କଲମ୍ବୋ, ୩୧ା୧୦ ଶ୍ରୀଲଙ୍କା କ୍ରିକେଟ ଦଳର ଜଣେ ଦୃଢ ସମର୍ଥକ ଭାବେ ପରିଚିତ ପର୍ସି ଆବେସେକରାଙ୍କ ପରଲୋକ ଘଟିଛି। ବିଶ୍ୱବ୍ୟାପୀ ଯେଉଁ ଗ୍ରାଉଣ୍ଡରେ ଶ୍ରୀଲଙ୍କା ଖେଳିଥାଏ ତାଙ୍କର ଉପସ୍ଥିତି ଦେଖିବାକୁ ମିଳିଥାଏ। ଦେଶର ଜାତୀୟ ପତାକା ହଲାଇ ସେ ତାଙ୍କ ଖେଳାଳିମାନଙ୍କୁ ଉତ୍ସାହିତ କରିଥାନ୍ତି। ସେ ‘ଅଙ୍କଲ ପର୍ସି’ ନାମରେ ପରିଚିତ ଥିଲେ। ୧୯୭୯ ବିଶ୍ୱକପ୍ ପରଠାରୁ ପ୍ରାୟ ସମସ୍ତ ପ୍ରମୁଖ କ୍ରିକେଟ ଇଭେଣ୍ଟଗୁଡ଼ିକରେ ତାଙ୍କୁ ଦେଖିବାକୁ ମିଳିଥାଏ। ସେ ଅସୁସ୍ଥ ଥିବା ହେତୁ ଭାରତରେ ଚାଲିଥିବା ଆଇସିସି ଦିନିକିଆ ବିଶ୍ୱକପ୍ ଦେଖିବା ଲାଗି ସେ କେବଳ ଆସି ପାରି ନ ଥିଲେ। ଶ୍ରୀଲଙ୍କାର ଅର୍ଜୁନ ରଣାତୁଙ୍ଗା, ସନଥ ଜୟସୁରିୟା ଓ କୁମାର ସଙ୍ଗକାରାଙ୍କ ଭଳି ବହୁ ଅଗଣୀ କ୍ରିକେଟରଙ୍କ ସହିତ ତାଙ୍କର ବନ୍ଧୁତ୍ୱପୂର୍ଣ୍ଣ ଥିଲା। ଆବେସେକରା ଭାରତୀୟ କ୍ରିକେଟର ଏମ୍ଏସ୍ ଧୋନୀ, ବିରାଟ କୋହଲି ଓ ରୋହିତ ଶର୍ମାଙ୍କ ଭଳି ଖେଳାଳିଙ୍କ ସହ ମଧ୍ୟ ସୁସମ୍ପର୍କ ରଖିଥିଲେ। ନିକଟରେ ଏସିଆ କପ୍ ବେଳେ ରୋହିତ କଲମ୍ବୋସ୍ଥିତ ଆବେସେକରାଙ୍କ ଘରକୁ ଯାଇ ତାଙ୍କୁ ଭେଟିଥିଲେ। ୨୦୧୫ରେ ଶ୍ରୀଲଙ୍କାରେ ଆବେସେକରାଙ୍କ ସହ ବାର୍ତ୍ତାଳାପ କରିବା ଲାଗି କୋହଲି ତାଙ୍କୁ ଭାରତୀୟ ଡ୍ରେସିଂ ରୁମ୍କୁ ଡକାଇଥିଲେ। ତେବେ ଆବେସେକରା ବର୍ଷେ ହେଲା ଅସୁସ୍ଥ ଥିଲେ। ତାଙ୍କ ଡାକ୍ତରୀ ଖର୍ଚ୍ଚ ପାଇଁ ଶ୍ରୀଲଙ୍କା କ୍ରିକେଟ ନିକଟରେ ୫ ନିୟୁତ ଶ୍ରୀଲଙ୍କା ମୁଦ୍ରା ସହାୟତା ପ୍ରଦାନ କରିଥିଲା।
