ବଲାଙ୍ଗୀର ଅଫିସ, ୧୪ା୪: ବଲାଙ୍ଗୀର ସହରର ସର୍ବବୃହତ୍ ଜଳାଶୟ ମହାରାଣୀ ସାଗର ସବୁଠୁ ପ୍ରଦୂଷିତ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ ରିପୋର୍ଟ ଦିଆଯାଇଥିଲା। ଏହି ଜଳାଶୟର ଉନ୍ନତିକରଣ ଏବଂ ସୌନ୍ଦର୍ଯ୍ୟକରଣ ପାଇଁ ୨୦କୋଟିରୁ ଉର୍ଦ୍ଧ୍ୱ ଟଙ୍କା ଅଣାଯାଇଛି। ଏଥିପାଇଁ ଶିଳାନ୍ୟାସ କରାଯାଇଥିଲା। କାମ ଆରମ୍ଭ ହେବା କଥା। ହେଲେ ଖୋଦ୍ ପୌର ପରିଷଦ ଏହାକୁ ବିରୋଧ କରିଥିଲା। ମହାରାଣୀ ସାଗର ସୌନ୍ଦର୍ଯ୍ୟକରଣ ପ୍ରକଳ୍ପ ସହ ସେହି ଅଞ୍ଚଳରେ ନୂଆ ଜିଲାପାଳ କାର୍ଯ୍ୟାଳୟ ଓ ସିଭିଲ କୋର୍ଟ କୋଠା ତିଆରି ହେବା କଥା। ଏହି ପ୍ରକଳ୍ପ କାର୍ଯ୍ୟକାରୀ ହେଲେ ଅଳ୍ପ କେତେଜଣ ଗରିବ ଲୋକ ବିସ୍ଥାପିତ ହେବେ। ସେମାନଙ୍କୁ ଥଇଥାନ କରାଯିବା ପାଇଁ ସମସ୍ତ ବ୍ୟବସ୍ଥା ହୋଇଥିଲା। ମାତ୍ର ପୌର ପରିଷଦ ଗରିବ ଲୋକଙ୍କ ନଁାରେ ସେଠାରେ ସେଇ ସବୁ ଗୁରୁତ୍ୱପୂର୍ଣ୍ଣ ପ୍ରକଳ୍ପ ତିଆରିକୁ ବିରୋଧ କରିଛି। ଫଳରେ ସେସବୁ ପ୍ରକଳ୍ପ ଅନୁଦାନ ଥିବା ସତ୍ତ୍ୱେ ବନ୍ଦ ହୋଇପଡିଛି। ଏବେ ବଲାଙ୍ଗୀର ଜନସାଧାରଣ ନିଷ୍ପତ୍ତି ନେବେ ଯେ ସେସବୁ ପ୍ରକଳ୍ପ କାର୍ଯ୍ୟକାରୀ ହେବା କଥା କି ନୁହଁ। ଲୋକେ ଚାହିଁଲେ ପ୍ରକଳ୍ପ ହେବ ଏବଂ ଲୋକେ ନ ଚାହିଁଲେ ବ୍ୟକ୍ତିଗତ ଭାବେ କ’ଣ କରାଯାଇପାରିବ ବୋଲି ବିଧାୟକ ନରସିଂହ ମିଶ୍ର ବୁଧବାର ସ୍ଥାନୀୟ ସର୍କିଟ ହାଉସଠାରେ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନର ଉତ୍ତର ଦେଇ କହିଥିଲେ। ଆୟୋଜିତ ଏକ ବନ୍ଧୁମିଳନ କାର୍ଯ୍ୟକ୍ରମରେ ସେ ଆହୁରି କହିଥିଲେ ଯେ, ଯେଉଁ ଅଞ୍ଚଳରେ ଏହି ସବୁ ପ୍ରକଳ୍ପ କାର୍ଯ୍ୟକାରୀ କରାଯିବା ପ୍ରସ୍ତାବ ରହିଛି ସେଠାରେ ଗରିବ ଲୋକଙ୍କ ଅପେକ୍ଷା ବେଶୀ ପରିମାଣରେ ଧନୀ ଲୋକ ରହୁଛନ୍ତି। ବିଶେଷକରି ପୋଲିସ ଚାକିରିଆ ଦ୍ୱିତଳ କୋଠା ତିଆରି ଭଡାରେ ଲଗାଇଛନ୍ତି ବୋଲି କହିଥିଲେ। ଲକ୍ଷ୍ମୀଯୋର ପ୍ରକଳ୍ପର ୧୪ କୋଟି ଟଙ୍କା ପଡିରହିଛି। ଗନ୍ଧରେଲ ପ୍ରକଳ୍ପର ୩ କୋଟି ଟଙ୍କା ପଡିରହିଛି। ଏହା କାର୍ଯ୍ୟକାରୀ କରିବା ପରିବର୍ତ୍ତେ ଏହାକୁ ଜାଣିଶୁଣି ବିରୋଧ କରାଯାଉଛି। ଜଣେ ବିଧାୟକ ଭାବେ ଅନୁଦାନ ସିନା ଆଣିବେ ପୌର ପରିଷଦ ଓ ଜିଲା ପ୍ରଶାସନ ଯଦି ଏଭଳି ପ୍ରକଳ୍ପକୁ କାର୍ଯ୍ୟକାରୀ ନକରି ଏହାକୁ ବିରୋଧ କରିବେ ଏବଂ ଲୋକେ ଯଦି ଚୁପ୍ ରହିବେ ତେବେ ସେ କ’ଣ କରିବେ ବୋଲି ଗଣମାଧ୍ୟମ ପ୍ରତିନିଧିଙ୍କୁ ଓଲଟା ପ୍ରଶ୍ନ କରିଥିଲେ। ଏହି ଅବସରରେ ବିଧାୟକ ମିଶ୍ର ପର୍ଯ୍ୟଟନସ୍ଥଳୀ ଭୀମଡୁଙ୍ଗୁରିର ଉନ୍ନତିକରଣ, ଚାନ୍ଦଲି ପାହାଡର ଉନ୍ନତିକରଣ ଦିଗରେ ନିଆଯାଇଥିବା ବିଭିନ୍ନ ପଦକ୍ଷେପ ସମ୍ପର୍କରେ କହିଥିଲେ। ୨୦୨୪ ନିର୍ବାଚନ ଲଢ଼ିବେ ନାହିଁ, ମାତ୍ର ଲୋକଙ୍କ ସେବା ପାଇଁ ଆଜୀବନ ରାଜନୀତିରେ ସେ ସକ୍ରିୟ ରହିବେ ବୋଲି କହିଥିଲେ।