ଭୋପାଳ,୪।୯: ମଧ୍ୟପ୍ରଦେଶରେ ବିଧାନସଭା ନିର୍ବାଚନ ପାଇଁ ସଜବାଜ ଆରମ୍ଭ ହୋଇଯାଇଛି। ଏହାପୂର୍ବରୁ ରାଜନୈତିକ ଦଳର ନେତାଙ୍କ ମଧ୍ୟରେ ବାକ୍ଯୁଦ୍ଧ ତୀବ୍ର ହୋଇଛି। କଂଗ୍ରେସ ରାଜ୍ୟ ସଭାପତି କମଲ ନାଥ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କୁ ସୋସିଆଲ ମିଡିଆ ଜରିଆରେ ଟାର୍ଗେଟ୍ କରିଛନ୍ତି। ଭାଜପା ଶାସନ ଅଧୀନରେ ଲୋକଙ୍କ ଜୀବନ ଖରାପରୁ ଅତି ଖରାପ ହୋଇଯାଇଥିବା ସେ କହିଛନ୍ତି।
କମଲ ନାଥ ଏକ୍ସ ଯୋଗେ କହିଛନ୍ତି, ‘ଆମେ ମିଛ କହୁନାହୁଁ’ ବୋଲି ମୁଖ୍ୟମନ୍ତ୍ରୀ ଯେଉଁ ଦାବି କରୁଛନ୍ତି, ତାହା ସମ୍ପୂର୍ଣ୍ଣ ମିଛ। ପ୍ରଶ୍ନ ହେଉଛି ସେ କାହିଁକି ଏହି ସ୍ପଷ୍ଟୀକରଣ ଦେବାର ଆବଶ୍ୟକତା ଅନୁଭବ କରିଛନ୍ତି। ଭାରତୀୟ ଜନତା ପାର୍ଟି ସରକାର ଲୋକଙ୍କ ଜୀବନରେ ପରିବର୍ତ୍ତନ ଆଣୁଥିବା ମୁଖ୍ୟମନ୍ତ୍ରୀ କହୁଛନ୍ତି। କିନ୍ତୁ ପ୍ରକୃତ ସତ କଥା ହେଉଛି ଜୀବନ ବଦଳୁନାହିଁ, ଗତ କିଛି ବର୍ଷ ଶାସନ କାଳରେ ଭାଜପା ଲୋକଙ୍କ ଜୀବନକୁ ଆହୁରି ଖରାପ କରିଦେଉଛି।
କମଲ ନାଥ ଆହୁରି ଲେଖିଛନ୍ତି, ଜୀବନ ବଦଳାଇବା ନୁହେଁ, ବରଂ ଜୀବନର ଉନ୍ନତି ଉପରେ ଆମେ ବିଶ୍ୱାସ କରୁ। ପ୍ରତ୍ୟେକ ମଣିଷ ଆଗକୁ ବଢିବାକୁ ଚାହାଁନ୍ତି, ନିଜ ପ୍ରିୟଜନଙ୍କ ପାଇଁ ସର୍ବଶ୍ରେଷ୍ଠ କରିବାକୁ ଚାହାଁନ୍ତି। ଏକ ଅନୁକୂଳ ପରିବେଶ ସୃଷ୍ଟି କରିବା ସରକାରଙ୍କ କାମ। ଯଦି ସରକାର ଏହି କାର୍ଯ୍ୟକୁ ସଚ୍ଚୋଟତାର ସହ କରନ୍ତି, ତେବେ ଏହା କଷ୍ଟସାଧ୍ୟ କାର୍ଯ୍ୟ ନୁହେଁ। କଂଗ୍ରେସ ଏବଂ ଭାଜପାର ଶାସନ ମଧ୍ୟରେ ଥିବା ପାର୍ଥକ୍ୟକୁ ବୁଝିବା ପାଇଁ ଦଶ ବର୍ଷ ପୂର୍ବେ ଜୀବନ ସହଜ ଥିଲା କି ଆଜି ଅଛି ତାହା ତୁଳନା କରିବାକୁ ପଡିବ।
