ମୁମ୍ବାଇ,୧୦।୧୨: ଅନ୍ତିମ ଥର କୋଲକାତା ନାଇଟ୍ ରାଇଡର୍ସ (କେକେଆର୍) ପକ୍ଷରୁ ଆଇପିଏଲ୍ରେ ପ୍ରତିନିଧିତ୍ୱ କରିଥିବା ପୂର୍ବତନ ଭାରତୀୟ ଅଫ୍ ସ୍ପିନର ହରଭଜନ ସିଂ ୨୨ ବର୍ଷ ତଳର ଏକ ଫଟୋ ଶେୟାର କରିଛନ୍ତି। ଫଟୋଟି ହେଲା ଭଜିଙ୍କର ୧୯ ବର୍ଷରୁ କମ୍ ବିଶ୍ୱକପ୍ ବେଳର। ଫଟୋରେ ତାଙ୍କ ସହ ଥିବା ଦୁଇ ଖେଳାଳିଙ୍କୁ ଚିହ୍ନିବାକୁ ଫ୍ୟାନଙ୍କୁ ଭଜି ଚ୍ୟାଲେଞ୍ଜ ଦେଇଛନ୍ତି। କ୍ୟାପଶନରେ ‘ଚିହ୍ନିଲେ ମାନିଯିବି.. ୧୯୯୮/୯୯ ୧୯ ବର୍ଷରୁ କମ୍ ବିଶ୍ୱକପ୍ ବେଳର’ ଉଲ୍ଲେଖ କରିଛନ୍ତି ୪୧ ବର୍ଷୀୟ ଭେଟେରାନ ସ୍ପିନର।
ଫଟୋରେ ହରଭଜନଙ୍କ ସହ ପୂର୍ବତନ ପାକିସ୍ତାନ ବ୍ୟାଟର ହାସନ ରାଜା ଓ ବିନା ଶାର୍ଟରେ ଇମ୍ରାନ ତାହିର ଅଛନ୍ତି। ୧୯୯୮/୯୯ରେ ଦକ୍ଷିଣ ଆଫ୍ରିକାରେ ଖେଳାଯାଇଥିବା ୧୯ ବର୍ଷରୁ କମ୍ ବିଶ୍ୱକପ୍ ସମୟରେ ଏହି ଫଟୋ ଉଠା ଯାଇଥିଲା।
ତାହିର ଦକ୍ଷିଣ ଆଫ୍ରିକା ଜାତୀୟ ଦଳ ପାଇଁ ପ୍ରତିନିଧିତ୍ୱ କରିବା ପୂର୍ବରୁ ଜୁନିୟର ସ୍ତରରେ ପାକିସ୍ତାନ ପାଇଁ ଖେଳିଥିଲେ ତାହିର। ସେ ଦକ୍ଷିଣ ଆଫ୍ରିକା ଲାଗି ଅନ୍ତର୍ଜାତୀୟ ସ୍ତରରେ ୨୦ ଟେଷ୍ଟ, ୧୦୭ ଦିନିକିଆ ଓ ୩୮ ଟି୨୦ ଖେଳିଥିଲେ। ସେହିଭଳି ୧୯୯୬ରୁ ୨୦୦୫ ମଧ୍ୟରେ ପାକିସ୍ତାନ ପାଇଁ ୭ ଟେଷ୍ଟ ଏବଂ ୧୬ ଦିନିକିଆ ଖେଳିଥିଲେ ରାଜା। ହେଲେ ଅନ୍ୟ ଦୁଇ ଖେଳାଳିଙ୍କ ଭଳି ଜାତୀୟ ଦଳରେ କଦାପି ରାଜାଙ୍କ ସ୍ଥାନ ପକ୍କା ହୋଇ ପାରି ନ ଥିଲା। ଅନ୍ୟପକ୍ଷରେ ୨୦୧୬ରେ ଭାରତ ପାଇଁ ଅନ୍ତିମ ଥର ଖେଳିଥିଲେ ଭଜି। ଅନ୍ତର୍ଜାତୀୟ ସ୍ତରରେ ସେ ୧୦୩ ଟେଷ୍ଟ, ୨୩୬ ଦିନିକିଆ ଓ ୨୮ ଟି୨୦ ମ୍ୟାଚ୍ ଖେଳିଥିଲେ। ତାଙ୍କ ପ୍ରତିନିଧିତ୍ୱରେ ଭାରତ ୨୦୦୭ ଟି୨୦ ବିଶ୍ୱକପ୍ ଓ ୨୦୧୧ ଦିନିକିଆ ବିଶ୍ୱକପ୍ ଜିତିଥିଲା।
