ଯାଜପୁର ଅଫିସ,୧୨।୩: ଡ୍ୟାସ୍ ବୋର୍ଡ ମନିଟରିଂ ସିଷ୍ଟମ୍ (ଡିବିଏମ୍ଏସ୍)ରେ ଫେବୃୟାରୀ ସୁଦ୍ଧା ଯାଜପୁର ଜିଲାରେ ପାଇପ ଜଳଯୋଗାଣ ପ୍ରକଳ୍ପ ସଂକ୍ରାନ୍ତରେ ୮୩୦ଟି ଅଭିଯୋଗର ସମାଧାନ ହୋଇଛି। ରାଜ୍ୟ ଗ୍ରାମ୍ୟ ଜଳଯୋଗାଣ ଓ ପରିମଳ (ଆର୍ଡବ୍ଲ୍ୟୁଏସ୍ଏସ୍) ବିଭାଗ ଇଞ୍ଜିନିୟର-ଇନ୍-ଚିଫ୍(ସର୍ବୋଚ୍ଚ ଯନ୍ତ୍ରୀ)ଙ୍କ କାର୍ଯ୍ୟାଳୟରୁ ଏହି ସୂଚନା ମିଳିଛି। ଏହାର ବାସ୍ତବ ସ୍ଥିତି ଜିଲାର କୋରେଇ ବ୍ଲକ ପଛିକୋଟ ପଞ୍ଚାୟତ କଡ଼ମା ଗ୍ରାମରେ ଦେଖିବାକୁ ମିଳିଛି। ଦୀର୍ଘ ୧୧ ବର୍ଷ ତଳେ ଏହି ଗ୍ରାମରେ ଆରମ୍ଭ ହୋଇଥିବା ପାଇପ ଜଳଯୋଗାଣ ପ୍ରକଳ୍ପ କାମ ଏଯାଏ କାର୍ଯ୍ୟକାରୀ ହୋଇନାହିଁ। ଫଳରେ ଗ୍ରାମବାସୀ ଏବେ ବି ଚୁଆ ପାଣି ପିଉଛନ୍ତି। ସେହି ଗ୍ରାମବାସୀଙ୍କ ଏଭଳି ଜୀବନଧାରଣ ଦେଖିଲେ ବିକାଶ କ୍ଷେତ୍ରରେ ଆମେ କେତେ ପଛରେ ତାହା ସ୍ପଷ୍ଟ ହୋଇଛି।
ଗ୍ରାମାଞ୍ଚଳ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇଦେବା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ଏକାଧିକ ଯୋଜନା ରହିଛି । ଆର୍ଡବ୍ଲ୍ୟୁଏସ୍ଏସ୍ ରିପୋର୍ଟ ଅନୁଯାୟୀ, ଜିଲାର ବିଭିନ୍ନ ଗ୍ରାମରେ ପାନୀୟ ଜଳ ଯୋଗାଣ ପ୍ରକଳ୍ପମାନ କାର୍ଯ୍ୟକାରୀ କରିବା ପାଇଁ ପଦକ୍ଷେପ ନିଆଯାଇଛି। ସେଥିରୁ ବହୁ ପ୍ରଳଳ୍ପ କାର୍ଯ୍ୟକ୍ଷମ ହୋଇଥିବା ବେଳେ ଆଉ କେତେକ ପ୍ରକଳ୍ପର କାମ ଚାଲିଛି । ହେଲେ ବାସ୍ତବ ସ୍ଥିତି ସମ୍ପୂର୍ଣ୍ଣ ଭିନ୍ନ। ଆରଡବ୍ଲ୍ୟୁଏସ୍ଏସ୍ର ରିପୋର୍ଟ ପାଣିରେ ସର ପକାଇବା ସଦୃଶ୍ୟ ହୋଇଛି। ବର୍ଷବର୍ଷ ହେଲା ବିଭାଗୀୟ ରିପୋର୍ଟରେ ପ୍ରକଳ୍ପର କାମ ଚାଲିଥିବା ଉଲ୍ଲେଖ ରହୁଛି । ବିଭାଗ, ପ୍ରଶାସନିକ ଏବଂ ବିଧାନସଭା କମିଟିର ସମୀକ୍ଷାବେଳେ ପ୍ରକଳ୍ପଗୁଡିକର ସ୍ଥିତି ଅପରିବର୍ତ୍ତିତ ରହୁଥିବା ଦେଖିବାକୁ ମିଳୁଛି । ଏହା ପରେ ବି ପ୍ରକଳ୍ପ କାମ ତୁରନ୍ତ ଶେଷ କରିବାକୁ ବିଭାଗୀୟ ଅଧିକାରୀମାନେ ଗୁରୁତ୍ୱ ଦେଉ ନ ଥିବା ଅଭିଯୋଗ ହୋଇଛି । କଡ଼ମା ଗ୍ରାମକୁ ଉଦାହରଣ ଭାବେ ନିଆଯାଇପାରେ। ଦୀର୍ଘବର୍ଷ ହେବ ଏହି ଗ୍ରାମବାସୀ ଜଳ ସଙ୍କଟ ଭିତରେ ଘାଣ୍ଟି ହେଉଛନ୍ତି। ଏ ସଂକ୍ରାନ୍ତରେ ସେମାନେ ବିଭାଗୀୟ ଅଧିକାରୀ, ଜନପ୍ରତିନିଧି ଓ ଜିଲା ପ୍ରଶାସନକୁ ଏକାଧିକବାର ଜଣାଇଛନ୍ତି। ତଥାପି ସେମାନଙ୍କ ସମସ୍ୟାର ସମାଧାନ ହୋଇପାରିନାହିଁ। ଗ୍ରାମବାସୀଙ୍କ କହିବା ଅନୁସାରେ, ୨୦୦୯ରେ ଏଠାରେ ଏକ ପମ୍ପ ହାଉସ ନିର୍ମାଣ ହୋଇଥିଲା। କିନ୍ତୁ ଦୁଃଖ ଓ ବିଡମ୍ବନାର ବିଷୟ ସେହି ପ୍ରକଳ୍ପ କିଛିବର୍ଷ ଚାଲିବା ପରେ ଅଚଳ ହୋଇପଡିଥିଲା । ଗାଁରେ ପାଣି ପାଇଁ ହାହାକାର ପଡିଲା। ଅନ୍ୟ କୌଣସି ବ୍ୟବସ୍ଥା ନ ଥିବାରୁ ଗାଁର ମହିଳାମାନଙ୍କୁ ଚୁଆରୁ ପାଣି ସଂଗ୍ରହ ପାଇଁ ମାଇଲ ମାଇଲ ଯିବାକୁ ପଡିଲା। ଏ ସଂକ୍ରାନ୍ତରେ ଗ୍ରାମବାସୀ ବିଭାଗୀୟ ଅଧିକାରୀଙ୍କ ପାଖରେ ଅଭିଯୋଗ କରିଥିଲେ। ନୂତନ ପ୍ରକଳ୍ପ ନିମନ୍ତେ ଆରଡବ୍ଲ୍ୟୁଏସ୍ଏସ୍ ପକ୍ଷରୁ ୨୦୧୪-୧୫ରେ ପୁଣି ଏକ ଟେଣ୍ଡର ଆହ୍ବାନ କରାଯାଇଥିଲା। ଏହାର ଗୋଟିଏ ବର୍ଷ ପରେ ୨୦୧୬-୧୭ରେ ୧୨ ମିଟର ଉଚ୍ଚତା ଓ ଦେଢ଼ଲକ୍ଷ ଲିଟର କ୍ଷମତା ବିଶିଷ୍ଟ ଏକ ପାଣିଟାଙ୍କି ୨୬ ଲକ୍ଷ ଟଙ୍କା ବ୍ୟୟରେ ମା’କାମୁଡେଇ ପଡ଼ିଆ ନିକଟରେ ନିର୍ମାଣ କରାଯାଇଥିଲା । ଇତିମଧ୍ୟରେ ପାଣି ଟାଙ୍କି କାମ ସମ୍ପୂର୍ଣ୍ଣ ହୋଇଛି। ହେଲେ ଗତ ୪ ବର୍ଷ ହେବ ପାଇପ ବିଛା କାମ ସରିପାରୁନାହିଁ । ଫଳରେ ଗ୍ରାମବାସୀ ଚୁଆରୁ ପାଣି ସଂଗ୍ରହ କରି ପାନୀୟ ଜଳ ରୂପେ ବ୍ୟବହାର କରୁଛନ୍ତି। ଏନେଇ କନିଷ୍ଠ ଯନ୍ତ୍ରୀ-୧ ସୋମନାଥ ପାଣିଗ୍ରାହୀଙ୍କୁ ପଚାରିବାରୁ ସେ କହିଛନ୍ତି, ପୂର୍ବରୁ ବିଦ୍ୟୁତ୍ ବିଲ୍ ୧ ଲକ୍ଷ ୬୭ ହଜାର ଟଙ୍କା ବାକି ଅଛି। ସେଥିପାଇଁ ନୂତନ ପ୍ରକଳ୍ପ ପାଇଁ ବିଦ୍ୟୁତ୍ ସଂଯୋଗ ହୋଇପାରିନାହିଁ। ଏହାବାଦ୍ ପାଇପ ବିଛା କାମ ସରିନାହିଁ। ଅନ୍ୟପକ୍ଷେ ଏହି ପ୍ରକଳ୍ପରେ ବ୍ୟାପକ ଅନିୟମିତତା ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି।