କୋରୁକୋଣ୍ଡା ୧୩।୩(ଡି.ଏନ.ଏ): ପାଣି ପାଇଁ ଲୋକେ ହନ୍ତସନ୍ତ। ଏଭଳି ଘଟଣା ମାଲକାନଗିରି ଜିଲା କୋରୁକୋଣ୍ଡା ବ୍ଲକ ସଦରରେ ଦେଖିବାକୁ ମିଳିଛି । ବ୍ଲକ ସଦର ଇରିକେଶନ କୋଲନିଠାରୁ ମାଝି ମୁଣ୍ଡା ପୋଖରୀ ପର୍ଯ୍ୟନ୍ତ ପ୍ରାୟ ୪୦ରୁ ୫୦ପରିବାର ରହୁଛନ୍ତି। ଏହି ଅଞ୍ଚଳ ମଧ୍ୟରେ ଦୁଇଗୋଟି ନଳକୂପ ରହିଥିବା ବେଳେ ନଳକୂପ ପାଣି ପିଇବା ଉପଯୋଗୀ ହୋଇ ନ ଥିବାରୁ ତାକୁ କେହିମଧ୍ୟ ବ୍ୟବହାର କରୁନାହାନ୍ତି। ଏହାକୁ ନେଇ ଅଞ୍ଚଳବାସୀ ପ୍ରଶାସନକୁ ଜଣାଇଥିଲେ। ଏହାପରେ କୋରୁକୋଣ୍ଡା ବ୍ଲକ ସଦର ଡାକ୍ତରଖାନା ପରିସରରେ ଥିବା ପାଣି ଟାଙ୍କିରୁ ଉକ୍ତ ଅଞ୍ଚଳକୁ ପାଇପ ଯୋଗେ ପାଣି ଯୋଗାଇଦେବାକୁ ସ୍ଥାନୀୟ ପ୍ରଶାସନ ନିଷ୍ପତ୍ତି ନେବା ସହ ୮ ଲକ୍ଷ ଟଙ୍କା ବ୍ୟୟ ଅଟକଳରେ ଆଠ ଗୋଟି ଷ୍ଟାଣ୍ଡପୋଷ୍ଟ ପଏଣ୍ଟ ଦିଆଗଲା । କିନ୍ତୁ ପଏଣ୍ଟ ଦିଆଯିବାର ମାତ୍ର ୧୫ରୁ ୨୦ଦିନ ପାଣି ଆସିବା ପରେ ବର୍ତ୍ତମାନ ଦୁଇମାସରୁ ଅଧିକ ସମୟ ହେଲା ପାଣି ବନ୍ଦ ହୋଇଯାଇଥିବା ଅଞ୍ଚଳବାସୀ କହିଛନ୍ତି। ଏନେଇ ବିଭାଗୀୟ ଯନ୍ତ୍ରୀ ସୁଗଦ ଚରଣ ହେମ୍ବରମଙ୍କୁ ପଚାରିବାରୁ ସେ କହିଛନ୍ତି ଉକ୍ତ ପାଣି ଟଙ୍କିଟି ଡାକ୍ତରଖାନା ପରିସର ମଧ୍ୟରେ ହୋଇଥିବାରୁ ବାହାରକୁ ପାଣି ଯୋଗାଇବା ସମ୍ଭବ ପର ହେଉନାହିଁ । ଏଣୁ ଆଗାମୀ ଦିନରେ କିଛି ଅନ୍ୟ ଉପାୟ କରି ସେହି ଅଞ୍ଚଳକୁ ପାଣି ଯୋଗାଇ ଦିଆଯିବ ବୋଲି କହିଛନ୍ତି। ତେବେ ସପ୍ତାହ ମଧ୍ୟରେ ଯଦି ଉକ୍ତ ଅଞ୍ଚଳକୁ ପାଣି ଯୋଗାଇ ନ ଦିଆଯିବ ତେବେ ଅଞ୍ଚଳବାସୀ ଆଗାମୀ ଦିନରେ ପଞ୍ଚାୟତ ସମିତି ଘେରାଉ କରିବାକୁ କହିଛନ୍ତି।