ନୂଆଦିଲ୍ଲୀ, ୧୨।୬: ଟିଡିପି ନେତା ଏନ ଚନ୍ଦ୍ରବାବୁ ନାଇଡୁ ବୁଧବାର ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ଚନ୍ଦ୍ରବାବୁଙ୍କ ସହ ତାଙ୍କ କ୍ୟାବିନେଟର ଅନେକ ସଦସ୍ୟ ମଧ୍ୟ ମନ୍ତ୍ରୀ ଭାବରେ ଶପଥ ନେଇଛନ୍ତି। ଏହି ଶପଥ ଗ୍ରହଣ ସମାରୋହରେ ପ୍ରଧାନମନ୍ତ୍ରୀ ମୋଦି ଯୋଗ ଦେଇଥିଲେ। ଏହି ଅବସରରେ ଦକ୍ଷିଣୀ ସୁପରଷ୍ଟାର ପୱନ କଲ୍ୟାଣ ମଧ୍ୟ ଶପଥ ଗ୍ରହଣ କରିଛନ୍ତି।
ପୱନ କଲ୍ୟାଣ ହେଉଛନ୍ତି ଜନସେନା ପାର୍ଟିର ପ୍ରତିଷ୍ଠାତା। ସେ ପିଥାପୁରମ ବିଧାନସଭା ଆସନରୁ ବିଧାୟକ ଭାବରେ ର୍ନିବାଚିତ ହୋଇଛନ୍ତି। ସେ ନାଇଡୁ କ୍ୟାବିନେଟରେ ଉପ-ମୁଖ୍ୟମନ୍ତ୍ରୀ ହେବେ। ଚନ୍ଦ୍ରବାବୁ ନାଇଡୁଙ୍କ ପରେ ଶପଥ ଗ୍ରହଣ କରିଥିବା ପୱନ କଲ୍ୟାଣ ପ୍ରଥମେ ମଞ୍ଚରେ ଉପସ୍ଥିତ ଥିବା ସମସ୍ତଙ୍କୁ ଅଭିବାଦନ ଜଣାଇଥିଲେ। ଏମିତି କି ସେ ପ୍ରଧାନମନ୍ତ୍ରୀଙ୍କୁ ହାତ ଯୋଡ଼ି ନମସ୍କାର କରିଥିଲେ । ତା’ପରେ ସେ ଫେରି ଆସି ଜଣେ ବ୍ୟକ୍ତିଙ୍କ ପାଦ ଛୁଇଁଥିଲେ । ଏହି ବ୍ୟକ୍ତି ତାଙ୍କ ବଡ଼ ଭାଇ ତଥା ମେଗା ଷ୍ଟାର ଚିରଞ୍ଜୀବୀ ।
ପୱନ କଲ୍ୟାଣଙ୍କ ଭାଇ ମେଗାଷ୍ଟାର ଚିରଞ୍ଜୀବୀ ଏବଂ କୋନିଡେଲା ନାଗେନ୍ଦ୍ରବାବୁ ମଧ୍ୟ ଚଳଚ୍ଚିତ୍ର ଅଭିନେତା। ପୱାନ ତାଙ୍କର ଚଳଚ୍ଚିତ୍ର ଯାତ୍ରା ୧୯୯୬ରେ ଆରମ୍ଭ କରିଥିଲେ । ତେଲୁଗୁ ବ୍ୟତୀତ ସେ ଅନ୍ୟାନ୍ୟ ଭାଷାରେ ସୁପର ହିଟ ଫିଲ୍ମ ମଧ୍ୟ ଦେଇଛନ୍ତି। ପୱାନ ୨୦୦୮ରେ ରାଜନୀତିରେ ପ୍ରବେଶ କରିଥିଲେ। ସେ ତାଙ୍କ ଭାଇ ଚିରଞ୍ଜୀବୀଙ୍କ ଦ୍ୱାରା ପ୍ରତିଷ୍ଠିତ ପ୍ରଜା ରାଜ୍ୟମ୍ ପାର୍ଟିର ଯୁବ ୱିଙ୍ଗର ସଭାପତି ଭାବରେ କାର୍ଯ୍ୟ କରିଥିଲେ। ପରେ ୨୦୧୪ରେ ସେ ଜନସେନା ପାର୍ଟିର ସ୍ଥାପନ କରିଥିଲେ ।
ଦୁଇଥର ବିଧାନସଭା ନିର୍ବାଟନରେ ଲଢ଼ି ସେ ପରାଜିତ ହୋଇଛନ୍ତି । ତଥାପି ସେ ରାଜନୀତି ଛାଡ଼ିନଥିଲେ। ୧୦ ବର୍ଷ ଧରି ନିରନ୍ତର କାର୍ଯ୍ୟ କରିବା ପରେ ସେ ସଫଳତା ପାଇଛନ୍ତି । ତୃତୟୀଥର ବିଧାନସଭା ନିର୍ବାଚନ ଲଢ଼ି ସେ ବହୁମତରେ ବିଜୟୀ ହୋଇଛନ୍ତି । ଏଥିସହିତ ତାଙ୍କ ଦଳ ମଧ୍ୟ ଶହେ ପ୍ରତିଶତ ନିର୍ବାଚନ ଜିତିଛି । ଭାଜପା ଏବଂ ଟିଡିପି ସହିତ ମେଣ୍ଟ କରି ଦଳ ୨୧ ଆସନରେ ପ୍ରାର୍ଥୀ ଦେଇଥିଲା । ଦଳ ସମସ୍ତ ଆସନରେ ଜିତି ଚର୍ଚ୍ଚାକୁ ଆସିଛି ।