ନୂଆଦିଲ୍ଲୀ,୧୧।୩ : ଅହମ୍ମଦାବାଦ ସ୍ଥିତ ନରେନ୍ଦ୍ର ମୋଦି ଷ୍ଟାଡିୟମରେ ଶୁକ୍ରବାରଠାରୁ ଭାରତ ଓ ଇଂଲଣ୍ଡ ମଧ୍ୟରେ ଆରମ୍ଭ ହେବାକୁ ଯାଉଛି ୫ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍। ଭାରତୀୟ ଅଧିନାୟକ ବିରାଟ କୋହଲିଙ୍କ ନିକଟରେ ସ୍ବତନ୍ତ୍ର ରେକର୍ଡ ହାତେଇବାର ସୁଯୋଗ ରହିଛି, ଯାହା ଏପର୍ଯ୍ୟନ୍ତ କୌଣସି ବ୍ୟାଟ୍ସମ୍ୟାନ ହାସଲ କରିପାରି ନାହାନ୍ତି। ଟି୨୦ ଫର୍ମାଟରେ ସର୍ବାଧିକ ରନ୍ ସ୍କୋର କରିଥିବା କୋହଲି ୩ ହଜାର ରନ୍ ପୂରଣ ଠାରୁ ମାତ୍ର ୭୨ ରନ୍ ଦୂରରେ ଅଛନ୍ତି। ସେ ଟି୨୦ ଫର୍ମାଟର ପ୍ରଥମ ବ୍ୟାଟ୍ସମ୍ୟାନ ଭାବେ ଏହି ମାଇଲଷ୍ଟୋନ ସ୍ପର୍ଶ କରିବେ।
କେବଳ କୋହଲି ନୁହନ୍ତି, ଟିମ୍ ଇଣ୍ଡିଆର ଓପନର ରୋହିତ ଶର୍ମାଙ୍କ ନିକଟରେ ମଧ୍ୟ କିଛି ରେକର୍ଡ ନିଜ ନାମରେ କରିବାର ସୁଯୋଗ ରହିଛି। ଅନ୍ତର୍ଜାତୀୟ ଟି୨୦ କ୍ରିକେଟ ଇତିହାସରେ ସର୍ବାଧିକ ସଂଖ୍ୟକ ଛକା ମାରିଥିବା ବ୍ୟାଟ୍ସମ୍ୟାନଙ୍କ ତାଲିକାରେ ୧୨୭ ଛକା ସହ ରୋହିତ ଦ୍ୱିତୀୟ ସ୍ଥାନରେ ଅଛନ୍ତି। ଶୀର୍ଷରେ ଅଛନ୍ତି ନ୍ୟୁଜିଲାଣ୍ଡର ମାର୍ଟିନ ଗୁପଟିଲ (୧୩୯)। ତାଙ୍କୁ ପଛରେ ପକାଇବା ଲାଗି ରୋହିତଙ୍କୁ ଦରକାର ୧୩ଟି ଛକା । ଆଉ ସର୍ବାଧିକ ରନ୍ ସ୍କୋରରଙ୍କ ତାଲିକାରେ ମଧ୍ୟ ଗୁପଟିଲଙ୍କୁ ପଛରେ ପକାଇ ପାରନ୍ତି ହିଟ୍ମ୍ୟାନ। ତାଙ୍କୁ ଏହି ୫ ମ୍ୟାଚ୍ ବିଶିଷ୍ଟ ସିରିଜ୍ରେ ମାତ୍ର ୬୭ ରନ୍ ଦରକାର।