ଭୁବନେଶ୍ୱର, ୨୦।୨(କ୍ରୀଡ଼ା ପ୍ରତିନିଧି)-
ଅନ୍ତରିଣ କୋଚ୍ ଗେରାଲ୍ଡ ପେଟନ ବ୍ୟକ୍ତିଗତ କାରଣ ଦର୍ଶାଇ ଓଡ଼ିଶା ଏଫ୍ସି ଛାଡ଼ିଛନ୍ତି। ଇଣ୍ଡିଆନ ସୁପରଲିଗ୍ (ଆଇଏସ୍ଏଲ୍)ର ଗୋଆ ବିପକ୍ଷ ମ୍ୟାଚପରେ ସେ ସ୍ବଦେଶ ଫେରିବାକୁ ନିଷ୍ପତ୍ତି ନେଇଛନ୍ତି। ଫଳରେ ଚଳିତ ଲିଗ୍ରେ ଓଡ଼ିଶା ଏଫ୍ସିର ଶେଷ ୨ଟି ମ୍ୟାଚପାଇଁ ସେ ଉପଲବ୍ଧ ହେବେନାହିଁ। ପେନଟଙ୍କ ଅନୁପସ୍ଥିତିରେ କୋଚ୍ ଷ୍ଟିଭେନ ଡିଆସଙ୍କୁ ଅନ୍ତରିଣ ମୁଖ୍ୟ କୋଚ୍ ନିଯୁକ୍ତ କରାଯାଇଛି। ଓଡ଼ିଶା ଏଫ୍ସି ଏହାର ଶେଷ ୨ଟି ଲିଗ୍ ମ୍ୟାଚ ମୁମ୍ବାଇ ସିଟି ଏଫ୍ସି ଓ ଇଷ୍ଟବେଙ୍ଗଲ ବିପକ୍ଷରେ ଖେଳିବ। ”ବ୍ୟକ୍ତିଗତ ପାରିବାରିକ କାରଣରୁ ମୋତେ ଜାପାନ ଫେରିଯିବାକୁ ପଡ଼ୁଛି। ଓଡ଼ିଶା ଏଫ୍ସି ସହିତ ଭାରତରେ କୋଚିଂ ଜୀବନକୁ ମୁଁ ଭଲଭାବେ ଉପଭୋଗ କରିଛି। କରୋନା ମହାମାରୀ ସମୟରେ ଓଡ଼ିଶା ପ୍ରଶଂସକଙ୍କ ଧୈର୍ଯ୍ୟ ଓ ସମର୍ଥନକୁ ଧନ୍ୟବାଦ ଦେବାକୁ ପଡ଼ିବ। ଭବିଷ୍ୟତରେ ମୁଁ ଭାରତ ଫେରି କୋଭିଡ-୧୯ ବିହୀନ ସାଧାରଣ ଜୀବନ ଅତିବାହିତ କରିବାକୁ ପସନ୍ଦ କରିବି“ ବୋଲି ପେଟନ ପ୍ରକାଶ କରିଛନ୍ତି। ପ୍ରକାଶ ଯୋଗ୍ୟ ଯେ, ଚଳିତ ସିଜନରେ ଓଡ଼ିଶା ଏଫ୍ସିର ପ୍ରଦର୍ଶନ ସବୁଠାରୁ ଖରାପ ରହିଛି। ଦଳ ୧୮ଟି ମ୍ୟାଚ ଖେଳି ସାରିଥିବାବେଳେ ମାତ୍ର ଥରେ ବିଜୟ ସ୍ବାଦ ଚାଖିଛି। ୧୧ଟି ମ୍ୟାଚ ହାରିଥିବାବେଳେ ୬ ମ୍ୟାଚରେ ପଏଣ୍ଟ ଭାଗ କରିଛି। ଏଥିପାଇଁ ମୁଖ୍ୟ କୋଚ୍ ଷ୍ଟୁଆର୍ଟ ବକ୍ସଟରଙ୍କୁ ସିଜନ ମଝିରୁ ବିଦା କରାଯାଇ ପେଟନଙ୍କୁ ଅନ୍ତରିଣ କୋଚ୍ ନିଯୁକ୍ତ କରାଯାଇଥିଲା। ଏବେ ପେଟନଙ୍କ ସ୍ଥାନରେ ଡିଆସଙ୍କୁ ଏହି ଦାୟିତ୍ୱ ଦିଆଯାଇଛି।
