![](https://www.dharitri.com/wp-content/uploads/2023/01/er-1.jpg)
ରାୟଗଡ଼ା,୯ା୧(ସ୍ବ.ପ୍ର.): ରାୟଗଡ଼ା ବ୍ଲକ କେରଡ଼ା ପଞ୍ଚାୟତ ଅନ୍ତର୍ଗତ ଖିଲମିସଗୁଡ଼ା ଏବଂ ୧୮ଖଣ୍ଡ ଗ୍ରାମବାସୀଙ୍କ ଗମନାଗମନ ସମସ୍ୟାରେ ସୁଧାର ଆସୁନି। ରୋଗୀ ଏବଂ ଗର୍ଭବତୀ ଏବେବି ବୁହା ହେଉଛନ୍ତି। ରବିବାର ଝାଡ଼ାବାନ୍ତିରେ ଆକ୍ରାନ୍ତ ଖିଲମିସଗୁଡ଼ା ଗ୍ରାମର ସତ୍ୟବତୀ ମାଣ୍ଡାଙ୍ଗି(୬୦)ଙ୍କୁ ଷ୍ଟ୍ରେଚରରେ ବୋହି ନଦୀପାର ହୋଇ ଜେମାଦେଇପେଣ୍ଠ ପ୍ରାଥମିକ ଚିକିତ୍ସା କେନ୍ଦ୍ରରେ ଭର୍ତ୍ତି କରାଯାଇଛି।
ସୂଚନା ଅନୁଯାୟୀ, ଝାଡ଼ାବାନ୍ତି ଯୋଗୁ ସକାଳେ ସତ୍ୟବତୀ ଗୁରୁତର ହୋଇ ପଡ଼ିଥିଲେ। ନାଗାବଳୀ ନଦୀ ଉପରେ ପୋଲ କିମ୍ବା ଅନ୍ୟ ରାସ୍ତାର ସୁବିଧା ନ ଥିବାରୁ ଗାଁକୁ ଆମ୍ବୁଲାନ୍ସ ଡାକିବା ସମ୍ଭବ ନ ଥିଲା। ପରିବାର ଲୋକେ ବାଧ୍ୟହୋଇ ଗ୍ରାମବାସୀଙ୍କ ସହାୟତାରେ ଷ୍ଟ୍ରେରରରେ ବୋହି ନାଗାବଳୀ ନଦୀ ପାର ହୋଇଥିଲେ। ଖିଲମିସଗୁଡ଼ା ଏବଂ ୧୭ଖଣ୍ଡ ଗ୍ରାମ ନଦୀ ଆରପାରିରେ ରହିଥିବାବେଳେ ୨୦୧୯ରୁ ବିଜୁସେତୁ ଯୋଜନାରେ ପୋଲ ନିର୍ମାଣ କାମ ଅଧାପନ୍ତରିଆ ରହିଛି। ଗ୍ରାମବାସୀ ଏଥିପାଇଁ ବହୁ ସମସ୍ୟାର ସମ୍ମୁଖୀନ ହେଉଛନ୍ତି। ହେଲେ ଏଥିପ୍ରତି କେହି ଦୃଷ୍ଟି ଦେଉ ନ ଥିବା ଗ୍ରମବାସୀ ଅଭିଯୋଗ କରିଛନ୍ତି।