ପ୍ୟାରିସ୍,୨୦ା୪: ନୂଆ ପେନ୍ସନ୍ ଆଇନକୁ ନେଇ ଫ୍ରାନ୍ସ ରାଷ୍ଟ୍ରପତି ଇମାନ୍ବେଲ ମାକ୍ରଁଙ୍କୁ ଦେଶରେ ହଟହଟା ହେବାକୁ ପଡ଼ିଛି। ପାର୍ଲାମେଣ୍ଟରେ ଗୃହୀତ ହୋଇଥିବା ପେନ୍ସନ ବିଲ୍ ଅନୁସାରେ ସରକାରୀ କର୍ମଚାରୀଙ୍କ ବୟସ ସୀମା ୬୨ରୁ ୬୪କୁ ବୃଦ୍ଧି କରାଯାଇଛି। ମାକରଁ ଶନିବାର ଏହି ବିବାଦୀୟ ପେନ୍ସନ ସଂସ୍କାରରେ ସ୍ବାକ୍ଷର କରି ଏହାକୁ ଆଇନରେ ପରିଣତ କରିଛନ୍ତି। ଉକ୍ତ ବିଲ୍ ପ୍ରତିବାଦରେ ୩ ମାସ ହେଲା ଦେଶବ୍ୟାପୀ ଆନ୍ଦୋଳନ ଚାଲିଥିବାବେଳେ ଶୁକ୍ରବାର କନ୍ଷ୍ଟିଚ୍ୟୁଶନାଲ କାଉନସିଲ୍ ପେନ୍ସନ ସଂସ୍କାରକୁ ଅନୁମୋଦନ କରିଥିଲା। ଏହାର ପ୍ରତିବାଦରେ ମେ’ ୧ରେ ଗଣଶ୍ରମ ଦିବସ ବିକ୍ଷୋଭ କରିବାକୁ ୟୁନିୟନଗୁଡ଼ିକ ଚେତାବନୀ ଦେଇଛନ୍ତି। ମାକ୍ରଁ ଏହାକୁ ଭ୍ରୂକ୍ଷେପ ନ କରି ବୁଧବାର ପୂର୍ବ ଫ୍ରାନ୍ସର ଏଲ୍ସାସ୍ ଅଞ୍ଚଳର ସେଲେଷ୍ଟାଟ୍କୁ ଗସ୍ତ କରିଥିଲେ। ସେଠାରେ ଥିବା ଏକ ଫ୍ୟାକ୍ଟ୍ରିରେ ତାଙ୍କୁ ତୀବ୍ର ବିରୋଧ କରାଯାଇଛି। ତାଙ୍କ ଗସ୍ତ ପ୍ରତିବାଦରେ ପୋଷ୍ଟର ବ୍ୟାନର ଛାଇ ହୋଇଯାଇଥିଲା। ଏପରି କି ସ୍ଥାନୀୟ କର୍ମଚାରୀମାନେ ଫ୍ୟାକ୍ଟ୍ରିର ବିଦ୍ୟୁତ୍ ସଂଯୋଗ କାଟିଦେଇଥିଲେ। ମାକ୍ରଁ ନିକଟସ୍ଥ ଏକ ଗ୍ରାମରେ ଭିଡ଼ ଭିତରେ ଚାଲିବା ଆରମ୍ଭ କରିଥିଲେ। ଅନେକେ ସ୍ଲୋଗାନ ଦେଇଥିଲେ, ମାକ୍ରଁ ରିଜାଇନ୍। ଜଣେ ବ୍ୟକ୍ତି ତାଙ୍କୁ କହିଥିଲେ, ଆମେ ଏହି ପେନ୍ସନ୍ ସଂସ୍କାର ଚାହୁଁନାହୁଁ। ଅନ୍ୟ ଜଣେ ବ୍ୟକ୍ତି କହିଥିଲେ, ଖୁବ୍ଶୀଘ୍ର ତୁମ ପତନ ଘଟିବ। ଅପେକ୍ଷା କର ଓ ଦେଖ। ଆଉ ଜଣେ ତାଙ୍କୁ ଗୋଟିଏ ସ୍ଥାନ ଦେଖାଇ ବେକରେ ଦଉଡ଼ି ଲଗାଇ ଝୁଲିପଡ଼ିବାକୁ କହିଥିଲେ।