ସମ୍ବଲପୁର,୧୪ା୧(ପ୍ରମୋଦ ବହିଦାର): ଗ୍ରାମାଞ୍ଚଳରେ ରାଶନ କାର୍ଡ ନ ଥିବା ଲୋକେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ସାମିଲ ହୋଇପାରିବେ ବୋଲି ୫-ଟି ଓ ନବୀନ ଓଡ଼ିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ କହିଛନ୍ତି। ସମ୍ବଲପୁର ରେମେଡଠାରେ ଏକ ସାଧାରଣ ସଭାରେ ଯୋଗଦେଇ ସେ ଏହି ଘୋଷଣା କରିଛନ୍ତି। ପାଣ୍ଡିଆନ ସମ୍ବଲପୁରରେ ପହଞ୍ଚତ୍ବା ପରେ ଉତ୍ତରାଞ୍ଚଳ ରାଜସ୍ବ କମିଶନର ଡ. ସୁରେଶ ଚନ୍ଦ୍ର ଦଳେଇ, ଆଇଜି ଦୀପକ କୁମାର, ଜିଲାପାଳ ଅନନ୍ୟା ଦାସ, ଆରକ୍ଷୀ ଅଧୀକ୍ଷକ ମୁକେଶ ଭାମୁଙ୍କ ସମେତ ବିଜେଡି ସମ୍ବଲପୁର ଜିଲା ସଭାପତି ରୋହିତ ପୂଜାରୀ, ସମଲେଶ୍ୱରୀ ମନ୍ଦିର ଟ୍ରଷ୍ଟବୋର୍ଡ ସଭାପତି ସଞ୍ଜୟ ବାବୁ, ସିଦ୍ଧାର୍ଥ ଦାସ, ସଞ୍ଜିତ ମହାନ୍ତି, ସମ୍ବଲପୁର ନିର୍ବାଚନମଣ୍ଡଳୀ ପର୍ଯ୍ୟବେକ୍ଷକ ସୌଭାଗ୍ୟ ରଞ୍ଜନ ନାୟକ ପ୍ରମୁଖ ତାଙ୍କୁ ସ୍ବାଗତ କରିଥିଲେ।
ଆୟୋଜିତ ସାଧାରଣ ସଭାରେ ସମବେତ ଜନତାଙ୍କୁ ପାଣ୍ଡିଆନ ସମ୍ବୋଧିତ କରି ରାଜ୍ୟ ସରକାରଙ୍କ ଦ୍ୱାରା ନିର୍ମାଣାଧୀନ ସମଲେଇ ପ୍ରକଳ୍ପରେ ଆପଣମାନେ ଖୁସି ତ ବୋଲି ପଚାରିଥିଲେ। ସେ କହିଥିଲେ, ଗତ ଜୁଲାଇରେ ତାଙ୍କ ଗସ୍ତ ସମୟରେ ବିଭିନ୍ନ ଉନ୍ନୟନମୂଳକ କାର୍ଯ୍ୟ ପାଇଁ ପ୍ରାୟ ୮୪୦ଟି ଦରଖାସ୍ତ ତାଙ୍କର ହସ୍ତଗତ ହୋଇଥିଲା।
ସେଥିମଧ୍ୟରୁ ଏପର୍ଯ୍ୟନ୍ତ ୭୫୦ଟି ଦରଖାସ୍ତର ସମାଧାନ ହୋଇଛି। ସେହିପରି ସମଗ୍ର ସମ୍ବଲପୁର ନିର୍ବାଚନମଣ୍ଡଳୀରୁ ତାଙ୍କୁ ମିଳିଥିବା ୨୯୦୦ଟି ଦରଖାସ୍ତ ମଧ୍ୟରୁ ୨୬୦୦ଟିର ସମାଧାନ ପାଇଁ ୩୨୫ କୋଟି ଟଙ୍କା ମଞ୍ଜୁର କରାଯାଇଛି। ୭ ମାସ ମଧ୍ୟରେ ଏହା ହେଉଛି ରାଜ୍ୟରେ ସର୍ବାଧିକ ଅର୍ଥ ମଞ୍ଜୁରୀ ବୋଲି ସେ କହିଛନ୍ତି। ଏହି ଅବସରରେ ସେ ରାଶନ କାର୍ଡ ନ ଥିବା ଗ୍ରାମାଞ୍ଚଳ ଲୋକଙ୍କୁ ବିଜୁ ସ୍ବାସ୍ଥ୍ୟକାର୍ଡ ପ୍ରଦାନ କରାଯିବ ବୋଲି ଘୋଷଣା କରି ଖୁବ୍ଶୀଘ୍ର ସହରାଞ୍ଚଳରେ ମଧ୍ୟ ଏହି ଯୋଜନା ଲାଗୁ କରାଯିବ ବୋଲି କହିଥିଲେ।
ଏହାସହ ସମ୍ବଲପୁରର ପ୍ରତ୍ୟେକ ପଞ୍ଚାୟତକୁ ଲକ୍ଷ୍ମୀ ବସ୍ ସେବା ଯୋଗାଇ ଦିଆଯିବ। ଏହି ବସ୍ ପ୍ରତ୍ୟେକ ପଞ୍ଚାୟତକୁ ପ୍ରତିଦିନ ୩ଥର ଲେଖାଏ ଚାଲିବ। ଏଥିରେ ମହିଳା, ଯୁବତୀ ଓ ଛାତ୍ରୀଛାତ୍ରଙ୍କ ପାଇଁ ଟିକେଟ ମୂଲ୍ୟ ୫ଟଙ୍କା ଧାର୍ଯ୍ୟ କରାଯାଇଛି। ଏହାସହ ସମ୍ବଲପୁର ସହରବାସୀ ଖୁବଶୀଘ୍ର କ୍ରୁଜ୍ ବସ୍ ସେବା ପାଇବେ ବୋଲି ସେ ସୂଚନା ଦେଇଥିଲେ।
ତେବେ ଜମାଦାରପାଲି ନିକଟରେ ହାଇଟେକ୍ ସର୍ଭେ ପାଇଁ ସ୍ଥାନୀୟ ଲୋକଙ୍କ ଦାବି ଅନୁସାରେ ନୋଟିଫିକେଶନ ହୋଇସାରିଛି ଓ ଖୁବ୍ଶୀଘ୍ର ଏହି କାର୍ଯ୍ୟ ଆରମ୍ଭ ହେବ ବୋଲି କହିଥିଲେ। ଏହି ଅବସରରେ ସେ ସଭାରେ ଉପସ୍ଥିତ ଥିବା ଜନସାଧାରଣଙ୍କ ନିକଟକୁ ଯାଇ ସେମାନଙ୍କ ଠାରୁ ବିଭିନ୍ନ ସମସ୍ୟାଭିତ୍ତିକ ଦରଖାସ୍ତ ଗ୍ରହଣ କରିବା ସହ ସମସ୍ତଙ୍କ ସହ ସେଲ୍ଫି ଉଠାଇଥିବା ଦେଖିବାକୁ ମିଳିଥିଲା। ଏଠାରୁ ସେ କିଲାସମା ଗସ୍ତ କରି ସେଠାରେ ଷ୍ଟାଡିୟମରେ ଏକ ସାଧାରଣ ସଭାରେ ଯୋଗଦେଇ ଉଦ୍ବୋଧନ ଦେଇଥିଲେ। ସେଠାରୁ ଏମ୍ସିଏଲ୍ ଆସି ସଡ଼କପଥରେ ସମ୍ବଲପୁରସ୍ଥିତ ସର୍କିଟ୍ ହାଉସକୁ ଯାଇଥିଲେ। ଏହି ସମୟରେ ବିଭିନ୍ନ ଛକରେ ତାଙ୍କୁ ଦଳୀୟ କର୍ମୀ ଓ ସମର୍ଥକଙ୍କ ପକ୍ଷରୁ ସ୍ବାଗତ କରାଯାଇଥିଲା। ଏଠାରେ ସେ ବିଭିନ୍ନ ସଂଗଠନର କର୍ମକର୍ତ୍ତାଙ୍କୁ ସାକ୍ଷାତ କରି ସେମାନଙ୍କଠାରୁ ଦାବିପତ୍ର ଗ୍ରହଣ କରିଥିଲେ।