ପଟ୍ଟାଙ୍ଗି, ୧୪।୨(ଡି.ଏନ୍.ଏ):ଗ୍ରାମାଞ୍ଚଳର ଲୋକଙ୍କୁ ରୋଜଗାରକ୍ଷମ କରିବାକୁ ରାଜ୍ୟ ଓ କେନ୍ଦ୍ର ସରକାର ବିଭିନ୍ନ ଉନ୍ନୟନ କାମ କରୁଛନ୍ତି। ଉକ୍ତ କାମରେ ଗ୍ରାମାଞ୍ଚଳ ଲୋକଙ୍କୁ ନିୟୋଜିତ କରିବାକୁ ମଧ୍ୟ କେତେକ ଜାଗାରେ ନିୟମ ରହିଛି। କିନ୍ତୁ ଗ୍ରାମାଞ୍ଚଳରେ ଏହାର ବାସ୍ତବ ଚିତ୍ର ଅଲଗା। ଫଳରେ ଲୋକେ ବାଧ୍ୟ ହୋଇ ନିଜ ଅଞ୍ଚଳରେ କାମ ନ ପାଇ ପଡୋଶୀ ରାଜ୍ୟରେ ଦାଦନ ଖଟିବାକୁ ବାଧ୍ୟ ହେଉଛନ୍ତି। ଏପରିକି ଗ୍ରାମାଞ୍ଚଳରେ ହେଉଥିବା କାମ ସମ୍ପର୍କରେ ମଧ୍ୟ ବିଭାଗୀୟ ଅଧିକାରୀ ବା କର୍ମଚାରୀଙ୍କ ପାଖରେ କୌଣସି ଖବର ରହୁନାହିଁ। ଏପରି ଅବ୍ୟବସ୍ଥା କୋରାପୁଟ ଜଲା ପଟ୍ଟାଙ୍ଗି ବ୍ଲକ ଅଧୀନ ରାଲେଗଡା ପଞ୍ଚାୟତ ସୁନିୱାଲସାରେ ଦେଖିବାକୁ ମିଳିଛି।
ସୂଚନାନୁଯାୟୀ, ସୁନିୱାଲସାରେ ୧୦ରୁ ୧୫ଘର ରହିଛି। ଜାତୀୟ ରାଜପଥରୁ ଗ୍ରାମକୁ ସଂଯୋଗ କରୁଥିବା ରାସ୍ତାଟି ଚଲାବାଟ ହୋଇଥିବା ସହ ବର୍ତ୍ତମାନ ଉକ୍ତ ରାସ୍ତାରେ ଜେସିବି ସାହାଯ୍ୟରେ ଘାଟ୍ କଟିଂ କାମ କରାଯାଉଛି। ଏହାକୁ ନେଇ ଗ୍ରାମବାସୀ ଅସନ୍ତୋଷ ବ୍ୟକ୍ତ କରିଛନ୍ତି। ଗ୍ରାମବାସୀ ସେଠାରେ ପହଞ୍ଚତ୍ ଏଠାରେ କେଉଁ ବିଭାଗ କାର୍ଯ୍ୟ କରାଉଛି ବୋଲି ପଚାରିବା ସହ ମେଶିନ ଯୋଗେ କାମ ନ କରିବାକୁ ସେମାନେ ଚେତାବନୀ ଦେଇଛନ୍ତି। ଯେଉଁ ଗ୍ରାମକୁ ରାସ୍ତା ନାହିଁ, ସେଠାରେ ପ୍ରଥମେ ଏମ୍ଜିଏନ୍ଆର୍ଇଜିଏସ୍ରେ କାମ କରିବାର ସରକାରୀ ନିୟମ ରହିଛି। କିଛି ବର୍ଷ ତାହାର ଉନ୍ନତୀକରଣ କାମ ଉକ୍ତ ଯୋଜନା ଅଧୀନରେ କରାଯିବା ପରେ ରାସ୍ତାକୁ ଆର୍ଡି ବିଭାଗକୁ ହସ୍ତାନ୍ତର କରିବା ନିୟମ ରହିଛି। ଏହି ନିୟମ ଉଲ୍ଲଂଘନ କରାଯାଉଥିବା ସ୍ପଷ୍ଟ ବାରି ହେଉଛି। ଏନେଇ ପ୍ରଥମେ ରାଲେଗଡା ପଞ୍ଚାୟତ ଦାୟିତ୍ୱରେ ରହିଥିବା ବ୍ଲକର କନିଷ୍ଠ ଯନ୍ତ୍ରୀ ରଶ୍ମିତା ରାଉତଙ୍କୁ ଉକ୍ତ କାମ କିଏ କରୁଛି ଏବଂ କାହା ନିର୍ଦ୍ଦେଶରେ ହେଉଛି ବୋଲି ପଚରା ଯାଇଥିଲା। ମୁଁ କିଛି ଜାଣି ନାହିଁ କିମ୍ବା କୌଣସି ନିର୍ଦ୍ଦେଶ ଏବଂ ଉକ୍ତ କାମ ସମ୍ପର୍କରେ କୌଣସି ସରକାରୀ ରେକର୍ଡ ଖୋଲା ହୋଇ ନାହିଁ ବୋଲି ସେ କହିଥିଲେ। ସେହିପରି ଉକ୍ତ କାମ ସମ୍ପର୍କରେ ଆର୍ଡି ବିଭାଗର ଏସ୍ଡିଓ ସୁନିଲ କୁମାର ଦାସଙ୍କୁ ଏ ସମ୍ପର୍କରେ ଯୋଗାଯୋଗ କରାଯିବାରୁ ଉକ୍ତ କାମ ଆମ ବିଭାଗ ପକ୍ଷରୁ ହେଉନାହିଁ କିମ୍ବା ରାଲେଗଡା ପଞ୍ଚାୟତରେ ବର୍ତ୍ତମାନ ଆମ ବିଭାଗ ପକ୍ଷରୁ କୌଣସି କାମ ହେଉ ନାହିଁ ବୋଲି ସେ କହିଛନ୍ତି। କିନ୍ତୁ ଉପରୋକ୍ତ ୨ ବିଭାଗ ଯନ୍ତ୍ରୀ ବା ଅଧିକାରୀଙ୍କଠାରୁ ଏହିପରି ମତାମତ ଶୁଣିବା ପରେ ଉକ୍ତ କାମ କିଏ କରୁଛି ଏବଂ ଏହା କାହା ନିର୍ଦ୍ଦେଶରେ ହେଉଛି ଏନେଇ ଉଚ୍ଚସ୍ତରୀୟ ତଦନ୍ତ ହେବା ଆବଶ୍ୟକତା ରହିଛି ବୋଲି ବୁଦ୍ଧିଜୀବୀ କହିଛନ୍ତି। କେବଳ ସୁନିୱାଲସା ଗ୍ରାମରେ ନୁହେଁ, ଏହିପରି କାମ ବ୍ଲକ ଅଧୀନରେ ରହିଥିବା ବିଭିନ୍ନ ପଞ୍ଚାୟତରେ ଲୁଛାଛପାରେ କରାଯାଉଛି, ଯାହାକି ତଦନ୍ତସାପେକ୍ଷ ବୋଲି ବ୍ଲକ ଉପାଧ୍ୟକ୍ଷ ପ୍ରକାଶ କରିଛନ୍ତି।