କୋକସରା,୨୨।୪(ଡି.ଏନ୍.ଏ.): କଳାହାଣ୍ଡି ଜିଲା କୋକସରା ବ୍ଲକ ବଡପୋଡାଗୁଡା ପଞ୍ଚାୟତର ୧୩ ନମ୍ବର ୱାର୍ଡର ସୋଭାଗ୍ୟପଡାରେ ନଳକୂପ ନ ଥିବାରୁ ବର୍ଷ ତମାମ ପଡାବାସୀ ଜଳକଷ୍ଟ ଭୋଗୁଛନ୍ତି । ଦୀର୍ଘ ୭ ବର୍ଷ ହେବ ପଡା ବସତି ହୋଇଥିବା ବେଳେ ବାରମ୍ବାର ପ୍ରଶାସନ ପାଖରେ ନଳକୂପ ପାଇଁ ଗୁହାରି କରିଥିଲେ ମଧ୍ୟ କାହାରି ଦୃଷ୍ଟି ପଡିନାହିଁ। ପଡାରେ ୩୦ରୁ ଊର୍ଦ୍ଧ୍ୱ ପରିବାର ରହୁଥିବା ବେଳେ ବର୍ଷ ତମାମ ପାନୀୟ ଜଳ ପାଇଁ ନିକଟସ୍ଥ ମୁଟ୍ରା ନଦୀ ଉପରେ ଭରସା କରନ୍ତି।
ପ୍ରତିଦିନ ନଦୀର ଦୂଷିତ ପାଣି ଲୋକେ ବ୍ୟବହାର କରୁଥିବାରୁ ଅନେକ ରୋଗର ଶିକାର ମଧ୍ୟ ହେଉଥିବା ପଡାବାସୀ ଅଭିଯୋଗ କରିଛନ୍ତି। ଏବେ ଖରାଦିନ ପାଣି ପାଇଁ ପଡାବାସୀ ଜଳକଷ୍ଟ ଭୋଗୁଥିବା ବେଳେ ଧୀରେ ଧୀରେ ନଦୀ ମଧ୍ୟ ଶୁଖିବାକୁ ବସିଛି। ଏଭଳି ସ୍ଥିତିରେ ଜଳ ସମସ୍ୟା ସମାଧନ କରା ନ ଗଲେ ପଡାରେ ଆଗାକୁ ଉତ୍କଟ ଜଳ ସମସ୍ୟା ଧାରଣ କରିବ ଏଥିରେ ସନ୍ଦେହ ନାହିଁ। ତୁରନ୍ତ ପଡାରେ ନଳକୂପ ଖନନ ପାଇଁ ପଡାବାସୀ ଦାବି କରିଛନ୍ତି। ଏ ନେଇ କୋକସରା ବିଡିଓ ମନୀଷା ଦାସଙ୍କ ପ୍ରତିକ୍ରିୟା ନେବାରୁ ଆମ ନଜରରେ ଆସି ନ ଥିଲା। ତଦନ୍ତ ପରେ ତୁରନ୍ତ ନଳକୂପ ଯୋଗାଇ ଦିଆଯିବ ବୋଲି କହିଛନ୍ତି।