ବାହାନଗା, ୨୫ ।୧(ଡି.ଏନ.ଏ.) ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଲାଗି ଶନିବାର ନାମାଙ୍କନପତ୍ର ଯାଞ୍ଚ ପ୍ରକ୍ରିୟା ଥିଲା। ଯାଞ୍ଚ ପରେ ରବିବାର ବ୍ଲକ ଓ ପଞ୍ଚାୟତରେ ସରପଞ୍ଚ ଓ ସମିତି ସଭ୍ୟାସଭ୍ୟମାନଙ୍କର ନାମ ତାଲିକା ପ୍ରକାଶ କରାଯାଇଥାଏ। ସେହି ଅନୁଯାୟୀ ରବିବାର ଅପରାହ୍ନରେ ବାଲେଶ୍ୱର ଜିଲା ବାହାନଗା ବ୍ଲକ ପଣ୍ଡାଶୁଣି ପଞ୍ଚାୟତ କାନ୍ଥରେ ଦୁଇଥର ନାମ ତାଲିକା ପ୍ରକାଶକୁ ନେଇ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା। ଉତ୍ତ୍ୟକ୍ତ ଲୋକମାନେ ଗ୍ରାମ ପଞ୍ଚାୟତ ଅଧିକାରୀଙ୍କୁ ପଞ୍ଚାୟତ କାର୍ଯ୍ୟାଳୟ ଭିତରେ ରଖି ତାଲା ପକାଇ ଦେଇଥିଲେ। ଖନ୍ତାପଡା ଥାନା ଅଧିକାରୀ ଓ ବାହାନଗା ତହସିଲଦାର ପହଞ୍ଚି ଲୋକମାନଙ୍କୁ ବୁଝାଶୁଝା କରି ପଞ୍ଚାୟତ ଅଧିକାରୀଙ୍କୁ ଉଦ୍ଧାର କରିଥିଲେ। ପଣ୍ଡାଶୁଣି ପଞ୍ଚାୟତ ଅଧିକାରିଣୀ ଲିଲିମା ସିଂ ରବିବାର ଚୂଡାନ୍ତ ସରପଞ୍ଚ ପ୍ରାର୍ଥୀମାନଙ୍କ ନାମତାଲିକା ବ୍ଲକରୁ ଆଣି ପଞ୍ଚାୟତ କାନ୍ଥରେ ଲଗାଇଥିଲେ। ପ୍ରଥମେ ୫ଜଣଙ୍କ ନାମ ନୋଟିସ୍ ବୋର୍ଡରେ ଚୂଡାନ୍ତ ତାଲିକାରେ ଲଗାଯାଇଥିବା ବେଳେ ପୁନର୍ବାର ସନ୍ଧ୍ୟା ୬ଟା ପରେ ଅନ୍ୟ ୨ଜଣଙ୍କ ଚୂଡାନ୍ତ ସରପଞ୍ଚ ପ୍ରାର୍ଥୀଙ୍କ ନାମ ନୋଟିସ୍ ବୋର୍ଡରେ ମାରିବାରୁ ଲୋକମାନେ ବିରୋଧ କରିଥିଲେ ା ଉତ୍ତ୍ୟକ୍ତ ଲୋକେ ପଞ୍ଚାୟତ ଅଧିକାରିଣୀ ଲିଲିମା ସିଂଙ୍କୁ ଗ୍ରାମବାସୀ କାର୍ଯ୍ୟାଳୟ ଭିତରେ ତାଲା ପକାଇ ଦେଇଥିଲେ। ଉପରିସ୍ଥ ଅଫିସର ଆସିବା ପରେ ଛଡାଯିବ ବୋଲି ଅଡି ବସିଥିଲେ। ବାହାନଗା ତହସିଲଦାର ରାଜେନ୍ଦ୍ର ନାରାୟଣ କର ଓ ଖନ୍ତାପଡା ଥାନା ଅଧିକାରୀ ନିର୍ମଳ ଚନ୍ଦ୍ର ନାୟକ ସଦଳବଳେ ପଞ୍ଚାୟତ କାର୍ଯ୍ୟାଳୟରେ ପହଞ୍ଚି ଲୋକଙ୍କୁ ବୁଝାଶୁଝା କରିବା ସହିତ ଅଟକ ଅଧିକାରୀଙ୍କୁ ରାତିରେ ଉଦ୍ଧାର କରିଥିଲେ। ପଞ୍ଚାୟତ ଅଧିକାରିଣୀ ଲିଲିମା ସିଂ କହିଥିଲେ ଯେ, ୨ଜଣ ସରପଞ୍ଚ ପ୍ରାର୍ଥୀଙ୍କ ଚୂଡାନ୍ତ ତାଲିକା ରହିଯାଇଥିଲା। ସେ ପ୍ରଥମେ ୫ଜଣଙ୍କ ଚୂଡାନ୍ତ ତାଲିକା ମାରି ସାରିବା ପରେ ଅନ୍ୟ ଦୁଇଜଣଙ୍କ ନାମ ରହିଯାଇଥିବା ବ୍ଲକରୁ ଫୋନ ଆସିଥିଲା। ବ୍ଲକକୁ ଯାଇ ସେ ଦୁଇଟି ନାମକୁ ଆଣି କାନ୍ଥରେ ନୋଟିସ୍ ବୋର୍ଡରେ ମାରିଥିଲି। ତେବେ ପଛରେ ମରାଯାଇଥିବା ଦୁଇଜଣଙ୍କ ନାମକୁ ଲୋକମାନେ କାନ୍ଥରୁ ବାହାର କରିଦେଇଥିବା ଜଣାପଡିଛି।
