ବାରିପଦା ଅଫିସ,୧୭।୧: ମୟୂରଭଞ୍ଜ ଜିଲାର ଗଣପର୍ବ ମକର ଅବସରରେ ସୁନାମୁହିଁ(ବାରୁଣୀ) ଘାଟରେ ରବିବାର ଦାମୋଦର ଯାତ୍ରା ଆରମ୍ଭ ହୋଇଛି। ଏହି ଯାତ୍ରା ତିନିଦିନ ଧରି ଚାଲିବାକୁ ଥିବା ବେଳେ କୋଭିଡ କଟକଣାକୁ ନ ମାନି ବହୁ ଲୋକଙ୍କ ଭିଡ଼ରେ ଏହି ପରମ୍ପରା ପାଳନ ହୋଇଛି। ବାରିପଦା ଦେଇ ପ୍ରବାହିତ ବୁଢାବଳଙ୍ଗ, ଜରାଳି ଓ ସରାଳି ସେତୁର ସଙ୍ଗମ ସ୍ଥଳ ତ୍ରିବେଣୀ(ସୁନାମୁହିଁ) ଘାଟରେ ସହସ୍ରାଧିକ ଲୋକ ଅସ୍ଥି ବିସର୍ଜନ କରିଛନ୍ତିି। କରୋନା ସତ୍ତ୍ୱେ ଜିଲା ସମେତ ଓଡିଶା, ପଡୋଶୀ ରାଜ୍ୟ ଝାଡଖଣ୍ଡ ଓ ପଶ୍ଚିମବଙ୍ଗରୁ ହଜାର ହଜାର ଲୋକ ଆସି ଏଠାରେ ଅସ୍ଥି ବିସର୍ଜନ କରିଛନ୍ତି।
ଆଦିବାସୀ ସାନ୍ତାଳ ସମ୍ପ୍ରଦାୟର ଲୋକେ ପିତୃ ପୁରୁଷଙ୍କ ଅସ୍ଥି ବିସର୍ଜନ ଓ ପିଣ୍ଡଦାନ ଭଳି ପରମ୍ପରାକୁ ମକର ସଂକ୍ରାନ୍ତି ଅବସରରେ ପାଳନ କରାଯାଇଥାଏ ା ଦାମୋଦର ଯାତ୍ରାରେ ପ୍ରବଳ ଜନସମାଗମ ପରିଲକ୍ଷିତ ହୋଇଛି। ମକର ସଂକ୍ରାନ୍ତି ଦୁଇଦିନ ପରେ ସାନ୍ତାଳ ସମ୍ପ୍ରଦାୟର ଲୋକମାନେ ଅସ୍ଥିକୁ ଧରି ପାରମ୍ପାରିକ ବେଶ, ପୋଷାକ, ନୃତ୍ୟ, ଗୀତରେ ସ୍ଥାନଟି ଲୋକାରଣ୍ୟ ହୋଇପଡିଛି। ଦାନ ପାଇଁ ବିଭିନ୍ନ ଜିନିଷକୁ ଭାର ସାହାଯ୍ୟରେ ବୋହି ତ୍ରିବେଣୀ ଘାଟରେ ଲୋକ ପହଞ୍ଚି ଘାଟକର୍ମ କରିବା ପାଇଁ ଲୋକମାନେ ଲଣ୍ଡା ହୋଇ ତ୍ରିବେଣୀ ଘାଟରେ ବୁଡ଼ ପକାଇ ନୂଆ ଲୁଗା ପିନ୍ଧି ପୂର୍ବ ପୁରୁଷଙ୍କୁ ପିଣ୍ଡଦାନ ଓ ଅସ୍ଥି ବିସର୍ଜନ କରିଛନ୍ତି। ତେବେ ଲକ୍ଷାଧିକ ଜନସମାଗମକୁ ଦୃଷ୍ଟିରେ ରଖି ଅଗ୍ନିଶମ ବିଭାଗ ଓ ପୋଲିସ ପ୍ରଶାସନ ସଜାଗ ରହିଛନ୍ତି। କମିଟି ପକ୍ଷରୁ ଆଲୋକୀକରଣ, ୱାଚ ଟାୱାର, ଫାଷ୍ଟ ଏଡ୍, ବିଶ୍ରାମାଗାର, ପିଇବା ପାଣି ଆଦିର ସୁବ୍ୟବସ୍ଥା କରାଯାଇଛି ା ତୃତୀୟ ଲହର ଓମିକ୍ରନ ଓ କରୋନାକୁ ଦୃଷ୍ଟିରେ ରଖି ଜିଲାପ୍ରଶାସନ ପକ୍ଷରୁ ନଦୀପଠା, ନାଳ, ପୋଖରୀ ଆଦି ସ୍ଥାନରେ ମେଳା ମହୋତ୍ସବକୁ ବନ୍ଦ କରିବା ପାଇଁ କଟକଣା ଜାରି କରିଥିଲେ ମଧ୍ୟ ଲୋକେ କଟକଣା ମାନି ନ ଥିଲେ। ଜାଗ ମୟୂରଭଞ୍ଜ ଜାଗ ପକ୍ଷରୁ ମାସ୍କ ଓ ସାନିଟାଇଜର ବଣ୍ଟନ କରାଯାଇଛି ା ବିଭିନ୍ନ ସଙ୍ଗଠନର କର୍ମକର୍ତ୍ତାମାନେ ପହଞ୍ଚି କୋଭିଡ ନିୟମ ପାଳନ କରିବାକୁ ପରାମର୍ଶ ଦେଇଛନ୍ତି ା