ମାନିଲା,୪।୧୨ : ରବିବାର-ସୋମବାର ମଧ୍ୟରାତ୍ରିରେ ଫିଲିପାଇନ୍ସରେ ପୁଣି ଭୂମିକମ୍ପ ଅନୁଭୂତ ହୋଇଛି। ଏହାର ତୀବ୍ରତା ରିକ୍ଟର ସ୍କେଲରେ ୬.୮ ବୋଲି ମାପ କରାଯାଇଛି। ଜାତୀୟ ଭୂକମ୍ପ କେନ୍ଦ୍ର କହିଛି ରାତିଅଧ ପ୍ରାୟ ୧ଟା ୨୦ ସମୟରେ ଏହି ଭୂକମ୍ପ ଘଟିଛି। ଏହାର କେନ୍ଦ୍ର ଭୂଗର୍ଭର ୮୨ କିଲୋମିଟର ଗଭୀରରେ ମାଇଣ୍ଡାନାଓରେ ଥିଲା । ଭୂକମ୍ପ ହେବାରୁ ଘରେ ଶୋଇଥିବା ଲୋକେ ଜୀବନ ଭୟରେ ବାହାରକୁ ଦୌଡି ପଳାଇ ଆସୁଥିବାର ଦେଖିବାକୁ ମିଳିଥିଲା।
ରବିବାର ସନ୍ଧ୍ୟାରେ ଫିଲିପାଇନ୍ସରେ ହୋଇଥିବା ଭୂକମ୍ପରେ ଲୋକମାନେ ଭୟଭୀତ ହୋଇଥିଲେ। ଏହି ଭୂକମ୍ପର ତୀବ୍ରତା ୬.୬ ଥିଲା। ଏହାର କେନ୍ଦ୍ର ଭୂଗର୍ଭର ୫୬ କିଲୋମିଟର ଗଭୀରରେ ଥିଲା। ଶନିବାର ଏଠାରେ ୭.୬ ତୀବ୍ରତାଯୁକ୍ତ ଏକ ଶକ୍ତିଶାଳୀ ଭୂକମ୍ପରେ ଜଣେ ଗର୍ଭବତୀ ମହିଳାଙ୍କ ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଥିଲେ। ସୁନାମି ଚେତାବନୀ ପରେ ହଜାର ହଜାର ଲୋକ ଭୟଭୀତ ହୋଇ ଘର ଛାଡିଥିଲେ।
ଆମେରିକାର ସୁନାମି ଚେତାବନୀ ପ୍ରଣାଳୀ ପ୍ରଥମେ ଫିଲିପାଇନ୍ସ ଉପକୂଳର ତିନି ମିଟର (୧୦ ଫୁଟ) ପର୍ଯ୍ୟନ୍ତ ଜୁଆରର ପୂର୍ବାନୁମାନ କରିଥିଲା, କିନ୍ତୁ ପରେ ଘୋଷଣା କଲାଗଲା ସୁନାମି ବିପଦ ନାହିଁ।
