ନୂଆଦିଲ୍ଲୀ: ୨୦୩୦ରୁ ବ୍ରିଟେନରେ ନୂଆ ପେଟ୍ରୋଲ ଏବଂ ଡିଜେଲ କାର ବିକ୍ରି ହେବନାହିଁ। ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନ୍ସନ ଏ ନେଇ ବୁଧବାର ଘୋଷଣା କରିଛନ୍ତି। ଗ୍ରୀନ୍ ଇଣ୍ଡଷ୍ଟ୍ରିଆଲ ରିଭଲ୍ୟୁଶନ ୧୦ ସୂତ୍ରୀ ଯୋଜନା ଅଧୀନ ବ୍ରିଟେନ ସରକାର ଏଭଳି ପଦକ୍ଷେପ ହାତକୁ ନେଇଛନ୍ତି। ଧାର୍ଯ୍ୟ ସମୟସୀମାର ୧୦ ବର୍ଷ ଆଗରୁ ଏଭଳି ପଦକ୍ଷେପ ନେବାକୁ ସେଠାକାର ସରକାର ଅଗ୍ରସର ହୋଇଛନ୍ତି। ସୂଚନାଯୋଗ୍ୟ, ୨୦୩୫ ପର୍ଯ୍ୟନ୍ତ ବ୍ରିଟେନରେ ହାଇବ୍ରିଡ୍ କାର୍ ବିକ୍ରି ହୋଇପାରିବ। ନୂଆ ଯୋଜନା ଲାଗି ସେଠାକାର ସରକାର ୧୫.୯ ବିଲିୟନ ଡଲାର ମୂଲ୍ୟର ରାଶି ଆବଣ୍ଟନ କରିବେ। ସରକାରଙ୍କ ଏହି ଯୋଜନା ଦ୍ୱାରା ୨.୫ ଲକ୍ଷ ନିଯୁକ୍ତିକୁ ବଞ୍ଚାଯାଇ ପାରିବ। ୨୦୫୦ ପର୍ଯ୍ୟନ୍ତ ବ୍ରିଟେନକୁ କାର୍ବନ ନ୍ୟୁଟ୍ରାଲ ଭାବେ ଗଢି ତୋଳିବା ଲାଗି ଏହା ସହାୟକ ହେବ ବୋଲି ସେଠାକାର ସରକାର କହିଛନ୍ତି।
ନୂଆ ଯୋଜନା ଅନ୍ତର୍ଗତ ଗୋଟିଏ ଦଶନ୍ଧି ମଧ୍ୟରେ ସାମୁଦ୍ରିକ ପବନ ଶକ୍ତି କ୍ଷମତାକୁ ୪ ଗୁଣ ବଢାଇବାକୁ ଯୋଜନା ରଖାଯାଇଛି। ସେହିଭଳି କାର୍ବନ କ୍ୟାପ୍ଚର ଟେକ୍ନୋଲୋଜିରେ ଲଣ୍ଡନକୁ ଗ୍ରୀନ୍ ଫାଇନାନ୍ସର ଗ୍ଲୋବାଲ ସେଣ୍ଟର ଭାବେ ଗଢିତୋଳିବାର ଯୋଜନା ମଧ୍ୟ ରହିଛି। ଏହାବାଦ ସ୍କଟ୍ଲାଣ୍ଡରେ ଓ୍ବିଣ୍ଡ ଟର୍ବାଇନ, ମିଡ୍ ଲ୍ୟାଣ୍ଡସର ଇଲେକ୍ଟ୍ରିକ କାର, ଓ୍ବେଲ୍ସର ଅତ୍ୟାଧୁନିକ ଟେକ୍ନୋଲୋଜିି ଦ୍ୱାରା ସବୁଜ ବିପ୍ଳବକୁ ଆଗେଇନେବା ଦିଗରେ ବ୍ରିଟେନ ସରକାର କାମ କରୁଛନ୍ତି। ଜିରୋ କିମ୍ବା ଖୁବ୍ କମ୍ ପରିମାଣର ପ୍ରଦୂଷଣ କରୁଥିବା ଯାନ କିଣିବା ଲାଗି ଲୋକଙ୍କୁ ସେଠାକାର ସରକାର ସବ୍ସିଡି ପ୍ରଦାନ କରିବେ। ସେହିଭଳି ଘରେ ହାଇଡ୍ରୋଜେନ ବ୍ୟବହାର ମଧ୍ୟ ଗୁରୁତ୍ୱ ଦିଆଯିବ। ସୂଚନାଯୋଗ୍ୟ, ଆସନ୍ତା ବର୍ଷ ୟୁକେରେ ସିଓପି୨୬ ଗ୍ଲୋବାଲ କ୍ଲାଇମେଟ୍ କଂଗ୍ରେସ ଆୟୋଜନ କରାଇବାକୁ ଯୋଜନା ରଖାଯାଇଛି।