ସମୟ ସହ ଡେଟିଂ ଏବଂ ସାଥୀଙ୍କୁ ନେଇ ଲୋକଙ୍କ ପସନ୍ଦ ବଦଳିଥାଏ। ଏହା ଜାଣିବା ପାଇଁ ଏକ୍ସଟ୍ରା ମାରିଟାଲ ଡେଟିଂ ଆପ୍ ‘ଗ୍ଲିଡେନ୍’ ନିକଟରେ ଭାରତୀୟମାନଙ୍କ ଉପରେ ଏକ ସର୍ଭେ କରିଥିଲା। ଏହି ରିପୋର୍ଟରେ ଆଶ୍ଚର୍ଯ୍ୟକର କଥା ସାମ୍ନାକୁ ଆସିଛି।
ଏହି ଡେଟିଂ ଆପ୍ ୩୪ରୁ ୪୯ ବର୍ଷ ବୟସର ୧୦୦୦ ଜଣଙ୍କ ଉପରେ ସର୍ଭେ କରିଥିଲା। ଏହି ସର୍ଭେରେ ବମ୍ବେ, ଦିଲ୍ଲୀ, ଏନ୍ସିଆର୍, ଚେନ୍ନାଇ, ବାଙ୍ଗାଲୋର, ପୁଣେ ଏବଂ ହାଇଦ୍ରାବାଦର ଲୋକମାନେ ଭାଗ ନେଇଥିଲେ।
ସର୍ଭେରେ ସାମିଲ ୭୨% ଲୋକ କୋଭିଡ-୧୯ କଟକଣା ଉଠିବା ପରେ ନିଜ ପାର୍ଟନରଙ୍କୁ ଭେଟିବାକୁ ଇଚ୍ଛା ପ୍ରକାଶ କରିଛନ୍ତି। ସେହିଭଳି ସର୍ଭେରେ ସାମିଲ ଆଉ କିଛି ଲୋକ ଅବିଶ୍ୱାସକୁ ଅପରାଧ ବୋଲି କହିଛନ୍ତି। ଏଣୁ ବିଶ୍ୱାସଘାତକ ସାଜିଥିବା ସାଥୀଙ୍କୁ କ୍ଷମା କରାଯାଇପାରିବ ନାହିଁ କହିଛନ୍ତି। ଅପରପକ୍ଷେ ବିଶ୍ୱାସଘାତକତା ମିଳିବା ପରେ ସାଥୀଙ୍କୁ ଦ୍ୱିତୀୟ ସୁଯୋଗ ଦେବାକୁ ମଧ୍ୟ କିଛି ବ୍ୟକ୍ତି ସମ୍ମତି ପ୍ରଦାନ କରିଛନ୍ତି।
ମୋଟାମୋଟି ଭାବେ ଦେଖିବାକୁ ଗଲେ ୩୬.୯ ପ୍ରତିଶତ ଲୋକ ବିଶ୍ୱାସଘାତକତା ମିଳିବା ପରେ ମଧ୍ୟ ସାଥୀଙ୍କୁ କ୍ଷମା କରିବାକୁ ପ୍ରସ୍ତୁତ ଥିଲେ। ହେଲେ ୪୦.୧% ଲୋକ ତାଙ୍କ ଭବିଷ୍ୟତ ବିଶ୍ୱାସଘାତକତା ଦେବାର କାରଣ ଉପରେ ନିର୍ଭର କରେ ବୋଲି କହୁଥିଲେ। ୨୩% ଲୋକ ଧୋକା ଖାଇବା ପରେ ସମ୍ପର୍କ ତୁଟାଇଦେବାକୁ ଚାହିଁଥିଲେ।
ଆଜିକାଲିର ଲୋକମାନେ ନିଜର ସମ୍ପର୍କ ଏବଂ ଜୀବନକୁ ନେଇ ଅଧିକ ବ୍ୟବହାରିକ ହୋଇଯାଇଛନ୍ତି। ଜୀବନସାଥୀ ସହ ମତାନ୍ତର ହେବା ପରେ ସମ୍ପର୍କ ଖଟା ହୋଇଯିବା କାରଣରୁ ଲୋକମାନେ ସେଥିରୁ ନ ବାହାରି, ବାହାରେ ଅନ୍ୟ ସମ୍ପର୍କ ଖୋଜୁଛନ୍ତି। କାରଣ ସର୍ଭେରେ ସାମିଲ ୪୮.୧% ଲୋକ ଗୋଟିଏ ସମୟରେ ଦୁଇଜଣଙ୍କୁ ଭଲପାଇପାରିବେ ବୋଲି କହିଥିଲେ। ୪୪.୫% ଲୋକ ଏଭଳି କରିବାକୁ ମନା କରିଦେଇଥିଲେ।
