ନୂଆଦିଲ୍ଲୀ, ୨ା୮: ଇସ୍ରାଏଲର ଏନ୍ଏସ୍ଓ ଗ୍ରୁପ୍ ଦ୍ୱାରା ପ୍ରସ୍ତୁତ ସ୍ପାଏଓ୍ବେର ପେଗାସସ୍ ଦ୍ୱାରା ନେତା, ଖବରଦାତା, ବିଚାରବିଭାଗୀୟ କାର୍ଯ୍ୟକର୍ତ୍ତା ପ୍ରମୁଖଙ୍କ ଉପରେ ଗୁପ୍ତଚରଗିରି ଘଟଣାର ସ୍ବତନ୍ତ୍ର ତଦନ୍ତ ପାଇଁ ସୁପ୍ରିମକୋର୍ଟରେ ଆଗତ ପିଟିଶନର ଶୁଣାଣି ଆସନ୍ତା ଗୁରୁବାର ହେବ। ଭାରତର ପ୍ରଧାନ ବିଚାରପତି (ସିଜେଆଇ) ଏନ୍. ଭି. ରମାନାଙ୍କ ନେତୃତ୍ୱରେ ଜଷ୍ଟିସ୍ ସୂର୍ଯ୍ୟ କାନ୍ତଙ୍କୁ ନେଇ ଗଠିତ ଖଣ୍ଡପୀଠ ଏହାର ଶୁଣାଣି କରିବେ। ବରିଷ୍ଠ ସାମ୍ବାଦିକ ଏନ୍. ରାମ ଏବଂ ଶଶୀ କୁମାର, ସିପିଏମ୍ ଏମ୍ପି ଜନ୍ ବ୍ରିଟାସ୍, ଆଡ୍ଭୋକେଟ୍ ଏମ୍.ଏଲ୍. ଶର୍ମା ଏ ବାବଦରେ ସର୍ବୋଚ୍ଚ ଅଦାଲତରେ ପିଟିଶନ ଦାଖଲ କରିଥିଲେ। ଗୁପ୍ତଚରଗିରି ପାଇଁ ପେଗାସସ୍କୁ ଲାଇସେନ୍ସ ମିଳିଥିଲା କି ନା, ଏହାକୁ କିପରି ବ୍ୟବହାର କରାଯାଇଥିଲା ତାହା ସାମ୍ନାକୁ ଆଣିବା ପାଇଁ ତଦନ୍ତ କରାଯିବାକୁ ଏଥିରେ ଦାବି କରାଯାଇଥିଲା। ପେଗାସସ୍ ଦ୍ୱାରା ଭାରତରେ ପ୍ରାୟ ୩ ଶହରୁ ଊର୍ଦ୍ଧ୍ୱ ମୋବାଇଲ ନମ୍ବରରେ ଗୋଇନ୍ଦାଗିରି କରାଯାଇଥିବା ‘ଦି ଓ୍ବେର’ ନ୍ୟୁଜ୍ ଓ୍ବେବ୍ସାଇଟ୍ ପାର୍ଲାମେଣ୍ଟର ମୌସୁମୀ ଅଧିବେଶନ ପୂର୍ବରୁ ପ୍ରକାଶ କରିଥିଲା। ସେଥିରେ କଂଗ୍ରେସ ନେତା ରାହୁଲ ଗାନ୍ଧୀ, ନିର୍ବାଚନ ରଣନୀତିକାର ପ୍ରଶାନ୍ତ କିଶୋର, ଦୁଇ କେନ୍ଦ୍ରମନ୍ତ୍ରୀ, ପୂର୍ବତନ ନିର୍ବାଚନ କମିଶନରଙ୍କ ସମେତ ୪୦ ସାମ୍ବାଦିକଙ୍କ ମୋବାଇଲ ନମ୍ବର ରହିଥିବା ରିପୋର୍ଟରେ ପ୍ରକାଶ ପାଇଥିଲା। କେନ୍ଦ୍ରର ଭାଜପା ସରକାର ଏହା ଉପରେ ଆଲୋଚନା କରିବାକୁ ଦାବି କରି ବିରୋଧୀ ପାର୍ଲାମେଣ୍ଟରେ ହଟ୍ଟଗୋଳ ଜାରି ରଖିଥିବାରୁ ଗୃହ ସ୍ବାଭାବିକ ଭାବେ ଚାଲିପାରୁନାହିଁ।