ମହାକାଳପଡ଼ା,୩ା୧୦(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ନଦୀ ନାଳ ଘେରା ଉପାନ୍ତ ବତିଘର ପଞ୍ଚାୟତ ଦକ୍ଷିଣ ଖୋଳା ନଦୀକୂଳ ବାସିନ୍ଦାଙ୍କ ପାଇଁ ପାନୀୟ ଜଳ ସମସ୍ୟା ଉପୁଜିଛି। ଏହି ଅଞ୍ଚଳରେ ସ୍ଥାପନ ହୋଇଥିବା ସୋଲାର ପାନୀୟ ଜଳ ପ୍ରକଳ୍ପ ଅଚଳ ହୋଇପଡିଛି। ପ୍ରକଳ୍ପ ଅଚଳ ଯୋଗୁ ବାଧ୍ୟହୋଇ ଖୋଳା ନଦୀ ଅପମିଶ୍ରିତ ଜଳକୁ ପାନୀୟ ଜଳ ରୂପେ ଗ୍ରହଣ କରୁଛୁ ବୋଲି ସ୍ଥାନୀୟ ମହିଳାମାନେ ଅଭିଯୋଗ କରିଛନ୍ତି। ବର୍ଷାଦିନରେ ଖୋଳା ନଦୀରେ କୁମ୍ଭୀର ଆକ୍ରମଣ ଭୟ ଥିବାରୁ ସତର୍କତା ସହକାରେ ନଦୀରୁ ପାନୀୟ ଜଳ ସଂଗ୍ରହ କରୁଛୁ ବୋଲି କହିଛନ୍ତି ଭାରତୀ ମଣ୍ଡଳ , ଶ୍ରୀମତୀ ମଣ୍ଡଳଙ୍କ ସମେତ ଅନ୍ୟମାନେ। ସ୍ଥାନୀୟ ସରପଞ୍ଚଙ୍କୁ ଅଭିଯୋଗ କରିଥିଲେ ମଧ୍ୟ କିଛି ପାନୀୟ ଜଳ ସମସ୍ୟା ସମାଧାନ ହୋଇପାରିନାହିଁ। ତେବେ ଏହି ଖୋଳା ନଦୀ ମହାନଦୀ ଶାଖା ହୋଇଥିବାରୁ ନିକଟସ୍ଥ ପାରାଦୀପ ଶିଳ୍ପାଞ୍ଚଳର ବର୍ଜ୍ୟବସ୍ତୁ ନଦୀରେ ମିଶିବା ଯୋଗୁ ବିଷାକ୍ତରେ ପରିଣତ ହେଉଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି। ଏହି ବିଷାକ୍ତ ଜଳକୁ ପାନୀୟ ଜଳ ରୂପେ ଗ୍ରହଣ କରୁଥିବ ଶିଶୁ, ଗର୍ଭବତୀମାନେ ସଂକ୍ରମିତ ରୋଗ ହେବା ଆଶଙ୍କା ରହିଛି। ଅପରପକ୍ଷରେ ଖୋଳା ନଦୀରେ ବହୁସଂଖ୍ୟାରେ କୁମ୍ଭୀର ଦେଖିବାକୁ ମିଳେ ବୋଲି ଶ୍ରୀମତୀ ମଣ୍ଡଳ କହିଛନ୍ତି। ପିଇବା ପାଣି ପାଇଁ ନଦୀରୁ ଆଣୁଥିବା ସମୟରେ ଯଦି କୁମ୍ଭୀର ଆକ୍ରମଣରେ ଶିକାର ହେଉ ତା’ହେଲେ ଏଥିପାଇଁ ଉତ୍ତରଦାୟୀ କିଏ ରହିବ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ଜୋର ଧରିଛି। ଏ ସମ୍ପର୍କରେ ବ୍ଲକ ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗ କନିଷ୍ଠ ଯନ୍ତ୍ରୀ ସୁବ୍ରତ କୁମାର ସାହୁଙ୍କୁ ପଚାରିବାରେ ସୋଲାର ପାନୀୟ ଜଳ ପ୍ରକଳ୍ପ ଅଚଳ ହେବା ନେଇ ଖବର ଜାଣି ନ ଥିଲୁ। ତୁରନ୍ତ ସମାଧାନ କରିବା ପାଇଁ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
