ପଟ୍ଟାମୁଣ୍ଡାଇ,୧୯ା୧୨(ସ୍ବ.ପ୍ର.): ପଟ୍ଟାମୁଣ୍ଡାଇକୁ ୧୯୮୮ ଡିସେମ୍ବର ୬ରେ ଏନ୍ଏସିର ମାନ୍ୟତା ମିଳିଥିଲା। ପଟ୍ଟାମୁଣ୍ଡାଇ, କଷଣଅଣ୍ଟା, ମାଟିଆ, ବାଲିପାଟଣା, ନୀଳକଣ୍ଠପୁର ପଞ୍ଚାୟତକୁ ନେଇ ଏନ୍ଏସି ଘୋଷଣା ହୋଇଥିଲା। ବିଜ୍ଞାପିତ ଅଞ୍ଚଳର ସୁବିଧା ସୁଯୋଗ ଲୋକଙ୍କୁ ଯୋଗାଇ ଦେବାକୁ ଲକ୍ଷ୍ୟ ରହିଥିଲା। ବିଜ୍ଞାପିତ ପରିଷଦର ପ୍ରଥମ ଅଧ୍ୟକ୍ଷ ଭାବେ ପ୍ରତ୍ୟକ୍ଷ ନିର୍ବାଚନରେ ରବୀନ୍ଦ୍ର ମହାନ୍ତି ବିଜୟ ହୋଇଥିଲେ। ହେଲେ ଅଞ୍ଚଳର କୌଣସି ଆଖିଦୃଶିଆ କାର୍ଯ୍ୟ ହୋଇପାରି ନ ଥିଲା। ବିଜ୍ଞାପିତ ପରିଷଦ ପକ୍ଷରୁ କିଣା ଯାଇଥିବା ଦୁଇ ବସ୍ ରାସ୍ତାକଡ଼ରେ ପଡି ଖତ ଖାଇଥିଲା। ଅକ୍ଟ୍ରାଇ ଟିକସ ଆଦାୟକୁ ନେଇ ମଧ୍ୟ ଏନ୍ଏସି ବେଶ୍ ବଦ୍ନାମ ମୁଣ୍ଡାଇ ଥିଲା। ୨୦୧୪ ଫେବୃୟାରୀ ୨୪ଠାରୁ ପଟ୍ଟାମୁଣ୍ଡାଇ ଏନ୍ଏସିକୁ ରାଜ୍ୟ ସରକାର ମ୍ୟୁନିସିପାଲିଟିର ମାନ୍ୟତା ପ୍ରଦାନ କରିଥିଲେ। ବର୍ତ୍ତମାନ ଏହାର ଜନସଂଖ୍ୟା ୪୪,୫୨୮ ଥିବାବେଳେ ୨୦ଟି ୱାର୍ଡ ରହିଛି। ଜନସଂଖ୍ୟା ବୃଦ୍ଧିକୁ ଆଖି ଆଗରେ ରଖି ୱାର୍ଡ ପୁନଃ ଗଠନ ପ୍ରକ୍ରିୟା ଆରମ୍ଭ ହୋଇଥିଲେ ହେଁ ଏହା କାର୍ଯ୍ୟକାରୀ ହୋଇନାହିଁ। ପଟ୍ଟାମୁଣ୍ଡାଇ ସହରାଞ୍ଚଳର ଲୋକ ବିଭିନ୍ନ ମୌଳିକ ସୁବିଧାରୁ ବଞ୍ଚତ୍ତ ହେଉଛନ୍ତି। ସମସ୍ୟା ମଧ୍ୟରେ ପାଣି ନିଷ୍କାସନ, ଗମନାଗମନ, ସ୍ବାସ୍ଥ୍ୟ, ପାନୀୟଜଳ, ବଜାର, ଟ୍ରାଫିକ ସମସ୍ୟା ସମେତ ପାଠାଗାର ପ୍ରତିଷ୍ଠା, ଆମୋଦ ପ୍ରମୋଦ ପାଇଁ ଉଦ୍ୟାନ, ସାଂସ୍କୃତିକ କାର୍ଯ୍ୟକ୍ରମ ଲାଗି ମଣ୍ଡପ, ସଭା ସମିତି ପାଇଁ ସଭାଗୃହର ଅଭାବ ସହରବାସୀଙ୍କ ନିମନ୍ତେ ରହିଛି।
