ମୁମ୍ବାଇ,୩୦।୬: ମହାରାଷ୍ଟ୍ରରେ କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଉଥିବା ବେଳେ ଏବେ ସେଠାରେ ଅନେକ ଲୋକ ରୋଜଗାର ହରାଇ ବସିଛନ୍ତି। ଏମିତିକି କରୋନା ସଂକ୍ରମଣକୁ ରୋକିବାକୁ ରାଜ୍ୟରେ ଜୁଲାଇ ଶେଷ ପର୍ଯ୍ୟନ୍ତ ଲକ୍ଡାଉନ ଘୋଷଣା କରାଯାଇଥିବା ବେଳେ ଏହା ସାଧାରଣ ଲୋକଙ୍କ ଜୀବନ ଜୀବିକା ଉପରେ ବେଶ୍ ପ୍ରଭାବ ପକାଇଛି। ଏହାକୁ ଦୃଷ୍ଟିରେ ରଖି ମହାରାଷ୍ଟ୍ର ସରକାର ଏବେ ବିଦ୍ୟୁତ୍ ଉପଭୋକ୍ତାଙ୍କୁ ସାମାନ୍ୟ ଆଶ୍ୱସ୍ତି ପ୍ରଦାନ କରିଛନ୍ତି। ଏଣିକି କିଛିଦିନ ପାଇଁ ମହାରାଷ୍ଟ୍ରର ବିଦ୍ୟୁତ ଉପଭୋକ୍ତା କିସ୍ତିରେ ବିଜୁଳି ବିଲ୍ ପଇଠ କରିପାରିବେ ବୋଲି କୁହାଯାଇଛି। ମହାରାଷ୍ଟ୍ର ଇଲେକ୍ଟ୍ରିସିଟି ରେଗୁଲଟାରୀ କମିଶନ(ଏମ୍ଇଆର୍ସି) ପାଓ୍ବାର ଡିଷ୍ଟ୍ରିବ୍ୟୁଶନ କମ୍ପାନୀଙ୍କୁ ବିଦ୍ୟୁତ ବିଲ୍ ପଇଠ କରିବାକୁ ଗ୍ରାହକଙ୍କୁ ୩ଟି କିସ୍ତି ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି। ତେବେ ମାର୍ଚ୍ଚରୁ ମେ’ ମାସ ମଧ୍ୟରେ ଆସିଥିବା ବିଲ୍କୁ ୩ କିସ୍ତିରେ ଦେଇହେବ। ସୂଚନାଯୋଗ୍ୟ, କରୋନା ମହାମାରୀ ପାଇଁ ସାରା ଦେଶରେ ଲକ୍ଡାଉନ ଜାରି କରାଯାଇଥିବା ବେଳେ ସବୁକିଛି ବନ୍ଦ ହୋଇଯାଇଥିଲା। ପରେ ଲକ୍ଡାଉନ ନିୟମରେ କୋହଳ କରାଯିବା ପରେ ବିଦ୍ୟୁତ୍ ଗ୍ରାହକମାନେ ଏକ କାଳୀନ ୩ ମାସର ବିଲ୍ ପାଇବା ପରେ ଚମକି ପଡିଥିଲେ। ତେଣୁ ଏକାଥରେ ଏତେ ପରିମାଣର ବିଲ୍ ପଇଠ କରିବାକୁ ଅଧିକାଂଶ ଲୋକ ସକ୍ଷମ ନ ଥିବାରୁ ଏବେ ବିଦ୍ୟୁତ୍ ଗ୍ରାହକମାନଙ୍କୁ କିସ୍ତିରେ ବିଲ୍ ପଇଠ କରିବାକୁ କୁହାଯାଇଛି।
