ଶିଲଂ,୧୨।୪ : ମେଘାଳୟର ଏକ ଜିଲା ପରିଷଦ ମାତୃକେନ୍ଦ୍ରିକ ବ୍ୟବସ୍ଥାକୁ ମଜବୁତ କରିବାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି। ପାରମ୍ପାରିକ ଖାସି ଗ୍ରାମ ମୁଖିଆମାନଙ୍କୁ କେବଳ ସେମାନଙ୍କ ମାତାଙ୍କର ଉପନାମ ବ୍ୟବହାର କରୁଥିବା ଲୋକଙ୍କୁ ଆଦିବାସୀ ପ୍ରମାଣପତ୍ର ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି।
କେଏଚଏଡିସିର କାର୍ଯ୍ୟନିର୍ବାହୀ ସଦସ୍ୟ ଜମ୍ବୋର ଓ୍ବାର କହିଛନ୍ତି, ଆମେ ଖାସି ପାହାଡ ସାୟତ୍ତ ଜିଲା ଖାସି ସୋସିଆଲ କଷ୍ଟମ ଅଫ ଲାଇନ ଆକ୍ଟ, ୧୯୯୭ର ଧାରା ୩ ଏବଂ ୧୨ ଅନୁଯାୟୀ ଆଦିବାସୀ ପ୍ରମାଣପତ୍ର ପ୍ରଦାନ କରିବାକୁ ପାରମ୍ପାରିକ ଗ୍ରାମ ମୁଖ୍ୟମାନଙ୍କୁ ନିର୍ଦ୍ଦେଶ ଦେଇଛୁ। ଏହା ଅନୁଯାୟୀ ମାତାଙ୍କର ଉପନାମ ବ୍ୟବହାର କରାଯିବା ଜରୁରୀ। ଯେଉଁମାନେ ଆମର ଏପରି ଅଭ୍ୟାସ ଅନୁସରଣ କରନ୍ତି, ସେମାନେ ଖାସି ଭାବରେ ମାନ୍ୟତା ପାଇବେ।
ଖାସିଙ୍କ ଦ୍ୱାରା ପାଳନ କରାଯାଉଥିବା ମାତୃକେନ୍ଦ୍ରିକ ବ୍ୟବସ୍ଥାର ସୁରକ୍ଷା, ସଂରକ୍ଷଣ ଏବଂ ମଜବୁତ କରିବା ପାଇଁ ଏହି ନିର୍ଦ୍ଦେଶ ଦିଆଯାଇଛି ବୋଲି ସେ କହିଛନ୍ତି। ଯେଉଁମାନେ ସେମାନଙ୍କର ପିତାଙ୍କ ଉପନାମ ବ୍ୟବହାର କରୁଛନ୍ତି ସେମାନଙ୍କୁ ଖାସି ଭାବରେ ବିବେଚନା କରାଯିବ ନାହିଁ। ଏହା ଉପରେ ପାରମ୍ପାରିକ ମୁଖ୍ୟ ସେମାନଙ୍କ ପାଇଁ ଆଦିବାସୀ ପ୍ରମାଣପତ୍ର ନ ଦେବାକୁ ନିର୍ଦ୍ଦେଶ ଦେଇଛନ୍ତି। ସେ କହିଛନ୍ତି ଯେ ପରିଷଦ ପାରମ୍ପାରିକ ଗ୍ରାମ ମୁଖ୍ୟମାନଙ୍କୁ ରାଜନୀତିରେ ସକ୍ରିୟ ଅଂଶଗ୍ରହଣ କରିବାକୁ କିମ୍ବା କୌଣସି ରାଜନୈତିକ ଦଳର ସଦସ୍ୟ ହେବାକୁ ବାରଣ କରିଛି।
ଯଦି ପାରମ୍ପାରିକ ମୁଖିଆ ରାଜନୀତିରେ ଜଡିତ ହୁଅନ୍ତି, ତେବେ ଏହା ଗାଁ, ସେମାନଙ୍କର କାର୍ଯ୍ୟକଳାପ ଏବଂ ବିକାଶ ଉପରେ ପ୍ରଭାବ ପକାଇପାରେ ବୋଲି ସେ କହିଛନ୍ତି।