ଛୁଆର ମୃତ୍ୟୁ ପରେ ପେଙ୍ଗୁଇନ୍ କାନ୍ଦିବାର ଏକ ଭିଡିଓ ସୋସିଆଲ ମିଡିଆରେ ସମସ୍ତଙ୍କୁ ଭାବୁକ କରିଛି। ଭାରତୀୟ ବନ୍ୟ ସେବା ପକ୍ଷରୁ ସୁଶାନ୍ତ ନନ୍ଦ ସୋମବାର ଏହାର ଏକ ଭିଡିଓ କ୍ଲିପ୍ ଟୁଇଟ୍ କରିଛନ୍ତି। ୨୫ ସେକେଣ୍ଡର ଏହି କ୍ଲିପ୍ରେ ଦୁଇଟି ପେଙ୍ଗୁଇନ୍ ମୃତ ଛୁଆ ନିକଟରେ ଛିଡ଼ା ହୋଇଛନ୍ତି। ମା’ ପେଙ୍ଗୁଇନ୍ ବାରମ୍ବାର ଛୁଆଟିକୁ ହଲାଇବା ସହ ଥଣ୍ଟରେ ଉଠାଉଛି। ଛୁଆ ନ ଉଠିବାକୁ ସେ ସେଠାରେ ତଳକୁ ବେକ ଓହଳାଇ ଛିଡ଼ା ହୋଇଛି। ପରେ ସେଠାରେ ଥିବା ଆଉ ଏକ ପେଙ୍ଗୁଇନ୍ ତାକୁ ସାନ୍ତ୍ୱନା ଦେବା ଭଳି ଦୃଶ୍ୟ ଭିଡିଓରେ ରହିଛି। ଦୁଇଟି ପେଙ୍ଗୁଇନ୍ ସେମାନଙ୍କ ଶାବକର ମୃତ୍ୟୁରେ ଶୋକ କରୁଛନ୍ତି ବୋଲି ସୁଶାନ୍ତ ଟୁଇଟ୍ରେ ଲେଖିଛନ୍ତି।