ଗୋପ/କୋଣାର୍କ,୧୩।୧(ଡି.ଏନ୍.ଏ.): ଭାରତର ଜାତୀୟ ପତାକାକୁ ଅସମ୍ମାନ କରିଥିବା ଅଭିଯୋଗରେ କୋଣାର୍କ ଥାନା ପୋଲିସ ଜଣେ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ)ଙ୍କୁ ଗୁରୁବାର ଗିରଫ କରିଛି। ସେ ହେଲେ ଉକ୍ତ ଥାନା ତଥା ଗୋପ ବ୍ଲକ ଅନ୍ତର୍ଗତ ଶିମିଳି ପଞ୍ଚାୟତର ପ୍ରଶାନ୍ତ କୁମାର ସ୍ବାଇଁ। ଏପରିକି ଜଣେ କାର୍ଯ୍ୟରତ ଅଧିକାରୀଙ୍କ ଏଭଳି ଅବହେଳାକୁ ନେଇ ଗୋପ ବିଡିଓ ଦୀପ୍ତିରାଣୀ ଦାସ ସମ୍ପୃକ୍ତ ଅଧିକାରୀଙ୍କୁ ନିଲମ୍ବିତ କରିବା ଲାଗି ବ୍ଲକ ଚିଠି ନମ୍ବର ୧୩୫, ତା ୧୨ା୧ା୨୦୨୩ ମାଧ୍ୟମରେ ଜିଲାପାଳଙ୍କୁ ସୁପାରିସ କରିଛନ୍ତି। ସୂଚନା ଅନୁଯାୟୀ, କିଛିଦିନ ହେବ ପ୍ରଶାନ୍ତ ଶିମିଳି ପଞ୍ଚାୟତରେ କାର୍ଯ୍ୟନିର୍ବାହୀ ଅଧିକାରୀ ଭାବେ ଦାୟିତ୍ୱ ନେଇଥିଲେ। ମାତ୍ର ଅଧିକାଂଶ ସମୟ ସେ କାର୍ଯ୍ୟାଳୟ ଟେବୁଲରେ ଥିବା ଏକ ଜାତୀୟ ପତାକାକୁ ସାଧାରଣ କପଡ଼ା ଭାବେ ଟେବୁଲ ପୋଛାପୋଛି କରି ଆସୁଥିଲେ। କେତେକ ବୈଠକରେ ଜାତୀୟ ପତାକାକୁ ତାଙ୍କର ଏପରି ଅବମାନନା କରୁଥିବା ଦେଖି ସରପଞ୍ଚ, ସଭ୍ୟାସଭ୍ୟ ଅସନ୍ତୋଷ ପ୍ରକାଶ କରିବା ସହ ବାରମ୍ବାର କହିଥିଲେ ମଧ୍ୟ ସେ ଶୁଣି ନ ଥିଲେ। କିଛିଦିନ ତଳେ ସମ୍ପୃକ୍ତ ଅଧିକାରୀ ଜାତୀୟ ପତାକାକୁ ନେଇ ମୋବାଇଲ ଫୋନ, ଟେବୁଲ ପୋଛାପୋଛି କରିବା ବେଳେ ଜଣେ ବ୍ୟକ୍ତି ଭିଡିଓ ଉତ୍ତୋଳନ କରିବା ପରେ ଏହି ଭିଡିଓକୁ ସୋସିଆଲ ମିଡିଆରେ ଭାଇରାଲ କରିଥିଲେ। ଗୁରୁବାର ଏହି ପ୍ରସଙ୍ଗରେ ଭାଜପା ସମେତ ବିଭିନ୍ନ ସଂଗଠନ ପକ୍ଷରୁ ଗୋପ ଓ କୋଣାର୍କ ଥାନାରେ ଏତଲା ଦିଆଯାଇଥିଲା। କୋଣାର୍କ ପୋଲିସ ଥାନା ପୋଲିସ ଏକ ମାମଲା (ନଂ. ୧୩/୨୩) ରୁଜୁ କରି ଅପରାହ୍ନରେ ଶିମିଳି ପଞ୍ଚାୟତ ଅଫିସରୁ ଅଧିକାରୀ ପ୍ରଶାନ୍ତଙ୍କୁ ଗିରଫ କରିଛିି। ଅନ୍ୟପଟେ ଗୋପ ବିଡିଓ ସଂଗଠନ ପକ୍ଷରୁ କରାଯାଇଥିବା ଅଭିଯୋଗକୁ ନେଇ ସମ୍ପୃକ୍ତ ପିଇଓଙ୍କ ବିରୋଧରେ ତୁରନ୍ତ ଶୁଙ୍ଖଳାଗତ କାର୍ଯ୍ୟାନୁଷ୍ଠାନ ନେବାକୁ ଚିଠି ଲେଖିଛନ୍ତି। ଏ ସମ୍ପର୍କରେ ଜିଲାପାଳ ସମର୍ଥ ବର୍ମାଙ୍କୁ ପଚାରିବାରେ ସମ୍ପୃକ୍ତ ଅଧିକାରୀଙ୍କୁ ନିଲମ୍ବିତ କରାଯିବ ବୋଲି କହିଛନ୍ତି। ଶେଷରେ ଗଣମାଧ୍ୟମ ଆଗରେ ପିଇଓ ସ୍ବାଇଁ ଏପରି ଭୁଲ୍ ପାଇଁ ଦୁଃଖ ପ୍ରକାଶ କରିବା ସହ ଭବିଷ୍ୟତରେ ଏଭଳି ନ କରିବା ପାଇଁ କ୍ଷମାପ୍ରାର୍ଥନା ମାଗିଥିଲେ।