ମାନିଲା,୭ା୫: ଦକ୍ଷିଣପୂର୍ବ ଏସୀୟ ରାଷ୍ଟ୍ର ଫିଲିପାଇନ୍ସ ମେ’ ୯ରେ ନୂଆ ରାଷ୍ଟ୍ରପତି ବାଛିବ। ୧୯୩୫ ମସିହାରୁ ଚାଲିଥିବା ସାଧାରଣ ନିର୍ବାଚନରେ ଏଥର ସପ୍ତଦଶ ରାଷ୍ଟ୍ରପତି ଓ ଷୋଡ଼ଶ ଉପରାଷ୍ଟ୍ରପତି ନିର୍ବାଚିତ ହେବେ। ୧୯୮୭ରେ ପ୍ରଣୀତ ଫିଲିପାଇନ୍ସ ସମ୍ବିଧାନ ଅନୁସାରେ ବର୍ତ୍ତମାନର ରାଷ୍ଟ୍ରପତି ରୋର୍ଡିଗୋ ଡୁଟେର୍ଟେ ପୁନଃ ପ୍ରତିଦ୍ୱନ୍ଦ୍ୱିତା କରିବାକୁ ଅଯୋଗ୍ୟ। କିନ୍ତୁ ଉପରାଷ୍ଟ୍ରପତି ଲେନି ରୋବ୍ରେଡୋ ପ୍ରତିଦ୍ୱନ୍ଦ୍ୱିତା କରିପାରିବେ। ତେଣୁ ସେ ରାଷ୍ଟ୍ରପତି ନିର୍ବାଚନ ପାଇଁ ଭାଗ୍ୟ ପରୀକ୍ଷା କରୁଛନ୍ତି। ଏଥର ଦୁଇଟି ଭିନ୍ନ ରାଜନୈତିକ ଦଳରୁ ରାଷ୍ଟ୍ରପତି ଓ ଉପରାଷ୍ଟ୍ରପତି ନିର୍ବାଚିତ ହୋଇପାରନ୍ତି। ଦେଶରେ ପ୍ରଥମ ଥର ପାଇଁ ଏପରି ରାଷ୍ଟ୍ରପତି ନିର୍ବାଚନ ହେଉଛି, ଯେଉଁଠି ପ୍ରତିଦ୍ୱନ୍ଦ୍ୱିତା କରୁଥିବା ସମସ୍ତ ପ୍ରାର୍ଥୀ ଦ୍ୱିତୀୟ ବିଶ୍ୱଯୁଦ୍ଧ ପରେ ଜନ୍ମିତ।
ପ୍ରେସିଡେନ୍ସି ପାଇଁ ଘୋଡ଼ାଦୌଡ଼ ଆରମ୍ଭ ହୋଇଛି। ସୋମବାର ହେବାକୁ ଥିବା ଏହି ଦୌଡ଼ରେ ଆଗରେ ରହିଛନ୍ତି ବର୍ତ୍ତମାନର ଉପରାଷ୍ଟ୍ରପତି ଲେନି ରୋବ୍ରେଡୋ ଏବଂ ଫର୍ଡିନାଣ୍ଡ ମାର୍କୋସ ଜୁନିୟର। ମାର୍କୋସ ହେଉଛନ୍ତି କୁଖ୍ୟାତ୍ ଏକଚ୍ଛତ୍ରବାଦୀ ଶାସକ ଫର୍ଡିନାଣ୍ଡ ଇମାନ୍ବେଲ ଇଡ୍ରାଲିନ୍ ମାର୍କୋସ୍ଙ୍କ ପୁଅ, ଯାହାଙ୍କ ଦୁଇ ଦଶନ୍ଧିର ଶାସନରୁ ୧୯୮୬ ବିଦ୍ରୋହର ସୂତ୍ରପାତ ହୋଇଥିଲା। କୁହାଯାଉଛି ଯେ, ପାଟ୍ରିଡୋ ଫେଡେରାଲ ଫିଲିପିନାସ୍ (ପିଏଫ୍ପି) ପ୍ରାର୍ଥୀ ମାର୍କୋସ ଜୁନିୟର ଜିତିଲେ ଦେଶକୁ ତାଙ୍କ ବାପାଙ୍କ ଭଳି ଶାସନ କରିବେ ନାହିଁ। କିନ୍ତୁ ବର୍ତ୍ତମାନର ରାଷ୍ଟ୍ରପତି ରୋଡ୍ରିଗୋ ଡୁଟେର୍ଟେଙ୍କ ଭଳି ମାର୍କୋସଙ୍କ ଷ୍ଟ୍ରଙ୍ଗ୍ମ୍ୟାନ୍ ଷ୍ଟାଇଲକୁ ବି ଦେଶବାସୀ ପସନ୍ଦ କରିବେ। ମାର୍କୋସଙ୍କ ରନିଂ ମେଟ୍ ଅର୍ଥାତ୍ ଉପରାଷ୍ଟ୍ରପତି ପ୍ରାର୍ଥୀ ହେଉଛନ୍ତି ରାଷ୍ଟ୍ରପତିଙ୍କ ଝିଅ ସାରା ଡୁର୍ଟେର୍ଟେ, ଯିଏକି ଏହି ପଦ ପାଇଁ ମଇଦାନକୁ ଓହ୍ଲାଇଥିବା ଏକମାତ୍ର ମହିଳା ପ୍ରାର୍ଥୀ। ସେ ଲାକାସ୍ ସିଏମ୍ଡି ଟିକେଟରେ ଲଢ଼ୁଛନ୍ତି। ସେହିପରି ଏକମାତ୍ର ମହିଳା ରାଷ୍ଟ୍ରପତି (ସ୍ବାଧୀନ) ପ୍ରାର୍ଥୀ ଲେନି ରୋବ୍ରେଡୋଙ୍କ ରନିଂ ମେଟ୍ ହେଉଛନ୍ତି ଫ୍ରାନ୍ସିସ୍ ପାଙ୍ଗିଲିନାନ୍। ରୋବ୍ରେଡୋ ବିଜୟୀ ହେଲେ ଫିଲିପାଇନ୍ସରେ କୋହଳ ନୀତି ଆପଣାଇ ତାଲିମ, ସ୍ବାସ୍ଥ୍ୟସେବା, ଦାରିଦ୍ର୍ୟ ଓ ଲିଙ୍ଗଗତ ସମାନତା ଭଳି ପ୍ରସଙ୍ଗ ଉପରେ ଗୁରୁତ୍ୱ ଦେବେ ବୋଲି ଆଶା କରାଯାଉଛି। ସେ ସାମାଜିକ କଲ୍ୟାଣକୁ ତ୍ୱରାନ୍ବିତ କରି ବେକାରି ସମସ୍ୟା ଦୂର କରିବେ ବୋଲି ଏକ ସଭାରେ ପ୍ରତିଶ୍ରୁତି ଦେଇଛନ୍ତି। ତେବେ ରୋବ୍ରେଡୋଙ୍କ ରାଷ୍ଟ୍ରପତିତ୍ୱ ସେତେଟା ସହଜ ହୋଇ ନ ପାରେ। ଉପରାଷ୍ଟ୍ରପତି ଭାବେ ରୋବ୍ରେଡୋ ଘୃଣା ଓ ଅପପ୍ରଚାର ବିରୋଧୀ ଅଭିଯାନର ନେତୃତ୍ୱ ନେଇ ରାଷ୍ଟ୍ରପତି ଡୁଟେର୍ଟେଙ୍କ ପାଇଁ ଅଡ଼ୁଆର କାରଣ ସାଜିଥିଲେ।
କୋଭିଡ୍ ମହାମାରୀ ପରେ ଆର୍ଥିକ ସଙ୍କଟ ଦେଇ ଗତି କରୁଥିବା ଫିଲିପାଇନ୍ସର ଅର୍ଥନୀତି ସଜାଡ଼ିବା ପାଇଁ କୌଣସି ପ୍ରାର୍ଥୀ ନିର୍ବାଚନୀ ପ୍ରତିଶ୍ରୁତି ଦେଇନାହାନ୍ତି, ଯଦିଓ ଏଥିରେ ସଂସ୍କାର ଆଣିବା କଥା ସମସ୍ତେ କହୁଛନ୍ତି। ଦେଶର ଆଭ୍ୟନ୍ତରୀଣ ନିରାପତ୍ତା ଓ ସାମରିକ ପରିଚାଳନାକୁ ମଜଭୁତ୍ କରିବା ପାଇଁ ଆମେରିକାର ପ୍ରତିରକ୍ଷା ସହଯୋଗ ଜରୁରୀ। ତେଣୁ ଦୁହିଙ୍କ ମଧ୍ୟରୁ ଯିଏ ଜିତିଲେ ବି ଆମେରିକା ସହ ଫିଲିପାଇନ୍ସର ଦୀର୍ଘ ସମ୍ପର୍କ ପୂର୍ବଭଳି ରହିବ। ଚାଇନା ସହିତ ମାର୍କୋସଙ୍କ ସୁସମ୍ପର୍କ ଥିବାରୁ ସେ ରାଷ୍ଟ୍ରପତି ହେଲେ ବେଜିଂ ସହ ଦ୍ୱିପାକ୍ଷିକ ସହଯୋଗିତା ବଢ଼ିପାରେ।