ପାରଳାଖେମୁଣ୍ଡି, ୧ା୧୦(ଡି.ଏନ୍.ଏ.): ପାରଳାଖେମୁଣ୍ଡି ସହରଠାରୁ ମାତ୍ର ୧୦କିମି ଦୂରରେ ଥିବା କାଶୀନଗର ବ୍ଲକ କେ.ସୀତାପୁର ପଞ୍ଚାୟତ ଅନ୍ତର୍ଗତ ମିନିଗାଁଗୁଡ଼ା ଗ୍ରାମରେ ମୌଳିକ ସୁବିଧା ନ ଥିବା ନେଇ ଅଭିଯୋଗ ହୋଇଛି। କେ.ସୀତାପୁର ସରପଞ୍ଚ କେ.ତେଜେଶ୍ୱରରାଓଙ୍କ ନେତୃତ୍ୱରେ ଗ୍ରାମବାସୀମାନେ ମିଳିତ ଭାବେ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ଗ୍ରାମକୁ ମୌଳିକ ସୁବିଧା ଯୋଗାଇ ଦେବା ଦାବିରେ ବିକ୍ଷୋଭ ପ୍ରଦର୍ଶନ କରିଥିଲେ। ଏହି ଗ୍ରାମରେ ବହୁଳ ମାତ୍ରାରେ ଆଦିବାସୀ ପରିବାର ବସବାସ କରନ୍ତି। ଦେଶ ସ୍ବାଧୀନତା ପରଠାରୁ ଗ୍ରାମକୁ ପକ୍କା ସଡ଼କ, ପାନୀୟ ଜଳ ସୁବିଧା, ଶିକ୍ଷା, ସ୍ବାସ୍ଥ୍ୟ, ଆଲୋକିକରଣ ଆଦିର ବ୍ୟବସ୍ଥା ହୋଇପାରିନି। ଯାହାକି ଜିଲା ସଦର ମହକୁମାଠାରୁ ମାତ୍ର ୧୦କିମି ଦୂରରେ ରହିଥିଲେ ମଧ୍ୟ ବ୍ଲକ ପ୍ରଶାସନଠାରୁ ଆରମ୍ଭ କରି ଜିଲା ପ୍ରଶାସନ ଦୃଷ୍ଟି ନିକ୍ଷେପ କରୁନାହାନ୍ତି। ଏ ନେଇ ବାରମ୍ବାର ଅଭିଯୋଗ କରାଯାଉଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଜିଲା ସଦର ମହକୁମାଠାରୁ ୧୦କିମି ଏବଂ ମୁଖ୍ୟ ରାସ୍ତାଠାରୁ ମାତ୍ର ୨ରୁ୩ କିମି ଦୂରତାରେ ରହିଥିଲେ ମଧ୍ୟ ଲୋକେ ବିଲହୁଡା ଦେଇ ଚାଲି ଚାଲି ଯିବା ଆସିବା କରିଥାନ୍ତି। ରାସ୍ତା ନ ଥିବାରୁ ରୋଗୀ ଓ ଗର୍ଭବତୀ ଅବସ୍ଥା ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ବିଶେଷ କରି ବର୍ଷା ଦିନରେ ସମ୍ପୂର୍ଣ୍ଣ ଗ୍ରାମକୁ ଏକ ପ୍ରକାର ଯୋଗାଯୋଗ ବିଚ୍ଛିନ୍ନ ହୋଇପଡୁଥିବାର ଜଣାଇଛନ୍ତି। ତେଣୁ ଏହି ସମସ୍ୟାଗୁଡିକର ସମାଧାନ କରିବା ପାଇଁ ପ୍ରଶାସନକୁ ଗ୍ରାମବାସୀ ନିବେଦନ କରିଛନ୍ତି।