍ଜାମରେ ଭିନ୍ନ ଭିନ୍ନ ଆଲୋଚନା ଚାଲିଛି। କାଳେ ପୁଣି ମନ୍ତ୍ରୀ ହେବା ଆଶା ରଖି ପଦ ଛାଡ଼ିଥିବା କେତେକ କହୁଥିବା ବେଳେ କୌଣସି ବଡ଼ କାରଣରୁ ବିଜେଡି ପକ୍ଷରୁ ଇସ୍ତଫା ଦେବାକୁ ବାଧ୍ୟ କରାଯାଇଥିବା ଆଉ କେତେକ ମତପ୍ରକାଶ କରିଛନ୍ତି। ତେବେ ଅସଲ କାରଣ ପଦାକୁ ନ ଆସି ଅସ୍ପଷ୍ଟ ରହିଛି। ୨୦୨୪ ନିର୍ବାଚନ ନିକଟତର ହୋଇଛି ଏବଂ ବିଜେଡି ମଧ୍ୟ ନୂଆ ରଣନୀତି ଆରମ୍ଭ କରି ଦେଇଛି। ଏଭଳି ସ୍ଥିତିରେ ପାତ୍ର ଦଳୀୟ ଷଡ଼ଯନ୍ତ୍ରର ଶିକାର ହୋଇଥିବା ଓ ପଦ ଛାଡ଼ିଥିବା ଆଲୋଚନା ପରିସରକୁ ଆସିଛି। ଜିଲାର ଜଣେ ବରିଷ୍ଠ ରାଜେନେତା ତଥା ପୂର୍ବତନ ବାଚସ୍ପତି ଚିନ୍ତାମଣି ଦ୍ୟାନ ସାମନ୍ତରା ସୂର୍ଯ୍ୟ ତରବରିଆ ଭାବେ ଇସ୍ତଫା ଦେବା ତାଙ୍କ ଭୁଲ ନିଷ୍ପତ୍ତି ହୋଇଥିବା ଆଲୋଚନା ପ୍ରସଙ୍ଗରେ ସୂଚାଇଛନ୍ତି। ମନ୍ତ୍ରୀ ହେବାକୁ ଆଶା ରଖି କରିଥାଇ ପାରନ୍ତି ବୋଲି ଅନୁମାନ କରିଛନ୍ତି। ଯଦି ବିଜେଡି ନିର୍ଦ୍ଦେଶରେ ସେ ଇସ୍ତଫା ଦେଇନଥାନ୍ତେ ତେବେ ବାଚସ୍ପତିଙ୍କ ବିରୋଧରେ ଅନାସ୍ଥା ଆଣିବା ସହଜ ନୁହେଁ ବୋଲି ଚିନ୍ତାମଣି ଦର୍ଶାଇଛନ୍ତି। ଏଭଳି ନୂଆ ଘଟଣା କାହିଁକି ଘଟିଲା ତାହା ନିଜେ ପାତ୍ର ଓ ତାଙ୍କ ଦଳ ସର୍ବସାଧାରଣରେ ପ୍ରକାଶ କରିବା ନିହାତି ଆବଶ୍ୟକ ବୋଲି ଦ୍ୟାନ ସାମନ୍ତରା ଦର୍ଶାଇଛନ୍ତି।