ଲୋଇସିଂହା,୨୫।୧(ଡି.ଏନ.ଏ): ବଲାଙ୍ଗୀର ଜିଲା ଆଗଲପୁର ବ୍ଲକ ବକଟି ଉଷାଦେବୀ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବରୁ ପାଠପଢାରେ ବ୍ୟାଘାତ ସୃଷ୍ଟି ହେଉଛି। ଶିକ୍ଷା ବିଭାଗର ଦୃଷ୍ଟି ଆକର୍ଷଣ କଲେ ସୁଦ୍ଧା କୌଣସି ସୁଫଳ ମିଳିନାହିଁ ା ଏହାର ପ୍ରତିବାଦରେ ମଙ୍ଗଳବାର ସ୍କୁଲଗେଟ ଆଗରେ ଛାତ୍ରୀଛାତ୍ର, ଅଭିଭାବକ ଓ ପରିଚାଳନା କମିଟି ସଦସ୍ୟ ଧାରଣା ଦେଇଥିଲେ। ଖବର ପାଇ ଏବିଓ ରଜନୀକାନ୍ତ ପଟେଲ, ଦୁତିଆ ବରିହା, ସିଆରସିସି ବାବୁଲାଲ ସାହୁ ସ୍କୁଲରେ ପହଞ୍ଚଥିଲେ ା ପ୍ରଧାନ ଶିକ୍ଷକ ଦେବରାଜ ବାରିକ, ପରିଚାଳନା କମିଟି ସଭାପତି ସୁଶୀଲ କୁମାର ଭୋଇ ଓ ଅଭିଭାକଙ୍କ ସହ ଆଲୋଚନା କରିଥିଲେ। ଆସନ୍ତା ୨ ଫେବୃୟାରୀ ସୁଦ୍ଧା ଆଉ ଜଣେ ଶିକ୍ଷକ ନିଯୁକ୍ତି ଦେବାକୁ ଅଧିକାରୀ ପ୍ରତିଶ୍ରୁତି ଦେଇଥିଲେ। ଏହାପରେ ଧାରଣା ପ୍ରତ୍ୟାହୃତ ହୋଇଥିଲା।
ସୂଚନା ଅନୁଯାୟୀ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ରହିଛି। ପ୍ରଥମରୁ ପଞ୍ଚମ ୧୪୦ ଛାତ୍ରୀଛତ୍ର ଓ ଷଷ୍ଠରୁ ଅଷ୍ଟମ ଯାଏ ୧୦୨ ଛାତ୍ରୀଛାତ୍ର ଅଛନ୍ତି। ବିଦ୍ୟାଳୟରେ ୨୪୨ ଛାତ୍ରୀଛାତ୍ର ଅଧ୍ୟୟନ କରୁଥିବା ବେଳେସେହି ତୁଳନାରେ ଶିକ୍ଷକ ଅଭାବ ରହିଛି। ବିଦ୍ୟାଳୟରେ ଜଣେ କ୍ରୀଡା ଶିକ୍ଷକ ସହ ୮ ଜଣ ଶିକ୍ଷକ ଶିକ୍ଷାଦାନ ପାଇଁ ନିୟୋଜିତ ଥିଲେ। ହେଲେ ୨୦୧୯ ମସିହାରୁ ଶିକ୍ଷୟିତ୍ରୀ ସଙ୍ଗୀତା ସାହୁଙ୍କୁ ଖଳିଆପାଲି ସ୍କୁଲକୁ ଡେପୁଟେଶନରେ ପଠାଯାଇଛି। ଏବେ ଜଣେ କ୍ରୀଡା ଶିକ୍ଷକ ସମେତ ୭ ଜଣ ଶିକ୍ଷାଦାନ ପାଇଁ ଅଛନ୍ତି। ୬ ଜଣ ଶିକ୍ଷକରେ ୮ ଟି ଶ୍ରେଣୀ ପିଲାଙ୍କୁ ପଢାଇବା ପାଇଁ ସମସ୍ୟା ହେଉଛି।