ନୂଆଦିଲ୍ଲୀ,୨।୩: ଦେଶରେ ପେଟ୍ରୋଲ-ଡିଜେଲ ଦାମ ଦିନକୁ ଦିନ ବୃଦ୍ଧି ପାଉଥିବାର ଅନ୍ୟ ଅତ୍ୟାବଶ୍ୟକ ସାମଗ୍ରୀ ଉପରେ ଏହାର ପ୍ରଭାବ ପଡ଼ିଛି। ବିଭିନ୍ନ ସମାଗ୍ରୀର ମୂଲ ବୃଦ୍ଧି ଯୋଗୁ ଖାଉଟି ହନ୍ତସନ୍ତ ହେଉଛନ୍ତି। ଏପରିସ୍ଥଳେ କେନ୍ଦ୍ର ସରକାର ପେଟ୍ରୋଲ-ଡିଜେଲ ଦାମ କମାଇବା ପାଇଁ ବିଚାର ବିମର୍ଷ ଆରମ୍ଭ କରିଛନ୍ତି। ଅର୍ଥମନ୍ତ୍ରଣାଳୟ ପକ୍ଷରୁ ପେଟ୍ରୋଲ-ଡିଜେଲର ଦର କମାଇବା ପାଇଁ ରାଜ୍ୟ ସରକାର, ତୈଲ କମ୍ପାନୀ ଏବଂ ପେଟ୍ରୋଲିୟମ୍ ମନ୍ତ୍ରଣାଳୟ ସହିତ ଆଲୋଚନା କରାଯାଉଛି। ଖୁବ୍ ଶୀଘ୍ର କେତେକ ଟିକସ କମାଯିବାର ସମ୍ଭାବନା ରହିଛି। ସମ୍ପ୍ରତି ପେଟ୍ରୋଲ ଦାମରେ ୬୦ ପ୍ରତିଶତ ଅଂଶ କେବଳ ଟିକସ ରହିଛି। ୩୬ ଟଙ୍କାର ପେଟ୍ରୋଲ ଦିଲ୍ଲୀରେ ୯୧ ଟଙ୍କାରେ ବିକ୍ରି ହେଉଛି। ଏହା ଉପରେ ୫୫ ଟଙ୍କାର କେବଳ ଟିକସ ଲଗାଯାଉଛି। ମାର୍ଚ୍ଚ ମଧ୍ୟ ଭାଗ ସୁଦ୍ଧା ସରକାର ପେଟ୍ରୋଲ-ଡିଜେଲ ଦାମ କମାଇବା ଉପରେ ନିଷ୍ପତି ଗ୍ରହଣ କରିବାର ଆଶା ରହିଛି।