କଣିହାଁ, ୧୩ା୭(ଡି.ଏନ.ଏ.) ଅନୁଗୋଳ ଜିଲା କଣିହାଁ ବ୍ଲକ ମହକୁମା ହାଟ ପଡିଆଠାରୁ ପାଉଁଶ ପୋଖରୀ କଡ ଦେଇ ଯାଇଥିବା ପୂର୍ତ୍ତ ରାସ୍ତାରେ ହୀନସ୍ତା ହେଉଛନ୍ତି ପଥଚାରୀ। ତାଳଚେର ପୂର୍ତ୍ତ ବିଭାଗ ଅଧୀନରେ ଥିବା ଏହି ରାସ୍ତା ଡେରେଙ୍ଗ, କାକୁଡିଆ, ବଡଗୁଣ୍ଡୁରୀ ପଞ୍ଚାୟତ ଦେଇ ଛେଣ୍ଡିପଦା ବ୍ଲକକୁ ସଂଯୋଗ କରୁଥିଲେ ହେଁ ଲୋକଙ୍କ ଯାତାୟାତ ସୁଗମ ହୋଇପାରୁନି। ବିଭାଗୀୟ ଅବହେଳା, ବୈଷୟିକ ତ୍ରୁଟି ଯୋଗୁ ଲୋକେ ହଇରାଣ ହରକତ ହେବା ସହ ରାସ୍ତାର ସ୍ଥାୟୀତ୍ୱ ମଧ୍ୟ କମୁଥିବାରୁ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଅଭିଯୋଗ ମୁତାବକ, ଉକ୍ତ ରାସ୍ତା ଉପରେ ୨ଟି ବ୍ଲକର ଲୋକେ ନିର୍ଭର କରୁଥିବାବେଳେ ଗତ ମାସରେ ପିଚୁ କରାଯାଇଛି। ହେଲେ ନିର୍ମାଣରେ ବୈଷୟିକ ତ୍ରୁଟି ଯୋଗୁ ସ୍ଥାନେ ସ୍ଥାନେ ପାଣି ଜମି ରହୁଛି। ଏଥିସହ ରାଜପଥ ନିର୍ମାଣ ପାଇଁ ଆଶ୍ପଣ୍ଡରୁ ଶହ ଶହ ଟ୍ରକ୍ରେ ପାଉଁଶ ସହ ବାଲି, ମାଟି ଆଦି ପରିବହନ ହେଉଛି। ଶିଳ୍ପ ସଂସ୍ଥାର ନିଜସ୍ବ ରାସ୍ତା ମରାମତି ଅଭାବରୁ କଦର୍ଯ୍ୟ ହୋଇଯାଇଥିବାରୁ ଏହି ପୂର୍ତ୍ତ ରାସ୍ତା ଦେଇ ଭାରିଯାନ ଯାଉଛି। ଫଳରେ ପାଉଁଶ, ଧୂଳି, ମାଟି ଗଦା ହେଉଛି। ଶୁଖିଲା ପାଗରେ ସେଠାରେ ପାଉଁଶ, ଧୂଳି ଉଡୁଥିବାବେଳେ ବର୍ଷା ହେଲେ କାଦୁଅ ଜମୁଛି। ଫଳରେ ଯାତାୟାତକାରୀ ଅସୁବିଧା ଭୋଗୁଛନ୍ତି। ତୁରନ୍ତ ରାସ୍ତା ସଫା କରାଯିବା ସହ ଉନ୍ନତୀକରଣ ପାଇଁ ପ୍ରଶାସନ ଦୃଷ୍ଟି ଦେବାକୁ ବୁଦ୍ଧିଜୀବୀ ନରେଶ ବେହେରା, ଭଗବାନ ଦାସ, ଗଣେଶ୍ୱର ସାହୁ ପ୍ରମୁଖ ଦାବି କରିଛନ୍ତି। ଏ ନେଇ ପୂର୍ତ୍ତ ବିଭାଗ ଓ ଏନ୍ଟିପିସି ପ୍ରକଳ୍ପ ଅଧିକାରୀଙ୍କୁ ଯୋଗାଯୋଗ କରାଯାଇଥିଲେ ହେଁ ମତାମତ ମିଳିପାରିନାହିଁ।