ଭୁବନେଶ୍ୱର,୧୦ା୬ (ସ୍ପୋଟର୍ସ ବ୍ୟୁରୋ)
କଟକ ଜିଲା କ୍ରୀଡ଼ା ସଂସଦ ଆନୁକୂଲ୍ୟରେ ଦୁଇ ଦିନ ଧରି କଟକସ୍ଥିତ ସତ୍ୟବ୍ରତ ଷ୍ଟାଡିୟମରେ କଟକ ଜିଲା ବାର୍ଷିକ ଆଥ୍ଲେଟିକ ମିଟ୍ ଅନୁଷ୍ଠିତ ହୋଯାଇଛି। ଏଥିରେ କଟକ ଜିଲା କ୍ରୀଡ଼ା ସଂସଦ ଦ୍ୱାରା ଅନୁବନ୍ଧିତ ସମସ୍ତ ସ୍କୁଲ, କଲେଜ ଓ କ୍ଲବଗୁଡ଼ିକରୁ ପ୍ରାୟ ୮୦୦ ପ୍ରତିଯୋଗୀ ଅଂଶଗ୍ରହଣ କରିଥିଲେ। ଏଥିରୁ ଯୋଗ୍ୟ ବିବେଚିତ ଆଥ୍ଲେଟ ଭୁବନେଶ୍ୱରସ୍ଥିତ କିଟ୍ ଆଥ୍ଲେଟିକ୍ ଷ୍ଟାଡିୟମରେ ଚଳିତ ମାସ ୨୨ରୁ ୨୫ ତାରିଖ ପର୍ଯ୍ୟନ୍ତ ହେବାକୁଥିବା ରାଜ୍ୟସ୍ତରୀୟ ବାର୍ଷିକ କ୍ରୀଡ଼ାରେ ଜିଲା ତରଫରୁ ପ୍ରତିନିଧିତ୍ୱ କରିବାର ସୁଯୋଗ ପାଇବେ। କଟକ ପୂର୍ବର ପି.ବି. ଆଥ୍ଲେଟିକ କୋଚିଂ ସେଣ୍ଟର କ୍ରମାଗତ ୯ମ ବର୍ଷ ଓଭରଅଲ ଚାମ୍ପିୟନ ହୋଇଛି। ଶୁକ୍ରବାର ଉଦ୍ଯାପନୀ ଉତ୍ସବରେ ସିଏମ୍ସି ମେୟର ସୁବାସ ଚନ୍ଦ୍ର ସିଂ ମୁଖ୍ୟ ଅତିଥିଭାବେ ଯୋଗ ଦେଇଥିଲେ। ଅନ୍ୟମାନଙ୍କ ମଧ୍ୟରେ କ୍ରୀଡ଼ା ସଂସଦ ସମ୍ପାଦକ ଆଶୀର୍ବାଦ ବେହେରା, ଉପସଭାପତି ରମେଶ ଚନ୍ଦ୍ର ମଲିକ, ଯୁଗ୍ମ ସମ୍ପାଦକ ନବ କିଶୋର ମିଶ୍ର, କୋଷାଧ୍ୟକ୍ଷ ଦିନେଶ୍ୱର ପ୍ରସାଦ ଭଗତ ଏବଂ ବିଭାଗୀୟ ସମ୍ପାଦକ (ଆଥଲେଟିକ୍ସ) ବିମଲ ଚନ୍ଦ୍ର ସେଠୀ ପ୍ରମୁଖ ଉପସ୍ଥିତ ଥିଲେ।