ରାଜ୍ୟ ସରକାରଙ୍କ ନଗର ଉନ୍ନୟନ ବିଭାଗ ପକ୍ଷରୁ ପାର୍କ ନିର୍ମାଣ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା। ତାହା କାଗଜକଲମରେ ସୀମିତ ରହିଛି। ସେହିପରି ନିର୍ମାଣ କରାଯାଇଥିବା କଲ୍ୟାଣ ମଣ୍ଡପ ଅଦ୍ୟାବଧି ଲୋକଙ୍କ କାମରେ ଲାଗି ପାରିନାହିଁ। ଅଞ୍ଚଳର ଅନ୍ୟ ମୁଖ୍ୟ ସମସ୍ୟା ମଧ୍ୟରେ ଟ୍ରାଫିକ ଗୁରୁତର ହୋଇପଡିଛି। ବୁଲା ଗୋରୁ, ଛେଳିମେଣ୍ଢା, ଟ୍ରାଫିକ ଜାମ୍ର ପ୍ରମୁଖ କାରଣ ପାଲଟିଛନ୍ତି। ସେହିପରି ସହରାଞ୍ଚଳର ନିର୍ଦ୍ଧାରିତ ସ୍ଥାନରେ ଭେଣ୍ଡିଂଜୋନ ଖୋଲା ଯାଇନାହିଁ। ବର୍ଷାଦିନେ ସହରାଞ୍ଚଳର ବହୁ ସ୍ଥାନ ଜଳାର୍ଣ୍ଣବ ହୋଇପଡୁଛି। ପାଣି ନିଷ୍କାସନ ପାଇଁ ଡ୍ରେନେଜ ସିଷ୍ଟମକୁ ଅଦ୍ୟାବଧି ସଜଡ଼ା ଯାଇପାରୁନାହିଁ। ଅଡିଟୋରିୟମ କାର୍ଯ୍ୟ ଧିମା ଗତିରେ ଚାଲିଛି। ସହରରେ ପାଠାଗାରଟିଏ ମଧ୍ୟ ନାହିଁ। ବହୁ କୋଟି ଟଙ୍କା ଖର୍ଚ୍ଚରେ ନିର୍ମାଣ ହୋଇଥିବା ୱାଟର ଟ୍ରିଟ୍ମେଣ୍ଟ ପ୍ଲାଣ୍ଟ ଲୋକଙ୍କ କାର୍ଯ୍ୟରେ ଲାଗିପାରୁନାହିଁ। ପୌରାଞ୍ଚଳର ସାହି, ବସ୍ତିରେ ରାସ୍ତା ଶୋଚନୀୟ ହୋଇପଡିଛି। ଫଳରେ ଗମନାଗମନରେ ଅସୁବିଧା ହେଉଛି। ପୌରାଞ୍ଚଳରେ ଆଲୋକୀକରଣ ବ୍ୟବସ୍ଥା ସଜାଡ଼ିବାକୁ କିଣା ଯାଇଥିବା ଗାଡ଼ି ଏବେ ବିଦ୍ୟୁତ୍ ବିଭାଗରେ ପଡ଼ି ଖତ ଖାଉଛି। ସହରବାସୀ ରାତ୍ରିରେ ଷ୍ଟ୍ରିଟ ଲାଇଟ୍ ପାଇବାରୁ ବଞ୍ଚତ୍ତ ହେଉଛନ୍ତି। ନାଳ ନର୍ଦ୍ଦମାରେ ମଶା ତେଲ ପଡୁନାହିଁ। ଫଳରେ ମଶାଙ୍କ ପ୍ରାଦୁର୍ଭାବ ବଢ଼ି ଚାଲିଛି। ଏ ସମ୍ପର୍କରେ ପୌରନିର୍ବାହୀ ଅଧିକାରୀ ସମ୍ପଦ ସ୍ବାଇଁଙ୍କୁ ପଚାରିବାରୁ କିଛିଦିନରେ ସମସ୍ତ କାମ ଶେଷ କରାଯିବ ବୋଲି ସେ କହିଛନ୍ତି।