ନୂଆଦିଲ୍ଲୀ, ୨୯।୩ : କେନ୍ଦ୍ରଶାସିତ ପ୍ରଦେଶ ଜମ୍ମୁ-କଶ୍ମୀରରେ ବିଧାନସଭା ଆସନ ସଂଖ୍ୟାକୁ ୮୩ ରୁ ୯୦ କୁ ଏବଂ ପାକିସ୍ତାନ ଅଧିକୃତ କାଶ୍ମୀରରେ ୨୪ ଆସନ ସମେତ ଏହି ସଂଖ୍ୟା ୧୦୭ ରୁ ୧୧୪ କୁ ବୃଦ୍ଧି କରିବାକୁ ନେଇ ଗଠିତ ପରିସିମନ୍ କମିଶନ (ଡିଲିମିଟେଶନ କମିଶନ)ଙ୍କ ବିରୋଧରେ ଏକ ପିଟିଶନ ସୁପ୍ରିମ୍କୋର୍ଟରେ ଦାଖଲ କରାଯାଇଛି।
ଏଥିରେ ଉଲ୍ଲେଖ କରାଯାଇଛି ଯେ କେନ୍ଦ୍ର ସରକାରଙ୍କ ଦ୍ୱାରା ଜମ୍ମୁ-କଶ୍ମୀର ପୁନର୍ଗଠନ ଅଧିନିୟମ, ୨୦୧୯ ର ଧାରା ୮୧, ୮୨, ୧୭୦, ୩୩୦ ଏବଂ ୩୩୨ ତଥା ଧାରା ୬୩ର ବିପରୀତ ଅଟେ। ଏହି ପିଟିଶନରେ ପ୍ରଶ୍ନ କରାଯାଇଛି ଯେ ଭାରତର ସମ୍ବିଧାନର ଧାରା ୧୭୦ ର ବ୍ୟବସ୍ଥା ଅନୁଯାୟୀ ୨୦୨୬ ପରେ ଦେଶରେ ପରବର୍ତ୍ତୀ ସୀମା ନିର୍ଦ୍ଧାରଣ କରାଯିବ।
ଏହା ସତ୍ତ୍ୱେ ଜମ୍ମୁ-କଶ୍ମୀରକୁ କାହିଁକି ପରିସିମନ୍ ପାଇଁ ଚୟନ କରାଗଲା। ଡିଲିମିଟେଶନ କମିଶନଙ୍କ ଗଠନ ଅଣସାମ୍ବିଧାନିକ। କାରଣ ଏହା ଧାରା ୧୪କୁ ଉଲ୍ଲଂଘନ କରୁଛି। ଜମ୍ମୁ-କଶ୍ମୀରର ବାସିନ୍ଦା ହାଜି ଅବଦୁଲ ଘାନି ଖାଁ ଏବଂ ଡକ୍ଟର ମହମ୍ମଦ ଆୟୁବ ମଟ୍ଟୁଙ୍କ ଦ୍ୱାରା ଏହି ପିଟିଶନ ଦାଖଲ କରାଯାଇଛି।
ଏଥିରେ ଦର୍ଶାଯାଇଛି ଯେ କେନ୍ଦ୍ର ସରକାର ଭାରତର ନିର୍ବାଚନ ଆୟୋଗଙ୍କ ନିକଟରେ ଥିବା କ୍ଷମତାକୁ ଛଡ଼ାଇ ନେବାର ପ୍ରୟାସ କରୁଛନ୍ତି। ପରିସିମନ୍ ଅର୍ଥ ହେଉଛି ଏକ ବିଧାନସଭା କିମ୍ବା ପ୍ରଦେଶରେ ଆଞ୍ଚଳିକ ନିର୍ବାଚନମଣ୍ଡଳୀର ସୀମା କିମ୍ବା ସୀମା ସ୍ଥିର କରିବାର କାର୍ଯ୍ୟ ବା ପ୍ରକ୍ରିୟା। ଏହା ସାମ୍ବିଧାନିକ ଧାରାକୁ ବିରୋଧ କରିବା ଅନୁଚିତ ବୋଲି ପିଟିଶନ୍ରେ ଉଲ୍ଲେଖ କରାଯାଇଛି।