ମୁମ୍ବାଇ,୪ା୫: ଜାତୀୟତାବାଦୀ କଂଗ୍ରେସ ପାର୍ଟି (ଏନ୍ସିପି) ଅଧ୍ୟକ୍ଷ ପଦରୁ ଇସ୍ତଫା ଘୋଷଣା କରିଥିବା ବର୍ଷୀୟାନ୍ ରାଜନେତା ଶରଦ ପାଓ୍ବାର ନିଜ ନିଷ୍ପତ୍ତିରେ ଅଟଳ ରହିଛନ୍ତି। ପାଓ୍ବାର ଦୁଇ ତିନିଦିନ ମଧ୍ୟରେ ନିଷ୍ପତ୍ତିର ପୁନର୍ବିଚାର କରିବେ ବୋଲି ତାଙ୍କ ପୁତୁରା ତଥା ମହାରାଷ୍ଟ୍ର ବିଧାନସଭାର ବିରୋଧୀ ଦଳ ନେତା ଅଜିତ ପାଓ୍ବାର ଗଣମାଧ୍ୟମକୁ ଜଣାଇଥିଲେ। କିନ୍ତୁ ମହାରାଷ୍ଟ୍ର ଷ୍ଟ୍ରଙ୍ଗ୍ମ୍ୟାନ୍ ପାଓ୍ବାର ଦଳର ଅଧ୍ୟକ୍ଷ ପଦ ଛାଡ଼ିବା ନିଷ୍ପତ୍ତି ବଦଳାଇବାକୁ ରାଜି ନ ଥିବା ସୂତ୍ରରୁ ଜଣାପଡ଼ିଛି।
ମହାରାଷ୍ଟ୍ର ରାଜନୀତିର ଚାଣକ୍ୟ ଭାବେ ପରିଚିତ ତଥା ମହାବିକାଶ ଅଘାଡ଼ି (ଏମ୍ଭିଏ) ସ୍ଥପତି ଶରଦ ପାଓ୍ବାର ମଙ୍ଗଳବାର ମୁମ୍ବାଇରେ ନିଜ ମରାଠୀ ଆମତ୍ଜୀବନୀ ‘ଲୋକ୍ ମାଝେ ସଙ୍ଗତି’ (ମୋ ସାଥିରେ ଲୋକେ)ର ନୂଆ ସଂସ୍କରଣ ଉନ୍ମୋଚନ ଅବସରରେ ଏନ୍ସିପି ଅଧ୍ୟକ୍ଷ ପଦ ଛାଡ଼ିବା ନେଇ ଘୋଷଣା କରିବା ପରଠୁ ଜାତୀୟ ରାଜନୀତି ଚଳଚଞ୍ଚଳ ହୋଇଛି। ତାଙ୍କ ଉତ୍ତରାଧିକାରୀ ଚୟନକୁ ନେଇ କଳ୍ପନାଜଳ୍ପନା ଲାଗି ରହିଥିବାବେଳେ ଝିଅ ତଥା ବାରାମତୀ ଏମ୍ପି ସୁପ୍ରିୟା ସୁଲେଙ୍କୁ ଦଳର ନୂଆ ଅଧ୍ୟକ୍ଷା କରାଯିବା ଚର୍ଚ୍ଚା ଜୋର୍ ଧରିଛି। ସେହିପରି ଅଜିତଙ୍କୁ ମହାରାଷ୍ଟ୍ର ଏନ୍ସିପି ସଭାପତି ପଦ ଦିଆଯାଇପାରେ। ଅଜିତଙ୍କୁ ଦଳର ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ମଧ୍ୟ ଉପସ୍ଥାପନ କରାଯାଇପାରେ। ତେବେ ଏନେଇ କିଛି ନିଷ୍ପତ୍ତି ହୋଇନାହିଁ। ଦଳୀୟ କର୍ମୀ ପାଓ୍ବାରଙ୍କ ନିଷ୍ପତ୍ତି ପରିବର୍ତ୍ତନ ଅପେକ୍ଷାରେ ରହିଥିବା ନେତା ଅନିଲ ପାଟିଲ କହିଛନ୍ତି। ବରିଷ୍ଠ ନେତା ଛଗନ ଭୁଜବଳ କହିଛନ୍ତି, ସାଂସଦ ଭାବେ ସୁପ୍ରିୟାଙ୍କ ପ୍ରଦର୍ଶନ ଭଲ ରହିଛି। ତାଙ୍କୁ ଏନ୍ସିପି ମଙ୍ଗ ଧରାଇଲେ କିଛି ଅସୁବିଧା ନାହିଁ। ଅଜିତ ରାଜ୍ୟର ଦାୟିତ୍ୱ ସମ୍ଭାଳିବା ଉଚିତ। ଇତିମଧ୍ୟରେ ପାଓ୍ବାରଙ୍କ ନିଷ୍ପତ୍ତିକୁ ନେଇ କ୍ଷୁବ୍ଧ ଠାଣେ ବିଧାୟକ ଜିତେନ୍ଦ୍ର ଆହ୍ବାଡ଼ ଏନ୍ସିପି ସାଧାରଣ ସମ୍ପାଦକ ପଦରୁ ଇସ୍ତଫା ଦେଇଛନ୍ତି। ଅଧ୍ୟକ୍ଷ ପଦ ପାଇଁ ପୂର୍ବତନ କେନ୍ଦ୍ରମନ୍ତ୍ରୀ ପ୍ରଫୁଲ୍ଲ ପଟେଲଙ୍କ ନାମକୁ ନେଇ ମଧ୍ୟ ଚର୍ଚ୍ଚା ହେଉଛି। କିନ୍ତୁ ପ୍ରଫୁଲ୍ଲ ଦଳର ମଙ୍ଗ ଧରିବା ପାଇଁ ଆଗ୍ରହୀ ନ ଥିବା କହିଛନ୍ତି।
ଏନ୍ସିପି ସହ ମେଣ୍ଟ ଚାହିଁଥିଲେ ମୋଦି, ବାଜପେୟୀ
୨୦୧୯ ଲୋକ ସଭା ନିର୍ବାଚନ ପରେ ଏନ୍ସିପି ସହ ଭାଜପା ମେଣ୍ଟ କରିବାକୁ ଚାହୁଁଥିଲା। କିନ୍ତୁ ଗୈରିକ ଦଳ ସହ କୌଣସି ପ୍ରକାର ମେଣ୍ଟ ସମ୍ଭବ ନୁହେଁ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏନ୍ସିପି ମୁଖ୍ୟ ଶରଦ ପାଓ୍ବାର ସ୍ପଷ୍ଟ ମନା କରିଦେଇଥିଲେ। ୨୦୧୫ ମସିହା ପରବର୍ତ୍ତୀ ରାଜନୈତିକ ଘଟଣାକ୍ରମକୁ ନେଇ ଲିଖିତ ନିଜ ଆମତ୍ଜୀବନୀ ‘ଲୋକ ମାଝେ ସଙ୍ଗତି’ରେ ପାଓ୍ବାର ଏହାର ଅବତାରଣା କରିଛନ୍ତି। ତେବେ ୨୦୧୯ ମହାରାଷ୍ଟ୍ର ବିଧାନସଭା ନିର୍ବାଚନ ପରେ ସରକାର ଗଠନ ନେଇ ଅନିଶ୍ଚିତତା ଲାଗିରହିବାରୁ ରାଜ୍ୟରେ ଭାଜପା ସହ ମେଣ୍ଟ ଆଲୋଚନା ଚାଲିଥିବା ନେଇ ସେ ସ୍ବୀକାର କରିଛନ୍ତି। ପାଓ୍ବାର କହିଛନ୍ତି, ସରକାର ଗଢ଼ିବାକୁ ଏନ୍ସିପି ସେତେଟା ଆଗ୍ରହୀ ନ ଥିବାରୁ ଭାଜପା ସହ ମେଣ୍ଟ କରି ନ ଥିଲା। ଭାଜପାକୁ ଏହି ବିଷୟ ସ୍ପଷ୍ଟ ଭାବେ ଜଣାଇବା ଆବଶ୍ୟକ ଥିବାରୁ ପାଓ୍ବାର ୨୦୧୯ ନଭେମ୍ବରରେ ପାର୍ଲାମେଣ୍ଟର ଶୀତ ଅଧିବେଶନ ବେଳେ ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଥିଲେ। ୨୦୧୪ରେ ମଧ୍ୟ ଭାଜପା ପକ୍ଷରୁ ଏନ୍ସିପି ଶିବିର ସହ ମେଣ୍ଟ ପାଇଁ ପ୍ରୟାସ କରାଯାଇଥିଲା। ଏହା ପୂର୍ବରୁ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ମଧ୍ୟ ଏନ୍ସିପି ସହ ମେଣ୍ଟ ଚାହିଁଥିଲେ ବୋଲି ପାଓ୍ବାର ନିଜ ଆମତ୍ଜୀବନୀରେ ଉଲ୍ଲେଖ କରିଛନ୍ତି।