ବ୍ରହ୍ମପୁର ଅଫିସ,୧୨।୧୦: ବ୍ରହ୍ମପୁର ବିଶ୍ୱବିଦ୍ୟାଳୟ ପ୍ରଶାସନିକ କୋଠା ସମ୍ମୁଖରେ ମଙ୍ଗଳବାର ୩୭ ଜଣ ଆଉଟସୋର୍ସିଂ କର୍ମଚାରୀ ମିଳିତ ଭାବେ ଗଣଧାରଣା ଦେଇଥିଲେ। କର୍ମଚାରୀମାନେ ବଦଳି ବନ୍ଦ କରିବା ଦାବିରେ ଦିନତମାମ ଧାରଣା ଦେବା ଫଳରେ ଭଞ୍ଜବିହାର ପରିସରରେ ଉତ୍ତେଜନା ବୃଦ୍ଧି ପାଇଥିଲା। ସୂଚନାନୁସାରେ, ପାର୍ବଣ ଛୁଟି ପୂର୍ବରୁ ସେପ୍ଟେମ୍ବର ୨୭ରେ ବିଶ୍ୱବିଦ୍ୟାଳୟ ଛାତ୍ରୀବାସରେ ଅମାନୁଷିକ ଭାବେ ୧୨ଟି ବୁଲାକୁକୁରଙ୍କ ପାଟି ଓ ଗୋଡ଼ ବାନ୍ଧି ରଖାଯାଇଥିବା ଭିଡିଓ ଭାଇରାଲ ହୋଇଥିଲା। ବିଶ୍ୱବିଦ୍ୟାଳୟ ପକ୍ଷରୁ ଏହାର ତଦନ୍ତ ବେଳେ ଆଉଟସୋର୍ସିଂ ସଫେଇ କର୍ମଚାରୀମାନେ ଏଥିରେ ସମ୍ପୃକ୍ତ ଥିବା ଜଣାପଡ଼ିଥିଲା। ତଦନ୍ତ ପରେ କୁଳପତି ପ୍ରଫେସର ଗୀତାଞ୍ଜଳି ଦାଶ ଅକ୍ଟୋବର ପହିଲାରୁ ଦଶ ଦିନ ନିମନ୍ତେ ଆଉଟସୋର୍ସିଂ କର୍ମଚାରୀଙ୍କୁ ନିଲମ୍ବନ କରିଥିଲେ। ମଙ୍ଗଳବାର ବିଶ୍ୱବିଦ୍ୟାଳୟ ଖୋଲିବା ପରେ ନୂତନ ଭାବେ ୨୦ ଜଣ ଆଉଟସୋର୍ସିଂ କର୍ମଚାରୀଙ୍କୁ ଅଣାଯାଇଥିବା ଓ ନିଲମ୍ବିତ ଆଉଟସୋର୍ସିଂ କର୍ମଚାରୀମାନେ ଝାରସୁଗୁଡ଼ା ବଦଳି ହୋଇଥିବା ଜାଣିବାକୁ ପାଇଥିଲେ। ସ୍ବଳ୍ପ ବେତନରେ ଘରଠାରୁ ଦୂରରେ ଚଳିବା କଷ୍ଟକର ହୋଇଥିବା ଯୋଗୁ କର୍ମଚାରୀମାନେ ନିଜର ବଦଳି ବନ୍ଦ କରିବା ପାଇଁ ଦାବିକରି କୁଳପତିଙ୍କୁ ଭେଟିବାକୁ ଚାହିଁଥିଲେ ସୁଦ୍ଧା ସେମାନେ ସାକ୍ଷାତ କରିପାରିନଥିଲେ। ଭିତରକୁ ପ୍ରବେଶ କରିବାକୁ ଦିଆଯାଇ ନ ଥିବା ଧାରଣାରତ ଆଉଟସୋର୍ସିଂ କର୍ମଚାରୀମାନେ ଅଭିଯୋଗ କରିଛନ୍ତି।