ହିଞ୍ଜିଳିକାଟୁ,୨୪।୧୨(ଡି.ଏନ.ଏ): ବସରେ ୨ ଛାତ୍ରୀଙ୍କ ପର୍ସ ସହ ମୋବାଇଲ ଚୋରି କରି ଧରାପଡ଼ିଥିବା ଚୋରକୁ ଲୋକେ ନିର୍ଧୂମ୍ ଛେଚିବା ପରେ ପୋଲିସରେ ଦେଇଛନ୍ତି। ହିଞ୍ଜିଳିକାଟୁ କଲେଜର ୨ ଛାତ୍ରୀ ଶୁକ୍ରବାର ସନ୍ଧ୍ୟାରେ କଲେଜ ଓ ପରେ ଟ୍ୟୁଶନ ସାରି ହିଞ୍ଜିଳିକାଟୁ ବସଷ୍ଟାଣ୍ଡରୁ ନିଜ ଗ୍ରାମ କଙ୍କୋରଡା ଯିବାକୁ ଏକ ବସରେ ଚଢିଥିଲେ। ସେମାନଙ୍କ ମଧ୍ୟରୁ ଜଣେ ଛାତ୍ରୀଙ୍କ ପର୍ସକୁ ବସ ଭିତରେ ଲୁଟେରା ଚୋରି କରିନେଇ ଥିଲେ। ପର୍ସରେ ଛାତ୍ରୀଙ୍କ ମୋବାଇଲ, ଟଙ୍କା ଆଦି ରହିଥିଲା। ବସ କଣ୍ଡକ୍ଟର ହିଞ୍ଜିଳିକାଟୁ ବସଷ୍ଟାଣ୍ଡରେ ଛାତ୍ରୀଙ୍କୁ ଟିକଟ ପଇସା ମାଗିଥିଲେ। ଏହି ସମୟରେ ଛାତ୍ରୀଙ୍କ ପର୍ସ ନ ଥିବାରୁ ସେ ପାଟି କରିବାରୁ ସନ୍ଦେହ ଅବସ୍ଥା ଜଣଙ୍କୁ ଲୋକେ ଧରି ପିଟିବାରୁ ସେ ଚୋରି କରିଥିବା ଜଣାପଡ଼ିଥିଲା। ପରେ ଲୁଟେରାଙ୍କୁ ହିଞ୍ଜିଳି ପୋଲିସକୁ ଜିମା ଦେଇଥିଲେ। ଛାତ୍ରୀଙ୍କ ଅଭିଯୋଗ କ୍ରମେ ପୋଲିସ ଅଭିଯୁକ୍ତଙ୍କୁ ଥାନାରେ ଅଟକ ରଖି ଅଧିକ ପଚରାଉଚରା କରୁଛି।
