ଶ୍ରୀନଗର,୧୭।୨:ପ୍ରଧାନମନ୍ତ୍ରୀ ପ୍ୟାକେଜ୍ରେ ନିଯୁକ୍ତି ପାଇଥିବା କଶ୍ମୀରୀ ପଣ୍ଡିତ କର୍ମଚାରୀମାନେ ଶିବରାତ୍ରି ପୂର୍ବରୁ ସେମାନଙ୍କ ବକେୟା ବେତନ ପ୍ରଦାନ କରିବା ସହ ସୁରକ୍ଷାଗତ କାରଣରୁ କଶ୍ମୀର ଫେରିବା ପାଇଁ ବାଧ୍ୟ ନ କରିବାକୁ ଦାବି କରିଛନ୍ତି। ଗତ କିଛି ମାସ ହେଲା କଶ୍ମୀରୀ ପଣ୍ଡିତ କର୍ମଚାରୀମାନଙ୍କୁ ବେତନ ପୈଠ କରାଯାଇ ନ ଥିବା କଶ୍ମୀରର ପ୍ରବାସୀ ବିସ୍ଥାପିତ କର୍ମଚାରୀ ସଂଘର ଅଧ୍ୟକ୍ଷ ରୁବନ ସାପ୍ରୁ କହିଛନ୍ତି। ବକେୟା ବେତନ ପୈଠ ଲାଗି ସରକାର କୌଣସି ସର୍ତ୍ତ ରଖିବା ଉଚିତ ନୁହେଁ। ସମସ୍ତ ପିଏମ୍ ପ୍ୟାକେଜ୍ କର୍ମଚାରୀ ଯେପରି ବେତନ ପାଇ ସେମାନଙ୍କ ସଂସ୍କୃତି ଓ ଧର୍ମୀୟ ପରାମ୍ପରାର ପର୍ବ ମହାଶିବରାତ୍ରି ପାଳନ କରିପାରିବେ, ପ୍ରଶାସନ ତାହା ସୁନିଶ୍ଚିତ କରୁ ବୋଲି ସାପ୍ରୁ କହିଛନ୍ତି।
ସୂଚନାଯୋଗ୍ୟ, ଗତବର୍ଷ ମେ’ରେ କଶ୍ମୀରୀ ପଣ୍ଡିତ କର୍ମଚାରୀ ରାହୁଲ ଭଟ୍ଟଙ୍କୁ ଆତଙ୍କବାଦୀମାନେ କେନ୍ଦ୍ରୀୟ କଶ୍ମୀରରେ ଥିବା ତାଙ୍କ କାର୍ଯ୍ୟାଳୟରେ ହତ୍ୟା କରିଥିଲେ। ଏହାର ପ୍ରତିବାଦରେ ପ୍ରାୟ ୫,୦୦୦ କଶ୍ମୀରୀ ପଣ୍ଡିତ କର୍ମଚାରୀ ଗତବର୍ଷ ମେ’ ୧୨ରୁ ଧର୍ମଘଟ କରିଆସୁଛନ୍ତି। ଏହି ହତ୍ୟାକାଣ୍ଡ ପରେ ଅଧିକାଂଶ ପିଏମ୍ ପ୍ୟାକେଜ୍ କର୍ମଚାରୀ ଉପତ୍ୟକା ଛାଡ଼ି ଜମ୍ମୁ ପଳାଇଥିଲେ। ସେଠାରେ ସେମାନେ କ୍ରମାଗତ ଭାବେ ଆନ୍ଦୋଳନ କରିଆସୁଥିବାବେଳେ କେତେଜଣ ଉପତ୍ୟକାକୁ ଫେରି କାର୍ଯ୍ୟରେ ଯୋଗଦେଲେଣି। ଧର୍ମଘଟରେ ସାମିଲ ଥିବା କର୍ମଚାରୀମାନେ ଭାଜପା କାର୍ଯ୍ୟାଳୟ ନିକଟରେ ବିକ୍ଷୋଭ କରିଥିଲେ।