କୋକସରା,୧୮ା୧୨(ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲା କୋକସରା ବ୍ଲକ ସଦର ମହକୁମା ସଦର କୋକସରା ପଞ୍ଚାୟତରେ ପୂର୍ବରୁ ଅବସ୍ଥାପିତ ଥିବା ପଞ୍ଚାୟତ ନିର୍ବାହୀ ଅଧିକାରୀଙ୍କୁ ଅନ୍ୟ ପଞ୍ଚାୟତକୁ ବଦଳି ହୋଇଛି। ଏହାକୁ ନେଇ କୋକସରା ପଞ୍ଚାୟତର ଓ୍ବାର୍ଡସଭ୍ୟାସଭ୍ୟମାନେ ପିଇଓ ଭବିଷ୍ୟତ ପଟେଲଙ୍କ ବଦଳି ବାତିଲ କରିବା ସହ ପୁନର୍ବାର କୋକସରା ପଞ୍ଚାୟତରେ ଅବସ୍ଥାପିତ କରିବାକୁ ବୁଧବାର କୋକସରା ଗୋଷ୍ଠୀ ଉନ୍ନୟନ ଅଧିକାରୀ ଡ. ହିମାଞ୍ଚଳ ମାଝୀଙ୍କୁ ଦାବିପତ୍ର ପ୍ରଦାନ କରିଛନ୍ତି।
ସୂଚନା ମତେ କୋକସରା ପଞ୍ଚାୟତର ପିଇଓ ଭବିଷ୍ୟତ ପଟେଲଙ୍କୁ ବ୍ଲକ ପ୍ରଶାସନ ପକ୍ଷରୁ ଅନ୍ୟ ପଞ୍ଚାୟତକୁ ବଦଳି କରାଯାଇ ତାଙ୍କ ସ୍ଥାନରେ ୨୦୧୮ରୁ ୨୦୨୨ ପର୍ଯ୍ୟନ୍ତ ଏଠାରେ ଅବସ୍ଥାପିତ ଥିବା ପିଇଓ ବିରଞ୍ଚି ଖର୍ସେଲଙ୍କୁ ପୁଣିଥରେ ନିଯୁକ୍ତ କରାଯାଇଛି। ତେବେ ଖର୍ସେଲ ବ୍ଲକରେ ଭାରପ୍ରାପ୍ତ ଜିପିଡିଓ ଦାୟିତ୍ୱରେ ମଧ୍ୟ ରହିଛନ୍ତି। ଏଣୁ ସେ ପିଇଓ ରହିଲେ ପଞ୍ଚାୟତ ପାଇଁ ଯଥେଷ୍ଟ ସମୟ ଦେଇ ପାରିବେ ନାହିଁ ଓ ପଞ୍ଚାୟତର ଉନ୍ନୟନ କାର୍ଯ୍ୟ ସମେତ ଅନ୍ୟାନ୍ୟ କାର୍ଯ୍ୟରେ ବ୍ୟାହତ ସୃଷ୍ଟି ହେଉଥିବା ଓ ତାଙ୍କ କାର୍ଯ୍ୟରେ ଅସନ୍ତୋଷ ବ୍ୟକ୍ତ କରି ସଭ୍ୟାସଭ୍ୟମାନେ ଅଭିଯୋଗ କରିଛନ୍ତି। ଯଦି ବ୍ଲକ ପ୍ରଶାସନ ୧୦ ଦିନ ମଧ୍ୟରେ କୌଣସି ପଦକ୍ଷେପ ଗ୍ରହଣ ନକଲେ ଓ୍ବାର୍ଡମେମ୍ବର ସମୂହ କୋକସରା ପଞ୍ଚାୟତରେ ତାଲା ପକାଇବା ସହ ସାମୂହିକ ଭାବେ ଇସ୍ତଫା ଦେବାକୁ ଚେତାବନୀ ଦେଇଛନ୍ତି। ଏହି ଦାବିପତ୍ର ପ୍ରଦାନ ସମୟରେ ଓ୍ବାର୍ଡସଭ୍ୟ ଟୁନା ବାଗ, ପାର୍ଥ ଗୋପାଳ, କାମାକ୍ଷ ପ୍ରଧାନୀ, ନଳିନୀ ପ୍ରଭା ପଣ୍ଡା, ବିନୋଦିନୀ ବିଶି, ସୁଜାତା ରାଉତ, ଶୋଭନୀ ଦୁର୍ଗା, ଅନିତା ମାଝୀ, ଲୋଚନା ବିଶି କ୍ଷୀର ପାଣିଗ୍ରାହୀ, ଖଲୋନୀ ନାଗ ପ୍ରମୁଖ ଉପସ୍ଥିତ ଥିଲେ।
