ନୂଆଦିଲ୍ଲୀ, ୧୪।୧୨: ଉତ୍ତରାଖଣ୍ଡର ଗଙ୍ଗୋତ୍ରୀ, ଯମୁନୋତ୍ରୀ, କେଦାରନାଥ ଏବଂ ବଦ୍ରିନାଥ ଆଦି ଧାମକୁ ସଂଯୋଗ କରିବା ଲାଗି ପ୍ରସ୍ତାବିତ ଚାରଧାମ ପ୍ରୋଜେକ୍ଟକୁ ମଞ୍ଜୁରୀ ମିଳିଛି। ଏହା ଦ୍ୱାରା ବର୍ଷସାରା ଏସବୁ ଧାମ ସହିତ ଯୋଗାଯୋଗ ରକ୍ଷା କରାଯାଇପାରିବ। ସୁପ୍ରିମ୍କୋର୍ଟଙ୍କ ପକ୍ଷରୁ ଦେଶର ସୁରକ୍ଷାକୁ ଦୃଷ୍ଟିରେ ରଖି ଏହି ପରିଯୋଜନାରେ ସଡ଼କକୁ ଦୁଇଗୁଣା ଚୌଡ଼ା କରିବା ପ୍ରସ୍ତାବକୁ ମଞ୍ଜୁରୀ ପ୍ରଦାନ କରିଛନ୍ତି।
୯୦୦ କିଲୋମିଟର ଦୀର୍ଘ ଏହି ପରିଯୋଜନା ପାଇଁ ୧୨,୦୦୦ କୋଟି ଟଙ୍କାର ବ୍ୟୟ ଅଟକଳ କରାଯାଇଛି। ଏହା ମାଧ୍ୟମରେ ଚାଇନା ସୀମା ପର୍ଯ୍ୟନ୍ତ ପହଞ୍ଚିବା ସହଜ ହୋଇ ପାରିବ। ଫଳରେ ଚାଇନା ଉପରେ ବି ନଜର ରଖିବା ସହଜ ହୋଇପାରିବ। ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ନେତୃତ୍ୱରେ ଗଠିତ ଖଣ୍ଡପୀଠଙ୍କ ପକ୍ଷରୁ ପୂର୍ବତନ ବିଚାରପତି ଏ.କେ. ସିକ୍ରିଙ୍କ ଅଧ୍ୟକ୍ଷତାରେ ଏକ ନିରୀକ୍ଷଣ କମିଟି ଗଠନ କରାଯାଇଛି। କମିଟିକୁ ରକ୍ଷା ମନ୍ତ୍ରଣାଳୟ, ସଡ଼କ ପରିବହନ ମନ୍ତ୍ରଣାଳୟ, ଉତ୍ତରାଖଣ୍ଡ ସରକାର ଏବଂ ସମସ୍ତ ଜିଲା ଅଧିକାରୀଙ୍କ ସହାୟତା ଯୋଗାଇ ଦେବେ।