ଦାରିଙ୍ଗବାଡ଼ି,୧୩ା୧୧(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକର ଦାସିଂବାଡ଼ି ପଞ୍ଚାୟତର ଗଡ଼ାପାକାଲି ଗ୍ରାମକୁ ଏବେ ବ୍ଲକ ପ୍ରଶାସନ ଫୋକସ କରୁଛି। ଗାଁକୁ ରାସ୍ତା ସଂପ୍ରସାରଣ ସହ ଚାଷଜମି ଉନ୍ନତୀକରଣ, ଚାଷ ପାଇଁ କୂପ ଖନନ ସହ ପିଇବା ପାଣି ପାଇଁ ପ୍ରୟାସ କରାଯାଉଥିବା ଜଣାପଡ଼ିଛି। ହେଲେ ଗଡ଼ାପାକାଲି ଗ୍ରାମକୁ ସଂଯୋଗ କରୁଥିବା ନଦୀ ପାର୍ ହେବା ପାଇଁ ଏବେ ମଧ୍ୟ ଭଲ ରାସ୍ତା ଟିଏ ନାହିଁ । ଆଜି ପର୍ଯ୍ୟନ୍ତ ଉକ୍ତ ନଦୀ ଉପରେ ପୋଲ ନିର୍ମାଣ ହୋଇନାହିଁ ା ଫଳରେ ଗଡ଼ାପାକାଲି ଗ୍ରାମର ଲୋକେ ବର୍ଷ ତମାମ ନଦୀ ଜଳ ଭିତରେ ପଶି ବିପଦପୂର୍ଣ୍ଣ ଭାବେ ଯାତାୟାତ କରୁଥିବା ବେଳେ ସରକାରୀ ହେଉକି ବେସରକାରୀ ଲୋକ ଉକ୍ତ ନଦୀ ଭିତରେ ବିପଦସଙ୍କୁଳ ଅବସ୍ଥାରେ ଯାତାୟାତ କରୁଛନ୍ତି।
ଯନ୍ତ୍ରୀ ଗୋପୀନାଥ ପଲେଇ କୁହନ୍ତି, ଉକ୍ତ ପୋଲ ନିର୍ମାଣ ପାଇଁ ଲକ୍ଷାଧିକ ଅର୍ଥ ବ୍ୟୟବରାଦ ହେବ। ତେବେ ନଦୀର ଅପରପାର୍ଶ୍ୱରେ ବହୁତ କମ୍ ଲୋକ ବସବାସ କରୁଥିବାରୁ ସେଠାରେ ପୋଲ ନିର୍ମାଣ ନେଇ ଆଶଙ୍କା ରହିଛି। ତେବେ ଗ୍ରାମରେ ଜନଜାତି ସଂପ୍ରଦାୟର ଲୋକ ବସବାସ କରୁଥିବା ବେଳେ ସେମାନଙ୍କ ଚାଷଜମିର ଉନ୍ନତିକରଣ ପାଇଁ ଏବେ ୧ ଲକ୍ଷ ୩୦ ହଜାର ଟଙ୍କା ବ୍ୟୟବରାଦ କରି ଏମ୍ଜିଏନଇଆର୍ଇଜିଏସ୍ ଯୋଜନାରେ କାର୍ଯ୍ୟ କରାଯାଇଛି । ଏହା ଦ୍ୱାରା ଉକ୍ତ ଅଞ୍ଚଳରେ ଲୋକଙ୍କୁ କାମ ମିଳିବା ସହ ଜମିର ଉନ୍ନତି ହୋଇଛି। ସେହିପରି ଗଡ଼ାପାକାଲି ଗ୍ରାମକୁ ମେଟାଲ ମୋରମ ରାସ୍ତା କିଛି ବାଟ ନିର୍ମାଣ କରାଯାଇଛି ସେହି ବାବଦରେ ପ୍ରାୟ ୭ ଲକ୍ଷ ଟଙ୍କା ଖର୍ଚ୍ଚ କରାଯାଇଛି।
ଅରୁଣ କୁମାର ସାହୁ
ଦାରିଙ୍ଗବାଡ଼ି