ଓ୍ବାଶିଂଟନ, ୨୦ା୩: ବିଶ୍ୱର ସବୁଠାରୁ ଖସି ଦେଶର ତାଲିକା ପ୍ରକାଶ ପାଇଛି। ଏଥିରେ ଫିନ୍ଲାଣ୍ଡ ପୁଣି ଶୀର୍ଷରେ ରହିଛି। ଫିନ୍ଲାଣ୍ଡ ଗତ ୬ବର୍ଷରୁ ଲଗାତର ଏହି ତାଲିକାର ଶୀର୍ଷରେ ରହିଆସିଛି। ବିଶ୍ୱ ହାପିନେସ୍ ବାର୍ଷିକ ରିପୋର୍ଟରେ ଫିନ୍ଲାଣ୍ଡକୁ ସବୁଠୁ ସୁଖୀ ଦେଶ ଭାବେ ଦର୍ଶାଯାଇଛି। ମୁଣ୍ଡପିଛା ଜିଡିପି, ସାମାଜିକ ସମର୍ଥନ, ଉଦାରତା, ସୁସ୍ଥ ଜୀବନ, ସ୍ବାଧୀନତା ଓ ସର୍ବନିମ୍ନ ଦୁର୍ନୀତିକୁ ମାପଦଣ୍ଡ ଭାବେ ନେଇ ସୁଖୀ ରାଷ୍ଟ୍ର ଚୟନ କରାଯାଇଥାଏ। ବିଶ୍ୱ ହାପିନେସ୍ ଡେ’ ପାଳନ ଅବସରରେ ସୋମବାର ଏହି ରିପୋର୍ଟ ପ୍ରକାଶ ପାଇଛି। ଏଥିରେ ୧୨୫ତମ ସ୍ଥାନରେ ରହିଛି ଭାରତ। ୧୫୦ରୁ ଊର୍ଦ୍ଧ୍ୱ ଦେଶର ଲୋକଙ୍କଠାରୁ ସଂଗୃହୀତ ତଥ୍ୟ ଆଧାରରେ କରାଯାଇଥିବା ସର୍ଭେରୁ ଏହା ଜଣାପଡ଼ିଛି। ଜାତିସଂଘର ସ୍ଥାୟୀ ବିକାଶ ସମାଧାନ ନେଟ୍ଓ୍ବର୍କ ପକ୍ଷରୁ ଉକ୍ତ ରିପୋର୍ଟ ପ୍ରକାଶ ପାଇଛି। ତେବେ ଶ୍ରେଷ୍ଠ ୨୦ ସୁଖୀ ଦେଶ ତାଲିକାରେ କୌଣସି ଏସିଆ ଦେଶ ସାମିଲ ନାହିଁ। ଶେଷ୍ଠ ୨୦ ଖୁସି ଦେଶ ତାଲିକାରେ ପ୍ରଥମରେ ଫିନ୍ଲାଣ୍ଡ୍, ଡେନ୍ମାର୍କ ଦ୍ୱିତୀୟ ସ୍ଥାନରେ ଥିବା ବେଳେ ଆଇସ୍ଲାଣ୍ଡ ତୃତୀୟରେ, ଚତୁର୍ଥରେ ସ୍ବୀଡେନ ଏବଂ ପଞ୍ଚମରେ ନରଓ୍ବେ ରହିଛି। କୋଭିଡ୍-୧୯ ମହାମାରୀରେ ଉପରୋକ୍ତ ଦେଶଗୁଡ଼ିକରେ ଅନେକ ଲୋକଙ୍କ ଜୀବନ ଯାଇଥିଲେ ମଧ୍ୟ ଖୁସି କମିନାହିଁ। ଅନ୍ୟପକ୍ଷରେ ଭାରତ ଅର୍ଥନୀତିରେ ଦ୍ରୁତ ଅଭିବୃଦ୍ଧି କରୁଥିଲେ ମଧ୍ୟ ଏହା ହାପିନେସ୍ ତାଲିକାରେ ନେପାଳ, ଚାଇନା, ବାଂଲାଦେଶ ଏବଂ ଶ୍ରୀଲଙ୍କା ତଳେ ରହିଛି। କୌତୂହଳର ବିଷୟ ରୁଷିଆ-ୟୁକ୍ରେନ୍ ଯୁଦ୍ଧ ଯୋଗୁ ସେମାନଙ୍କ ର଼୍ୟାଙ୍କିଙ୍ଗ ହ୍ରାସ ପାଇଥିଲେ ମଧ୍ୟ ଉଭୟ ଦେଶ ଭାରତଠାରୁ ଯଥେଷ୍ଟ ଉପରେ ରହିଛନ୍ତି। ରୁଷିଆ ହାପିନେସ୍ ତାଲିକାରେ ୭୨ତମ ସ୍ଥାନରେ ଥିବା ବେଳେ ୟୁକ୍ରେନ ୯୨ତମ ସ୍ଥାନରେ ରହିଛି।
