ଦାରିଙ୍ଗବାଡ଼ି,୩ା୧୧ଅରୁଣ ସାହୁ): ମାଣ୍ଡିପଙ୍କାରେ ଆମ୍ବଟାକୁଆ ଖାଇବା ଘଟଣାରେ ୨ ଜଣଙ୍କ ମୃତ୍ୟୁ ଏବଂ ୬ ଜଣ ଏବେ ମଧ୍ୟ ଚିକିତ୍ସାଧୀନ ଅବସ୍ଥାରେ ଅଛନ୍ତି। ଏଭଳି ଅଭାବନୀୟ ଘଟଣା ଘଟିବା ପରେ ମାଣ୍ଡିପଙ୍କାକୁ ନେତା, ଅଫିସରଙ୍କ ସୁଅ ଛୁଟିଛି। ଶନିବାର ଜି.ଉଦୟଗିରି ବିଧାୟକ ପ୍ରଫୁଲ ଚନ୍ଦ୍ର ପ୍ରଧାନ ମାଣ୍ଡିପଙ୍କା ଗସ୍ତ କରି ମୃତକ ଓ ଗୁରୁତରଙ୍କ ପରିବାର ଲୋକଙ୍କୁ ଭେଟିବା ପରେ ସେ ଏକ ଖବରଦାତା ସମ୍ମିଳନୀକୁ ସମ୍ବୋଧିତ କରି କହିଛନ୍ତି ଯେ, ଲୋକଙ୍କୁ କୌଣସି ସଉକ ନାହିଁ ଆମ୍ବଟାକୁଆ ଖାଇବାକୁ , ଭୋକ ମେଣ୍ଟାଇବାକୁ ସେମାନେ ଆମ୍ବଟାକୁଆ ଖାଉଛନ୍ତି। ସମସ୍ତ ପଞ୍ଚାୟତରେ ସଠିକ୍ ସମୟରେ ଚାଉଳ ବଣ୍ଟନ କରାଯାଉନାହିଁ କାହିଁକି ଏଭଳି ଅବହେଳା କରାଯାଉଛି। ସେ ଜିଲାପାଳଙ୍କ ସହ କଥା ହେବେ ବୋଲି କହିବା ସହ ଯୋଗାଣ ବିଭାଗକୁ ସେ ଏଥିପାଇଁ ଦାୟୀ କରିଛନ୍ତି। ସବୁଠାରୁ ଆଶ୍ଚର୍ଯ୍ୟକର କଥା ହେଲା ଏଠାକାର ଲୋକେ ୨ ଟଙ୍କାର ପାରାସିଟାମଲ କିଣିବାକୁ ୨୦୦ ଟଙ୍କା ଖର୍ଚ୍ଚ କରୁଛନ୍ତି। ହାତପାହାନ୍ତାରେ କୌଣସି ସୁବିଧା ନ ଥିବାରୁ ଲୋକଙ୍କୁ ଦୂରକୁ ଯାଇ ଔଷଧପତ୍ର କିଣିବାକୁ ପଡୁଛି। ଏଥିପ୍ରତି ମଧ୍ୟ ସରକାର ଧ୍ୟାନ ଦେବା ଉଚିତ ବୋଲି ବିଧାୟକ କହିଛନ୍ତି।
ସେହିପରି ବ୍ରାହ୍ମଣୀଗାଁର ୮ଟି ପଞ୍ଚାୟତ ଅତି ଦୁର୍ଗମ ଅଞ୍ଚଳରେ ରହିଛି ଏହାର ବିକାଶ ପାଇଁ ବ୍ରାହ୍ମଣୀଗାଁକୁ ସରକାର ବ୍ଲକ ଘୋଷଣା କରନ୍ତୁ ବୋଲି ତାଙ୍କ ଦାବି ଦୋହରାଇଛନ୍ତି। ସେ ପୂର୍ବରୁ ରାଜ୍ୟ ସରକାରଙ୍କୁ ଲିଖିତ ଭାବେ ଜଣାଇଥିବା କହିଛନ୍ତି।