ବ୍ରହ୍ମପୁର ଅଫିସ,୨୧ା୩: ବ୍ରହ୍ମପୁର ମା’ ବୁଢୀ ଠାକୁରାଣୀଙ୍କ ଦ୍ୱିବାର୍ଷିକ ଯାତ୍ରାକୁ ନେଇ ଶନିବାର ବ୍ରହ୍ମପୁର ମହାନଗର ନିଗମ (ବିଏମ୍ସି) ପକ୍ଷରୁ ୭ଦିନ ଯାତ୍ରା ପାଇଁ ଅନୁମତି ଦିଆଯାଇଛି। ବିଏମ୍ସି କମିଶନର ସିଦ୍ଧେଶ୍ୱର ବଳିରାମ ବୋନ୍ଦାର ଟୁଇଟ୍ ଯୋଗେ ସୂଚନା ଦେଇଛନ୍ତି। କୋଭିଡ୍ ସଂକ୍ରମଣ ସ୍ଥିତି ଓ ଗାଇଡ଼୍ ଲାଇନ୍କୁ ଭିତ୍ତିକରି ଯାତ୍ରା ଅବଧି ବୃଦ୍ଧି କରାଯିବ ବୋଲି କମିଶନର ସୂଚନା ଦେଇଛନ୍ତି। ଅନ୍ୟପଟେ ବିଏମ୍ସି ପକ୍ଷରୁ ଯାତ୍ରା ପାଳନ ନେଇ ଅନୁମତି ନେଇ ଟୁଇଟ୍ ଯୋଗେ ସୂଚନା ମିଳିବା ପରେ ଯାତ୍ରା ପରିଚାଳକ ଖୁସିବ୍ୟକ୍ତ କରିଛନ୍ତି। କିନ୍ତୁ ଏ ନେଇ ବିଏମ୍ସି ପକ୍ଷରୁ ଲିଖିତ ଭାବେ କାୈଣସି ସୂଚନା ପ୍ରଦାନ କରାଯାଇ ନ ଥିବା ଯାତ୍ରା ପରିଚାଳକ ଦୁର୍ଗା ପ୍ରସାଦ ଦେଶୀ ବେହେରା କହିଛନ୍ତି। ଏଥିସହ ବିଏମ୍ସି ପକ୍ଷରୁ ପ୍ରଦାନ କରାଯାଇଥିବା ଗାଇଡ୍ଲାଇନ୍ରେ ପତ୍ର ସଂଖ୍ୟା ରହି ନ ଥିବା ସେ କହିଛନ୍ତି। ଯାହାକୁ ନେଇ ଯାତ୍ରା ପରିଚାଳନା କମିଟି ଦ୍ୱନ୍ଦ୍ୱରେ ରହିଛନ୍ତି। ଯଦି ବିଏମ୍ସି ପକ୍ଷରୁ ପୁନଃ ବୈଠକ ଡକାଯାଇ ସୂଚନା ପ୍ରଦାନ କରାଯାଏ ତେବେ ଯାତ୍ରା ପରିଚାଳିତ ହେବ ବୋଲି ସେ କହିଛନ୍ତି। ଏଥିସହ ପ୍ରଶାସନର ସମସ୍ତ ନିଷ୍ପତ୍ତିକୁ କମିଟି ପକ୍ଷରୁ ସମର୍ଥନ ଜଣାଉଛୁ। କିନ୍ତୁ ଯାତ୍ରା ୭ ଦିନ ପରିବର୍ତ୍ତେ ୨୧ ଦିନ ବୃଦ୍ଧି କରାଗଲେ ମା’ଙ୍କର ସମସ୍ତ ପୂଜା କାର୍ଯ୍ୟ ରୀତିନୀତି ଅନୁଯାୟୀ ହୋଇପାରିବ।
ପ୍ରକାଶ ଯେ, ଗତ ଶୁକ୍ରବାର ବିଳମ୍ବିତ ରାତ୍ରିରେ ଶୁଭଖୁଣ୍ଟି ସ୍ଥାପନ ପୂର୍ବରୁ ବିଏମ୍ସି କାର୍ଯ୍ୟାଳୟରେ ପ୍ରଶାସନିକ ଅଧିକାରୀ ଓ ଯାତ୍ରା ପରିଚାଳକଙ୍କ ମଧ୍ୟରେ ଏକ ବୈଠକ ଅନୁଷ୍ଠିତ ହୋଇଥିଲା। କାରଣ ଶୁଭଖୁଣ୍ଟି ସ୍ଥାପନ ପରେ ହିଁ ଯାତ୍ରାର ଅବଧି ଧାର୍ଯ୍ୟ ହୋଇଥାଏ। ଯେଉଁଥିରେ ଜିଲା ପ୍ରଶାସନ ଓ ବିଏମ୍ସିର ଅନୁମତି ଆବଶ୍ୟକ ହୋଇଥାଏ। ଫଳରେ ବିଳମ୍ବିତ ରାତ୍ରିରେ ବିଏମ୍ସି ସମ୍ମିଳନୀ କକ୍ଷରେ କମିଶନର ସିଦ୍ଧେଶ୍ୱର ବଳିରାମ ବୋନ୍ଦାର, ବ୍ରହ୍ମପୁର ଉପଜିଲାପାଳ ଭି.କ୍ରୀର୍ତ୍ତିଭାସନ୍ ଓ ଯାତ୍ରା ପରିଚାଳକ ଦୁର୍ଗା ପ୍ରସାଦ ଦେଶୀ ବେହେରାଙ୍କ ସମେତ ଅନ୍ୟ କମିଟି ବୃନ୍ଦଙ୍କୁ ନେଇ ଏକ ବୈଠକ ହୋଇଥିଲା। ଯେଉଁଥିରେ ଯାତ୍ରାରେ ମା’ ନିଜ ବାପଘରକୁ ଆସିବେ କିନ୍ତୁ ରାଜା ବାଟିକାକୁ ଯିବେ ନାହିଁ। ରାଜା ନିଜେ ମା’ଙ୍କ ନିକଟକୁ ଆସିବେ। ଏଥିସହ ମା’ଙ୍କ ଘଟ ପରିକ୍ରମାକୁ ପ୍ରଶାସନ ପକ୍ଷରୁ ବାରଣ କରାଯାଇଥିଲା। ଯଦି କୌଣସି ଅପ୍ରୀତିକରପରିସ୍ଥିତି ଉପୁଜେ ତେବେ ଯାତ୍ରା ପରିଚାଳକ ଦାୟୀ ରହିବେ ବୋଲି ଲିଖିତ ଭାବେ ଜଣାଇବା ଲାଗି ପ୍ରଶାସନ ପକ୍ଷରୁ କୁହାଯାଇଥିଲା। କିନ୍ତୁ ଯାତ୍ରା ପରିଚାଳକ ସହମତି ପ୍ରକାଶ କରି ନ ଥିଲେ। ଫଳରେ ଚଳିତ ବର୍ଷ ଠାକୁରାଣୀ ଯାତ୍ରାକୁ ସ୍ଥଗିତ ରଖିବା ପାଇଁ ଦେଶୀ ବେହେରା ଗଣମାଧ୍ୟମକୁ ସୂଚନା ଦେଇଥିଲେ।