ରାଞ୍ଚି,୨୦।୧୧: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଚମତ୍କାର ପ୍ରଦର୍ଶନ କରିଥିବା ହର୍ଶଲ ପଟେଲ ଅନ୍ତର୍ଜାତୀୟ ଟି୨୦ ପଦାର୍ପଣ କରି ପୂର୍ବତନ ଦ୍ରୁତ ବୋଲର ଅଜିତ ଅଗରକରଙ୍କଠାରୁ ଭାରତୀୟ କ୍ୟାପ୍ ଗ୍ରହଣ କରିଥିଲେ। କ୍ରମାଗତ ଦ୍ୱିତୀୟଥର ପାଇଁ ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଥିଲେ ଟିମ୍ ଇଣ୍ଡିଆ ଅଧିନାୟକ ରୋହିତ ଶର୍ମା। ତେବେ ନ୍ୟୁଜିଲାଣ୍ଡର ଦୁଇ ଓପନର ମାର୍ଟିନ ଗୁପ୍ଟିଲ ଓ ଡାରିଲ ମିଚେଲ ଦ୍ରୁତ ହାରରେ ରନ ସଂଗ୍ରହ କରିବାରୁ ନ୍ୟୁଜିଲାଣ୍ଡ ପାଓ୍ବାର ପ୍ଲେ ୬ ଓଭରରେ ୧ ଉଇକେଟ ହରାଇ ୬୪ ରନ ସଂଗ୍ରହ କରି ନେଇଥିଲା। ତେଣୁ ଦଳ ଏଠାରେ ଏକ ବଡ଼ ସ୍କୋର କରିବ ବୋଲି ଆଶା କରାଯାଉଥିଲା। ମାତ୍ର ମିଡ୍ଲ ଅର୍ଡର ଓ ଡେଥ୍ ଓଭରଗୁଡ଼ିକରେ ଭାରତୀୟ ବୋଲରମାନେ ଚମତ୍କାର ବୋଲିଂ କରିବାରୁ ଦଳୀୟ ସ୍କୋର ୧୫୩/୬ରେ ସୀମିତ ରହି ଯାଇଥିଲା। ଦଳ ପକ୍ଷରୁ ଗ୍ଲେନ୍ ଫିଲିପ୍ସ ସର୍ବାଧିକ ୩୪, ଗୁପ୍ଟିଲ ଓ ଡାରିଲ ମିଚେଲ ୩୧ ରନ ଲେଖାଏ କରିଥିବା ବେଳେ ମାର୍କ ଚାପ୍ମ୍ୟାନ ୨୧ ରନ କରିଥିଲେ। ଗୁପ୍ଟିଲ ୧୫ ବଲ୍ରୁ ୩ ଚୌକା ଓ ୨ ଛକା ସହାୟତାରେ ୩୧ ରନ କରିବା ଅବସରରେ ଟି୨୦ ଅନ୍ତର୍ଜାତୀୟ କ୍ରିକେଟରେ ସର୍ବାଧିକ ସ୍କୋରର ହୋଇ ଯାଇଥିଲେ। ଏ କ୍ଷେତ୍ରରେ ସେ ଭାରତର ବିରାଟ କୋହଲିଙ୍କୁ ଅତିକ୍ରମ କରିଛନ୍ତି। ନିକଟରେ ଟି୨୦ ଅଧିନାୟକ ପଦରୁ ଓହରି ଯାଇଥିବା ବିରାଟ ୩୨୨୭ ରନ କରିଥିବାବେଳେ ଗୁପ୍ଟିଲଙ୍କ ସ୍କୋର ୩୨୪୮ରେ ପହଞ୍ଚତ୍ଛି। ଭାରତ ପକ୍ଷରୁ ହର୍ଶଲ ପଟେଲ ନିଜ ପ୍ରଥମ ମ୍ୟାଚରେ ୨୫ ରନ ବିନିମୟରେ ସର୍ବାଧିକ ୨ଟି ଉଇକେଟ ନେଇଥିଲେ। ଭୁବନେଶ୍ୱର କୁମାର, ଦୀପକ ଚହର, ଅକ୍ଷର ପଟେଲ ଓ ରବିଚନ୍ଦ୍ରନ ଅଶ୍ୱିନଙ୍କୁ ଗୋଟିଏ ଲେଖାଏ ଉଇକେଟ ମିଳିଥିଲା।